Jer 19 - Mam Ostuncalco Bible

Jun techlal tiju' pa'x xar

1Tzaj tma'n Qman Dyos weye': Lq'a'ka jun tx'otx' xar, ex txkonqe'tza junjun tijwnaq teju' tnam ex junjun pale tijwnaqqe'tl.

2Kutextzuntza toju' b'ya' B'en-inom, tu'me'lju' tyestos ttzi tnam, atzuntzu' tx'olb'anxa'ya nyole' kxe'l nma'ne' teya.

3Q'manxa kjalu: E'nimaqkawil toj Juda ex aye'ye' najlqe'ye' toj Jerusalen, kyb'ime' saj tma'n Qman Dyos nimtipumal, janche k'uluna' aj Israel, ikjalu: Ktzajel nq'o'ne' jun xitb'il k'ixk'ojxi'x tib'aju' najb'il lu, majx che b'elchukji kykyaqilju' che b'ilte tqanil lu.

4Qu'n machin kyaj kykolb'e'ne' aj Israel ex matz'okju' najb'il lu kyu'n te jun tx'otx' min ojtzqi'n, makub' kyq'o'n sturak kywitz txqantl dyos toj, ju' min ojtzqi'n kyu'n, kyu'n ojtxi' kyyajilb'en ex kyu'n nimaqkawil toj Juda, ex macheb'aj kub' kyb'yo'n xjal mixti' kyil.

5Expe' mache b'jaw kyb'incha'n q'olb'eb'l tz'e'ysb'il kyeju' kyk'wal te chojb'il k'ok'sb'il twitz B'aal, mya nchaq'ene' kye ex min xinma'ne' kye, mixpeti'xwe' nxim ti'j.

6Qu'mtzun tzul q'ij lay tz'ok q'o'ntlju' najb'il lu: Topet, ex lay tz'oktl te B'ya' B'en-inon, atl tb'iju' k'okyel: B'ya' B'iyb'en. Ayine' Dyos Manb'aj nchin yolin.

7Che b'ajel nq'uchi'ne' kyximju' aj Juda ex aj Jerusalen toju' najb'il lu. Knb'incha'ye' tu'n tkub'kyi'j ex tu'n kykub'yo'n kyu'n kyajq'oj b'iyolqexi'x, ex tu'n kyb'aj ch'yo'n kyu'n k'utz ex kyu'n tojk'ul txkup.

8Naq chq'ajlajtl kjela' nintnam lu wu'ne', te jun najb'il xob'ajilx. Majx che b'ajel xob' kykyaqilju' che ik'el toj ajkyka'yinte majx b'ajni xitj.

9Knb'incha'ye' tu'n tb'ajx kych'yo'n xjal kyk'wal ex kymyal, ex tu'n tb'aj kych'yo'nkyib' junjun te junjuntl tu'n tpaju' mixti'tlte b'a'n kye ajtb'aj txoli'n ti'ju' nintnam kyu'n kyajq'oj b'iyolqexi'x, chi Dyos, chiku'ya kye.

10Tb'ajlentzun tma'na lu kye, kb'el tb'uchi'na xar kywitzku' ichan ate'qe' tuk'i'la,

11ex q'manxa kye: Chi Qman Dyos nimtipumal, qa che b'ajel tb'uchi'n nimaqtnam lu exju' nintnam kse'n ajtkub' txiju'n jun tx'otx' xar, layx b'entl t-xk'ojet. Che okyex kymqu'n xjal kyimni toj tenb'il Topet, tu'n tpaj mixti'tl jatu'n kyokxa' kymqu'n.

12Ikytzun ktb'incha'ju' ti'ju' nintnam kyuk'i'lju' najlqe' toj. Ikx che kjela' nq'o'ne' kse'n Topet. Ayine' Dyos Manb'aj nchin yolin.

13Jni'qe'xju' ja toj Jerusalen, e'tja nimaqkawil toj Juda ex kywi'ju' ja ẍekub'a' q'o'n sturak kywitz kykyaqil che'w ex mache kub' qo'n oyaj b'in kye txqantl dyos, che kjelten tz'il kse'nx Topet, chi Dyos chiku'ya kye, chi Qman Dyos.

14Anjtztzun ti'j Jeremiy Topet, xi' jaxa'chq'o'n tu'n Qman Dyos yolil toj tb'i, kub' we'tzuntz tpenju' ja te k'u'lb'il, xitma'n kye kykyaqilju' xjal toju' tnam:

15Lu xtma Qman Dyos nimtipumal janche k'uluna' aj Israel: ktzajel nq'o'ne' tkyaqil tz'e'ysb'il witzb'aj matxi' nmaye' tib'aju' nintnam lu ex kyib'aj kykyaqilju' najlqe' toj, qu'n makub' kypi'sa'nkyib' tu'n mitxa' kyb'i'nju' nyole', chi Dyos, chi Jeremiy.