Pr 28 - Mam Ostuncalco Bible

1Nkub' oqju' b'inchal myab'a'n maskye mix-a'lo' njyonte,

aye'tzunkye' tnik'alkyi'j nche anq'in q'uqli kyk'u'j kse'n jun b'alun.

2Qa myab'a'n ttenju' kawb'il toj tnam, mintzunte' tajb'il tu'n tkawin,

Atzunte' nejenel ati tnab'l tkyaqilju' ti'xti' inb'aj tnk'u'n.

3Ikyte prowju' nalq'an tijuntl prow

kse'n ajttzaj jun kyq'iq' jb'al ex majx nkub' yajti awal.

4Nmuje kytzi nelkypa'n kyib' ti'ju' kawb'il kyuk'i'lju' b'inchal myab'a'n;

Aye'tzun njapun kyu'n min muje kytzi kyuk'i'l.

5Min nkanete' tnik'alilti'j toj twitzju' b'inchal myab'a'n,

aye'tzunkye' nche jyon ti'j Dyos in kane tkyaqil toj kywitz.

6Ate b'a'nju' nqnima'n Dyos maskye toj prowil

kyetwitzu' q'inun min na'n Dyos tu'n.

7Alkyete njapun tkawb'il Dyos tu'n, jun k'wa'lb'aj b'a'n ximan,

atzunte' naq wantkub' tu'n, tch'ixaw tman nel tu'n.

8Aju' xjal nq'on pwaq ch'ex tuk'i'l tub'chil, nchmet tq'inumal,

atzunte' q'inumal lu kxe'l q'o'n te juntl xjal nq'aq'an tk'u'j kyi'j prow.

9qa ati jun min tajb'il tu'n t-xitb'i'n tkawb'il Dyos,

ikxte Dyos min ntzaj tb'i'n tkub'sb'il.

10Alkyete matxi' q'inteju' tnik'alti'j toj myab'a'n b'e,

kb'el tz'aq tojxu' t-xpatxab';

aye'tzunkye' tnik'alkyi'j kyk'ma' t-xtalb'il Dyos.

11Ate' q'inun toj twitz qa o'kxte atixi'x tnab'l,

atzunte' prow qa ati tnab'l neltnik' qa mixti'te' b'a'n tu'n.

12Aj kykanb'anju' tnik'alkyi'j, tzalajb'il kye xjal;

qatzun aye' b'inchal myab'a'n, b'isb'ajilte' toj kanmi xjal.

13Alkyete inkub' tewa'n til, lay tz'anq'in toj b'a'nil;

atzunte' njawtz tpa'n til ex nkyej ttzaqpi'n, kb'el najsa'n.

14K'iwla'nte' xjal nxob' te Dyos kukxju';

atzunte' ch'uẍ tanmi kb'el yajti.

15Kse'n jun b'alun ntzanun mujqa jun oso nq'aq'an,

iktzun xjalju' b'inchal myab'a'n nkawin tib'aj jun tnam prow.

16Jun nimaqkawil min ximan, nimju' yajb'il tu'n;

atzunte' nimaqkawil mixti' jamjon ktenb'el nim tchwinqlal.

17Alkyete' matxi' b'yonxjal

tjunilxte' kxe'l toj muqb'il:

¡mix-a'lo'xte' kmayil ti'j!.

18Kkletelte' xjal tnik'alti'j,

atzunte' pi's kb'eltz'aq toj taq'wixil.

19Alkyete nkub' taq'una'n ttx'otx', nim twa ati;

atzunte' naq njaninje, k'anq'ila toj prowil.

20K'i'wla'nte' xjal tnik'alti'j;

atzunte' tajb'il tu'n q'inumax tu'n sb'ub'l, ati tz'e'ysb'il twitz.

21Myab'a'nte' qa mya' junelni kyilwi xjal qu'n;

qu'n jaku' noqx tu'nelju' qo' b'inchana' il.

22Aju' xjal noktilil tu'n tjaw q'inumax, noq njamjon,

minti' b'i'n tu'n titi' tzul ti'j.

23Qama kane toj qwitz b'a'nxpete' xjal ntzak'un kye witzu' naq nka'yin qi'j.

24Aju' inelq'an kyi'j tman ex intma'n: mya il te', chij,

junx kynab'l kyuk'i'lju' b'yolwnaq.

25Alkyete' npon tk'u'j ti'j txqan ti'xti', noqx in jyon q'oj;

alkyetzunte q'uqlok tk'u'j ti'j Dyos kch'iyel toj tkyaqil.

26Aju' xjal q'uqlok tk'u'j ti'j Dyos; nchmet ti'xti' te

atzunte' inxi'x njamjon, noq nq'ojin.

27Aju' nonin ti'j prow, lay kub' prowix;

atzunte' min na'nqe' tu'n, ktzajil txko'n toj twi'.

28Ajkykanb'an b'inchal myab'a'n inche b'aj ewan xjal;

ajtzun kykyim nimju' tnik'a kyi'j nchmet.