1Jawtiq'i'n Dab'i kyajlalu' t-xjal te q'oj, ex e'kub' tq'o'n nejenel kyib'aj junjun tnej te kab'k'al lajnaq (1,000) ex kyib'aj jun tnej te jo'naq (100).
2Yajxi'tzuntl e'kub' taq'pu'nju' t-xjal toj oxe' tnej; juntzun tnej xitq'o'n tjaq' tchaq'b'il Joab', jun tnejtl tjaq' tchaq'b'il Ab'isay, tk'wal Saruya ex kyitz'inkyib' tuk'i'l Joab', atzu'n jun tnejtl tjaq' tkawb'il Itay, aj Kat. Ex xitma'n kye kykyaqilju' t-xjal te q'oj:
—Chin xe'lwe' kyuk'i'le' toj q'oj, chij.
3Aye'tzunkye xikytzaq'we'n te:
—Lalun tb'inchaya lu nimaqkawil, qu'n mixti' tz'ela' teju' ajq'oj qama qokub' oqe' mujqa makyim nik'janqe', atzunta nimaqkawil nimxi'x toklena kse'n junmutx' jo'k'al (10,000) qb'aje'. Qu'mtzun ate b'a'n tu'n tkyajtena nimaqkawil toju' nintnam tu'n kyxi' t-sma'na onilqeye' tzmax tza'lu, chechij.
4Xi'tzun ttzaq'we'n nimaqkawil kye:
—Knb'incha'ye' b'a'n toj kywitze', chij, textzu'n kmoj kub'ten toj jun plaj ttziju' nintnam, aye'tzu'n t-xjal te q'oj intoq che etz toj q'oj toj kab'k'al lajnaqchaq (1,000) ex toj jo'naqchaq (100) kyb'aj.
5Expe' tchaq' nimaqkawil kye Joab', Ab'isay ex Itay, tu'n lalun che okten b'yolte ku'xun Ab'salon, naku'xwitloj ate, kykyaqiltzu'n xjal te q'oj kyb'iju' chaq'b'il xitq'o'n nimaqkawil ti'j Ab'salon.
6Ikytzu'n eb'ajxa' junjun tnej t-xjal q'ojil kyi'ju' aj Israel te q'oj.
Atzu' oka' q'oj toju' k'ul te Eprayin,
7ex kub'kyi'ju' xjal aj Israel kyu'n t-xjal Dab'i. Nim txqan xjal e'kyim toju' q'ij lu, qu'n kab'mutx' lajk'al (20,000) ichan eb'aj.
8Matxi'toq kub' noj tkyaqilju' tx'otx' tu'n q'oj, expe' toju' maj lu nimxi'xtl xjal eb'aj tu'nju' k'ul kyetwitz tu'n k'uẍtx'e'nb'il.
9Atzunte Ab'salon iqa'n tu'n jun tchej mul, naq myanim oktokpaj kywitzju' t-xjal Dab'i. Okx tlmo'ntib'ju' chej tjaq' jun nin b'ansi, o'kx tkyaj xwakju' t-xya'mal twi' Ab'salon kyxol tq'ob' tze majx kyej xtunin, atzunte chej majx tlaj tb'e.
10Atzunju' xjal lonte xi' q'malte te Joab':
—Mawile' Ab'salon in xtunin ti'j junwi' b'ansi, chij.
11Atzunte Joab' xittzaq'we'n te:
—Qanatzun matila, ¿tiqu'ntzun minti' xkub' tb'yo'na axtzu'? Ma'wtlo txinq'o'nwe' lajoj saqpwaq teya ex jun k'alb'il tk'u'ja, chij.
12Atzunju' ichan lu xittzaq'we'n te Joab':
—Maskyewtlo matzaj tq'o'na kab'k'al lajnaq (1,000) saqpwaq weye', mixti' tu'n taq'ponwe' nq'ob' ti'ju' tk'wal nimaqkawil; qu'n qb'iqe' tchaq'b'ilju' nimaqkawil taq' teya, te Ab'isay ex te Itay, tu'n txi' kyka'yi'nju'ye' kuxun Ab'salon.
13Ex juntl, naqwit ma nb'inchaye' ikju', mixwitlo ti'x tajb'en, qu'n mixti' jun ti'xti' laywit tb'i nimaqkawil, exwitlo mixti'x xtb'inchaya tu'n nklete', chij.
14Atzunte Joab' xittzaq'we'n te:
—Lay tz'extl nq'ije' tuk'i'la, chij. Jatztiq'i'n oxe' talsmaj ex e'aq'pon t-xyu'n ti'j tanmi Ab'salon, i'tz'xtoq ti'ju' b'ansi.
15Ex xikytxoli'n kyib' lajoj onilte Joab' ti'j Ab'salon, ex kub' kyb'ajsa'n.
16Tchaq'tzun Joab'tz tu'n txi' q'ajtza'nju' chun, aye'tzunju' xjal te q'oj mixti' xi'kyljo'ntl tu'n kyq'ojin kyi'ju' aj Israel, qu'n exi' tmyo'n Joab'.
17Ku'x kymqu'n t-xmilal Ab'salon toj jun jul nim t-xe atitoq toju' k'ul, ex jaw kych'uqb'a'n txqan ab'j tib'aj. Yajxi'tzuntel kykyaqil aj Israel eb'ajx oq kyja.
18Tej itz'xtoq Ab'salon, tchaq' tu'n jaw b'incha'n jun tilb'ilal ab'jile, ju' ati toju' Tb'ya' Nimaqkawil, ex oktq'o'n tb'i ti'j, qu'n mixtoqti' jun tk'wal tu'n tkyaj te nab'ab'l. Axtzun tb'iju' kyejten, tilb'ilal Ab'salon.
19Atzunte Aymaas, tk'wal Sadok, xitma'n te Joab':
—Q'ontz ch'i'n anb'ila weye' tu'n nxi'ye' ojqel q'malte teju' nimaqkawil qa matxi' tb'incha Qman Dyos xtalb'il qu'n matxi' klonjtz toj kyq'ob' tajq'oj, chij.
20Atzunte Joab' xittzaq'we'n te:
—Myata tu'n txi' q'malte tqanil ja'lo. B'a'n txi'ya toj jumajtl, mya ja'lo, qu'n tk'walna' nimaqkawilju' xkyim, chij.
21Atzunte Joab' xi' xa' tma'n te jun xjal te q'oj aj Etyope:
—Kutxi'ya ex q'manxa tqanil te nimaqkawil ti'ju' matxi' b'aji, chij.
Ku, chi aj Etyope, kub' tzipe te ninb'il twitz Joab', xitzuntz ojqel.
22Xitma'n jumajtl Ayimaas te Joab':
—Q'ontzx anb'ila weye' tu'n nxi' lpeye' ttze'lti'j aj Etyope, chij.
Atzunte Joab' xittzaq'we'n te:
—¿Tiqu'ntzun tajb'ila'ya tu'n txi'ya, witz'in, layna' tzaj q'o'n jun oyaj teya tu'nju' tqanil kpomel tma'na?, chij.
23Maskyetzun chi Ayimaas xittzaq'we'n:
Xi'tzun tma'n Joab' te:
—¡Kuxna' txi'ya!, chij.
Xi'tzun Ayimaastz ojqel toju' b'ya', ex nej twitz aj Etyope.
24Atzunte Dab'i akxtoq q'uqli kyxolu' kab'e' ttzi nintnam, atzunju' xq'uqil atokxtoq twi' ja, tib'aj ttzi nintapi ti'ju' nintnam. O'kx t-xitka'yi'n jun ichan xi'toq ttzaj ojqel tel,
25ex xitma'n kuw teju' nimaqkawil. Atzunju' nimaqkawil tma:
—Qa tjunal tzul, junlo b'a'n tqanil tzul ti'n, chij.
Tej ljo'n tul lq'eju' xjal,
26xitka'yi'n xq'uqil juntl xjal ojqel tel, ex xit-ẍch'i'n teju' xq'uqil ttzi nintapi kjalu:
—¡Tzul juntl ichan ojqel! chij.
Atzunju' nimaqkawil xittzaq'we'n:
—Exlo b'a'n tqanil tzultiq'i'n, chij.
27Xitma'ntlju' xq'uqil:
—Naku'j a Ayimaas, tk'wal Sadok, nejli toj nwitze', tu'nju' tz'ojqelan, chij.
Atzunju' nimaqkawil tma:
—B'a'nlote' tqanil tzultiq'i'n, qu'n b'a'nte' xjal lu, chij.
28Pon lq'etzun Ayimaas, ex majx kub'joqe twitzju' nimaqkawil, xitq'olb'e'n ex xitma'n te:
—Ajwalinjtzwitju' Qman Dyos, nk'uluna te nimaqkawil, qu'n matxi' che eltiq'i'nju' xjaw kyiq'i'n kyib' ti'ja, chij.
29Xi'tzun tqani'n nimaqkawil te:
—¿Ma b'a'n ta'ya' q'a Ab'salon?, chij.
Atzunte Ayimaas xittzaq'we'n:
—Tej ẍintzaj tchq'o'ne' Joab', ajb'el teya, mache jawtilju' xjal, naqtzun aju' mixti' xnb'iye' titoq nb'aji, chij.
30Xitma'ntzun nimaqkawiltz te:
—We'ku'ya tza'lu, ex axtzu' tenkja'ya, chij. Ku, chi Ayimaas kub' we' atzu'.
31Tojtzunju' kmuj lu pon aj Etyope, ex tma:
—B'intzju'ya b'a'n tqanil lu nimaqkawil: matxi' tb'incha Qman Dyos xtalb'il teya, qu'n matxi' klonjtza tu'n kye kykyaqilju' xjaw kyiq'i'n kyib' ti'ja, chij.
32Atzunju' nimaqkawil xitqani'n te:
—Yajtzu'n q'a Ab'salon, ¿ma b'a'n ta'ya'?, chij.
Xi'tzun ttzaq'we'n aj Etyope:
—Ikwit che b'aja' kykyaqilju' tajq'oja nimaqkawil, ex kykyaqilju' njaw kyiq'i'n kyib' ti'ja tu'n tb'o'lja, kse'n xb'aja' ku'xun lu, chij.
33Tzaj tb'isju' nimaqkawil b'a'nxi'x, ex jax oq'il toju' tja b'incha'n tib'aju' ttzija. Atzunj xi'toq tjax, intoq oq' ex intma'n kjalu: ¡Jata'ya Ab'salon! ¡Jata'ya, nky'ajul! ¡Maswitlo b'a'n ayine' ẍin kyim te t-xela!, chij.
Who We AreWhat We EelieveWhat We Do
2025 by iamachristian.org,Inc All rights reserved.
