2 S 17 - Mam Ostuncalco Bible

Kub't-xitu'n Usay t-xim Ayitopel

1Yajxi'tzuntel xitma'n Aytopel te Ab'salon:

—Q'ontza anb'il tu'n kyjaw nsk'o'ne' junmutx' lajk'al (12,000) xjal, ex tojxju' qonik'an lu chin elixe' knolte Dab'i.

2Ajtzun tkub' sikti ex mixti'tl tipumal, chin okyel tzaqpaje' ti'j ex majx kjel xob' wu'ne', ex che kb'el oq kykyaqilju' xjal ate'qe' tuk'i'l. Noq o'kxku' nimaqkawil kb'el nb'yo'ne',

3k'anjetztzun wanjsa'ntl kyi'ju'ye' kykyaqilju' tnam tuk'i'la, kse'n jun qya akxtoq kymje, nex oq ex nche b'ent jumajtl tuk'i'l tchmil. Naqna' junte' ichan tajb'ila tu'n tkyim; kykyaqiltzunju' xjal che kjelten toj b'anil, chij.

4B'a'n ela'ju' xinb'e'tz lu toj twitz Ab'salon ex toj kywitz kykyaqilu' q'ol nab'l toj Israel.

5Ex tchaq' Ab'salon tu'n ttzaj txko'n Usay ju' arkyit, tu'n tmante jun tyol.

6Atzunj tpon Usay twitz Ab'salon, xitma'n te:

—Lu t-xinb'e'tz Aytopel. ¿Ma b'a'n tu'n qb'inchanteye' mujqa taq'wix? Q'mantz junta tyol qeye', chij.

7Atzunte Usay xittzaq'we'n te:

—Myab'a'nte' t-xinb'e'tz Aytopel ja'lo.

8Kanlixi'xna'ta twitz qa min nxob'te' ttatiya kyuk'i'lju' t-xjal, inxi'xpena'lo che tx'u'jinkye' ja'lo kse'n jun ttxu oso mache el xk'a'yi'nju' tal. Expe' juntel, naq'lite' ttatiya tu'n tq'ojin ex lay kyej tente' kyk'etzju' xjal toju' qonik'an ja'lo.

9In pena'lo newunte' ja'lo toj jun jul mujqa toj juntl najb'il. Tojpena' juntl tu'me'l, naq ajtb'injtz qa matxi' che b'aj junjunju' t-xjala toju' tnejel q'oj, oklo kb'el kyxima'n xjal qa matxi' kub'kyi'ju' ate'qe' tuk'i'la,

10expena'ju' min xob', mujqa aju' majx tx'u'j kse'n jun b'alun; majx che tzajel xob', qu'n b'i'n kyu'n kykyaqil aj Israel qa min xob'te' ttatiya exqe'ju' ate'qe' tuk'i'l.

11Atzu'n nchiwe', b'uyinqe'tza kykyaqil aj Israel tuk'i'la, tzajx Dan twitz nqach toj tb'a'nq'ob'kya'j ponx B'eerseb'a twitz nqach toj tnayajkya'j, qu'n nim txqan kyb'aj kse'n tz'awun ttzi ninnjab', ex aku'ya kb'el nej kywitz toj q'oj.

12Qo okyil tzaqpajtzuntz q'oj ti'ju' tmana jaxjaku' ta'ya'. Qo' pomel tilj kyib'aj kse'n ta'l che'w ajtkub' twitz tx'otx', kb'ajel qu'n kyuk'i'lxi' t-xjal ex mix-a'lo'tlte kyej anq'in.

13Expe' qama tz'okx ewal toj jun nintnam, qkyaqilx aj Israel kxe'l qiq'i'n aqwil ex che b'ajxe'l qtoli'n ab'j ti'jileju' nintnam lu tu'n tpon qxon tzmax toj xaq, chij.

14Kub'xi'xju' t-xinb'e'tz Usay toj twitz Ab'salon ex toj kywitz kykyaqil aj Israel kyetwitzju' te Aytopel. (Qu'n aku' Qman Dyos b'inchante tu'n tkub' xitju' t-xinb'e'tz Aytopel, tu'n ttzaj tilj taq'wixil tib'aj Ab'salon.)

15Yajxi'tzuntel xitma'n Usay kye pale Sadok ex Ab'yatar ti'ju' nab'l xitq'o'n Aytopel te Ab'salon ex kyeju' tijwnaq kyxol aj Israel, ex ti'jute nab'l xitq'o'n,

16tu'nwtzunlo txi' kyma'n lwiyxi'x te Dab'i, tu'n tik'x toj jun plajtl teju' nin a' Jordan, ex tu'n lalun kub'ten toj chq'ajlaj toju' qonik'an lu, tu'n lalun kub' b'yo'n exqe' t-xjal.

17Jun qya majen xi' q'malte kye Jonatan ex Ayimaas, qu'n atoqtzu' ate'qe' toj En-rokel, ex ch'uẍtoq kye tu'n tkub' kyyek'u'nkyib' toj nintnam, atzunj kyb'inte lwiy exi' q'malte te Dab'i.

18Ex e'ilwi tu'n jun q'a, xi'tzuntz q'malte te Ab'salon. Exi'tzuntz ojqel ex e'pon tja jun ichan najli nqayin tk'etz B'awrim, ex eku'x ewal toj jun xoch twi' pe'n.

19Atzu'n t-xu'jilju' ichan lu kub' tq'o'n jun tjpelu' xoch, ex jax tchto'n triy triyi'ntl tib'aj. Mix-a'lo'tzunte ka'yinte ja'lu.

20Tetzunj kyponju' t-xjal Ab'salon, xikyqani'n teju' qya:

—¿Ja ta'qe' Aymaas ex Jonatan?, chechij.

Xi'tzun ttzaq'we'n qya kye:

—Mache ik' tza'lu, ex xi'ẍe'xa' tu'me'l nin a', chij.

Xi'tzun kyljo'n t-xjal Ab'salon kyb'e jyolkye, atzunj mixti'x e'knet kyu'n, anjkyi'j Jerusalen.

21Kyanjlenxi'tzun, e'jatz Aymaas ex Jonatan toju' xoch, exi'tzuntz ojqel q'malte teju' nimaqkawil Dab'i; xikyma'n te tu'n tik'x lwiy jlaj a', qu'n matxi'toq txitq'o'n Aytopel kynab'l tu'n kyq'ojin kyi'j.

22Lwiyxi'xtzun e'jawe' Dab'i kyuk'i'l kykyaqilju' t-xjal, ex e'jlajin toj nin a' Jordan. Kykyaqilx matxitoq che jlajin tej qsqix te juntl q'ij.

23Tetzunj min xib'incha'n t-xinb'e'tz Aytopel, jaw tq'o'n tiqb'ilu' tb'ur, xi'tzuntz tja toju' ttanam ja itz'jna', atzunj kyb'ajlen tnik'u'n toj tja, jaw tjtz'o'ntib'. Ikytzu'n kyima' ex ku'x mqu'n toju' muqb'il te tman.

Pon Dab'i Maanaym

24Pon Dab'i toj Maanaym tojxi'xu' kmuj tej tjlajin Ab'salon toju' nin a' Jordan kyuk'i'l kykyaqil aj Israel.

25Ojetoq tz'oktq'o'n Ab'salon Amasa te nejenel kyeju' t-xjal te q'oj, te t-xel Joab'. Ate Amasa tk'wal jun aj Ismael, Itra tb'i, ojetoq kub' kyk'le'nkyib' tuk'i'l Ab'ikayl, tmyal Naas ex titz'in Seruya, ttxu Joab'.

26Kub'ten Ab'salon kyuk'i'l aj Israel toju' tx'otx' Kalaad,

27tetzunj tpon Dab'i toj Maanaym, etz k'ulb'aj kyu'n Sob'i, tk'wal Naas, aj Rab'a toj Amon; ex Makyir, tk'wal Amyel, aj Lodeb'ar; ex B'arsilay, aj Rokelim toj Kalaad.

28Pon kyiq'i'n tkuẍb'il, tk'o'ẍ, e' tx'otx' k'wil, ex ikx triy, seb'ad, arin, twitz awal wensi'n, chinaq', prijol,

29ta'lkab', kykyesil wakx ex rit, tu'n kywan Dab'i kyuk'i'lju' xjal lepchqe'toq ti'j; qu'n kub' kyxima'n qa matxi'toq che sikti, ex qa nche q'aq'an ex nche k'ok'on, qu'n tzajniqe' toj chq'ajlaj.