2 S 21 - Mam Ostuncalco Bible

Tu'me'l t-xel kyu'n aj Kab'aon

1Tzaj jun nin we'yaj te oxe' ab'q'i toj tq'ijlalil Dab'i. Xi'tzun t-xjelu'n Dab'i te Qman Dyos, atzunte Qman Dyos tzaj ttzaq'we'n: Tu'n tpaju' b'yojwnaqi'n tb'incha Sawul kyuk'i'lju' toj tja, qu'mtzun saja' we'yaj, qu'n e'kub' kyb'yo'n aj wab'on, chij.

2E'tzaj ttxko'n Dab'i aj Kab'aon ex yolin kyuk'i'l. (Mya aj Israel qe'kye' aj Kab'aon, naq jun tzb'oj xjalqe' kyyajajil amorey ju' kyej b'entti'j jun kyol kyuk'i'l aj Israel, atzuntlte Sawul kub' t-xima'n tu'n kyb'aj kykyaqil naq tu'n kpaju' aj Israel ex aj Juda.)

3Xi'tzun tqani'n Dab'i kye:

—¿Titi' kyajb'ile' tu'n nb'inchanteye' kyeye'? ¿se'n taq'wi tu'n telju' taq'wix xb'inchanjtz kyeye', tu'ntzun qk'i'wlanjtze' ayo'ye' ttanam Qman Dyos?, chij kye.

4Aye'tzu'n aj Kab'aon xikytzaq'we'n te:

—Myana' pwaqte' tx'eqlix qxole' tuk'i'l Sawul exqe' toj tja, ex min qajb'ile' tu'n tkyim jun kyxol aj Israel, chechij.

Xi'tzun tma'n Dab'i kye:

—Kymantzna'ye' titi' kyajb'ile' tu'n nb'inchanteye' kyeye', chij.

5-6Aye'tzunkye xikytzaq'we'n:

—Qajb'ile' tu'n ttzaj kyq'o'ne' wuq tyajajilju' ichan tajb'iltoq tu'n qkub' tnajsa'ne' tu'n lalun qo' tentle' toj kytx'otx'e', kjawil qjtz'o'ne' kyqul twitz Qman Dyos toj Wib'ea ttx'otx' Sawul, ju' sk'o'n tu'n Qman Dyos, chechij.

B'a'n ela' toj twitzju' nimaqkawil tu'n kyxi' tq'o'n,

7o'kx Mepi-b'oset exch'yon toj tk'u'j, ju' tk'wal Jonatan ex tchman Sawul, qu'n ojetoq kytziya jun kyol tuk'i'l Jonatan twitz Qman Dyos.

8Aye'tlju' kab'e' tal Rispa tmyal Aya e'ten tuk'i'l Sawul, e'ttzuy, Aye' Armon ex Mepi-b'oset, exqe' jwe' tal Merab', tmyal Sawul, ju' e'ten tuk'i'l Adryel, tk'wal B'arsilay aj Meola,

9exi' tq'o'ntzuntz toj kyq'ob' aj Kab'aon, aye'tzunkye jaw kyjtz'o'n kyqul twi' witz, twitz Qman Dyos. Ikytzu'n ekyima' wuq junx, in tzyetku' tq'ijlalil tu'n tjaw joyet seb'ad.

10Oktzun tq'o'n Rispa, tmyal Aya, ok tq'o'n jun t-xb'alun jochon te b'is, ex jax joqe tib'aj jun pik. Kyejten xq'uqilkye anmi atzu', tzaqex tej ttzyet tjaw joyet seb'ad tzmax ttzaj jb'al, qu'n min taj tu'n kyul lq'e k'utz kyk'etzju' kyimni te q'ijtl, ex tu'n lalun che ulju' tojk'ul txkup te qonik'an.

11Tetzunj tb'inte Dab'i ti'ju' tb'incha Rispa, tqya Sawul,

12xi' ex tzaj tiq'i'n tb'aqil Sawul ex tb'aqil Jonatan ju' tk'wal, toj kytx'otx'ju' aj Jab'es toj Kalaad. Aye'ju' xjal lu xi'ni kyelq'a'n toju' k'wik' toj B'et-san, jae'jawa' kyob'ana' pilistey tej tkub'kyi'j Sawul kyu'n toj Kyilb'oa.

13Tchaq'tzun Dab'itz tu'n kyxi' iq'i'nju' kyb'aqil Sawul ex Jonatan, ex tu'n kyxi' iq'i'nju' jawjtz'o'n kyqul;

14ku'xtzun kymqu'n kyb'aqil Sawul ex Jonatan toju' tmuqb'il Kyis, ju' tman Sawul, toj Sela, toj kytx'otx' tyajajil B'enjamin. Tkyaqil b'inchet kse'nx tchaq'ju' nimaqkawil. Tb'ajlenxi'tzun ja'lu, tzaj tb'i'n Qman Dyos kykub'sb'ilju' tnam.

Klet Dab'i tu'n Ab'isay

15E'aq'wi jumajtl pilistey q'ojil kyi'j aj Israel. Etztzun Dab'itz q'ojil kyi'j kyuk'i'lju' nejenel kye t-xjal. Kub' sikti Dab'i b'a'nxi'x,

16o'kxtoq ttzaju' Isb'i-b'enob', nim jun twe', b'yolte. Iq'i'ntoq jun tch'ut masch'i'n qaq lib'r tk'i' nik'jan talal, ex k'lo'nktoq jun tk'uẍtx'e'nb'il ak'a'j tk'u'j.

17Atzunte Ab'isay, tk'wal Seruya, xi' onilte Dab'i, oktb'yo'n pilistey ex majx kyim tu'n. Kyb'inchatzun t-xjal Dab'itz tu'n ttziyante kye tu'n lalun tz'extl q'ojil kyuk'i'l tu'n lalun yup kytzaj aj Israel.

Q'oj kyi'j xjal nimaqkwe'(1 Cr 20.4-8)

18Yajxi'tzuntel ok juntl q'oj kyu'n aj Israel kyi'j pilistey toj Wob'. Kub' tb'yo'n Sib'ekay ju' Sap toju' q'oj lu, ju' tzajni tyajil kyi'ju' xjal nimaq kywe'.

19Ex tej tokjumajtl q'oj toj Wob' kyi'j pilistey, a Elanan tk'wal Jayir aj B'elen, kub' b'yonte Kolyat ju' aj Kat, iq'i'ntoq jun tch'ut nimin twe' ex lalun tk'etz.

20Ok juntl q'oj toj Kat. Atitoqtzun jun ichan nimxi'x twe' atzu', kab'lajoj (12) twi'tqan ex kab'lajoj (12) twi'tq'ob': qaqchaq junjun tq'ob' ex qaqchaq junjun tqan. Kyyajajilx nimaq kywe',

21okten ik'lelkye aj Israel ex kub' b'yo'n tu'n Jonatan, tk'wal Sima ju' ttzik Dab'i.

22Xi' tzajna' kyyajilju' kyaje' nimaq kywe' lu ti'j Repa, ju' aj Kat, e'kub' tz'aq toj tq'ob' Dab'i ex toj kyq'ob'ju' nejenel kye t-xjal.