Ez 33 - Mam Ostuncalco Bible

Taq'unju' xq'uqil(Ez 3.16-21)

1Tzaj yolin Qman Dyos weye', ex tma:

2Ichan, yolina kyeju' twanaqila, q'manxa kye: Aj txinsma'ne' q'oj toj jun tx'otx', aye' xjal toju' tx'otx' lu njaw kysk'o'n jun kyxol tu'n tok te xq'uqil.

3Ajtzun tka'yinte xq'uqil qa xi'kytzaj lq'eju' ajq'oj tk'etzju' tnam, inxitq'ajtza'n chun ex ntma'n tpakb'al kye xjal tu'n t-xikyka'yi'n kyib'.

4Qatzun ati jun matb'iju' tq'ojq'ojel chun ex min nxi' toj twinqil, aye'tzu'n ajq'oj che pomil ex kb'el kyb'yo'n, axte ati tpaj tu'nju' tkamik,

5qu'n matb'iju' tq'ojq'ojel chun extzun min xxitb'i'n; axte ati tpaj ti'ju' tkamik, qu'n naqwit matxi tb'i'n ma'wtlo klet.

6Qatzun aju' xq'uqil matil xi'toq kyponju' xjal ajq'oj extzun min xxitq'ajtza'n chun tu'n kb'inteju' xjal, aye'tzu'n ajq'oj che pomel ex kb'el kyb'yo'n jun xjal, kkyimelte' xjal lu tu'n tpaj til, oktzun chin xjelulwe' teju' xq'uqil tu'n tpaj tkamikju' xjal lu.

7Matxi' kub' nq'o'na, ichan, kse'n jun xq'uqil ti'ju' tnam Israel. Aya kk'molteju' tqanil wu'ne' ex tu'n txitma'na wab'ib'le' kye tu'n kyb'inte.

8Qaj ntzajku' nma'ne' tqanil tz'e'ysb'il twitz jun b'inchal il tu'n tkyim; qatzun min xxitma'na te tu'n tch'exb'ente tchwinqlal, ex min xtb'incha, kkyimelju' aj il lu tu'n tpaju' til, oktzun chin xjelulwe' teya tib'aju' tkamik.

9Qatzun matxitma'nta teju' b'inchal il tu'n tanjtzti'j tanmi, ex min xtb'incha, kkyimel tu'n tpaj til, atzunta oktkla' tib'a.

Tb'inchb'ajilex junjun qa b'a'n mujqa mya(Ez 18.21-32)

10Ichan, q'manxa kye aj Israel: Aye'kye' inkyma'ne': Nim txqan qpaj ex qil. Qu'mtzun nqo q'ayj b'a'nxi'x. ¿Se'n taq'witzun ajqanq'in? chechije'.

11Ayintzunwe', Dyos Manb'aj, axxi'x ayinku'ye' chin xel q'mante, min wajb'ile' tu'n tkyimiju' b'inchal il, naq o'kx tu'n tanjtzti'j tanmi ex tu'n tanq'in. Israel, q'o'nkju'ya tchwinqlala taq'wix ljo'n tu'na. ¿Titiqu'n kkyimela'ya?

12Ichan, q'manxa kyeju' twnaqila: qama b'inchan il jun xjal b'a'n tchwinqlal, lay klet tu'nju' tchwinqlal b'a'n tnejel, qatzun makyej t-xon jun aj ilju' taq'wixil, lay kyim tu'nju' til xtb'incha nejl. Qatzun b'a'n xjal mab'inchan il, lay tz'ajb'enju' tchwinqlal b'a'n tnejel tu'n tanq'intl.

13Qama nmaye' tu'n tanq'in jun xjal b'a'n tchwinqlal, extzun matz'ok qe tk'u'j ti'ju' b'a'n matxi' tb'incha, ex matxi tb'incha'ntlju' taq'wix, lay tz'ok nq'o'ne' tb'inchb'aj b'a'n toj tajlal, kkyimel tu'nju' taq'wix xtb'incha.

14Qatzun manmaye' tu'n tkyim jun b'inchal il, qatzun makyej ttzaqpi'nju' il ex matb'inchaju' b'a'n ex tnik'alilti'j,

15ex matxi tanjsa'n ti'ju' ojetoq kyajttzyu'n te prent mujqa matxitoq tz'el telq'a'n, ex mache tb'inchaju' kawb'il ntq'o'n chwinqlal ex makyej ttzaqpi'n b'inchaj taq'wix, axxi'x lay kyim, k'anq'il.

16Ina' anq'in b'a'n ex toj tnik'alilti'j, k'anqil, ex lay tzaj nna'ntle' til ojetoq b'aj tb'incha'n.

17Chechiloju' twnaqila qa mya tnik'alilti'ju' nb'incha'ne'; axxi'x aye'na'kye min nkyb'incha'n tnik'alilti'j.

18Qama kyej tq'o'n b'a'nxjal tu'n tb'inchanteju' b'a'n ex matxi tb'incha'n taq'wix, kkyimel tu'nju' il xitb'incha'n.

19Qatzun atlju' b'inchal myab'a'n makyej t-xonju' b'inchaj myab'a'n ex matb'incha'ju' b'a'n ex tnik'alilti'j, tu'nju' lu k'anq'ila'.

20Inxi'x kyma'nchaqtle': Mya tnik'alti'ju' ntb'incha'n Qman Dyos, chechije'. Oktzun che okelkye' toj xjel teyile junjun wu'ne' aj Israel, se'nxchaqju' kyb'inchb'aje'.

Tej tkub'ti'j Jerusalen

21Ul jun xjal toj jwe' tajlal tlajoji'n (10) xjaw te tkab'lajoji'n (12) ab'q'i qetzlen q'i'ne' toj qtanam, ojetoq tz'etz oq toj Jerusalen ex tzaj tma'n weye' qa ojetoq kub'ti'ju' nintnam kyu'n ajq'oj.

22Ojetoq kub' tq'o'n Qman Dyos tq'ob' wib'aje' toju' qonik'an na'mxtoq tulju' xjal tzaqpaj lu; tetzun prim, tej tulju' ichan, tzaj tq'o'ntl Qman Dyos tu'n nyolintle' ex elju' meyil wi'je'.

Aye' kyilju' tnam

23Tzaj yolin Qman Dyos weye', ex tma:

24Inkyma'n xjal najlqe' kyoju' nimaqtnam toj Israel xitjniqe'tl, kjalu: Tjunaltoq Ab'raam, extzun ok te tajawju' tx'otx'; yajwittzunloqe, b'a'npun txqan qb'aj, qo okyel te tajawju' tx'otx', chechi.

25Qu'mtzun, q'manxa kye: lu xtma Qman Dyos: Inche ch'yonkye' chib'j tuk'i'l tchk'el, nche k'ulune' kye witzleb', nche b'yo'n xjale', ¿ma oktzun che okyele' te tajawju' tx'otx' toj kywitze'?

26Majx kyajb'ile' q'oj tuk'i'l kyq'ojb'ile', nkyb'incha'ne' ti'xti' ik'o'nqe' wu'ne', kykyaqilxe' nche b'inchan ajpajil, ¿oktzun che okyele' te tajawju' tx'otx' toj kywitze'?

27Ex q'manxa kye: chi Qman Dyos kjalu: Axxi'x ayinku'ye' chin xel q'mante, ex ikx che b'elb'yo'nju' najliqe' kyoju' nimaqtnam xitjniqe', aye'tzu'n najlqe' toj kojb'il knb'incha'ye' tu'n kyxi' ch'yo'n kyu'n tojk'ul txkup, aye'tzu'n najlqe' kyoj pik ex kyoj jyom che kyimel tu'n yab'il.

28Kjel nq'o'ne' tx'otx' chq'ajlajtl ex xitjnitl, ex kb'el nxitu'ne' tipumal njaw tnima'ntib' tu'n. Che kjel chq'ajlajixju' witz toj Israel; mix-a'lo'tl k'iky'ex kyoj.

29Ajtzun tkyaj chq'ajlajixju' tx'otx' ex xitjnitl wu'ne' tu'n kpaju' il taq'wixqexi'x b'aj kyb'incha'n, k'eleltzun kynik'tz qa ayine' Dyos Manb'aj.

30Nche yolinju' twnaqila ti'ja kyk'etzju' nimaqtapi ex kytzi ja, ex nkyma'n kyxolx: kukytzaje', qo'qe' b'ilteju' tpakb'al saj tma'n Qman Dyos, chechij.

31Ikytzu'n che ulju' ntaname' ex che kb'el qe twitza, kse'nxu' nkyb'incha'n, tu'n kyb'inteju' tyola. Layxtzun txikyb'incha'n. Inxi' kyma'nchaqtl naku'j b'itz te xmoxb'il qya, atzu'n kyanmi yo'lok ti'j pwaq.

32Nokq'o'na kyu'n te jun xjal nb'itzan ti'j b'itz te xmoxb'il qya, tb'anil b'itzana ex b'a'n chinb'ana ti'j arpa. Nkub' kyb'i'n tyola, extzun min nxikyb'incha'n.

33Tkyaqiltzunte' yol lu kjapumel; ex ajtjapun, k'elelkynik' qa ati jun t-sanjelal Dyos kyxol.