1Nman Dyos, mqom kywitzju'ya wajq'oje;
q'ojina kyuk'i'lju' kyajb'il tu'n kyq'ojin wi'je'.
2Q'intzju'ya tkolb'ila ex kuttzaja onilweye';
3q'intza tch'uta ex we'ku'ya kywitzju' ljol weye';
¡q'mantza qa aya klol weye'!
4Che kub'xwit oq tu'n kych'ixaw
ju' kyajb'il tu'n nkub' kyb'yo'ne';
che kub'xwit oq tu'n kych'ixaw
ju' kyajb'il tu'n kyb'inchante jun taq'wixil wi'je';
5¡che okxwit kse'n ttxa triy nche'x iqi'n tu'n kyq'iq',
ajkyex xla'ja'n tu'n tanjl Qman Dyos!
6¡Tz'okxwitju' kyb'e qxopin ex ẍb'ilun
ajkyb'jik' xla'ja'n tu'n tanjl Qman Dyos!
7Mixti' wile' kye, ex makub' kyq'o'n jun xpatxab' weye';
mixti' xnb'inchaye' kye, ex ma ku'x kyb'incha'n jun jul tu'n nku'x tz'aqe' toj.
8¡Tzajxwit jun taq'wixil kyxol!
¡Che kub'xwit tz'aq tojxju' kyxpatxab'!
¡Kub'xwit kyk'ulb'a'n jun ti'xti' myab'a'n!
9Chin tzalajeltzuntze' ti'j Qman Dyos,
qu'n matxi'toq chin klete' tu'n.
10Knma'ye' tu'n tkyaqil nk'u'je':
¿Alxi'xkye jun kse'n aya Nman Dyos?
Inche tklo'nju'ya prow exqe' ati nojqelan kye
toj kyq'ob'ju' kuwqe' kyekywitz,
ex kyeju' nche elq'an kyi'j, nchiky'ye'.
11Inkyma'n b'inchal myab'a'n chajyolil wi'je'
ex nchin kypoqo'ne' kyi'j ti'xti' min kanli nwitze'.
12Taq'wix xkyb'incha weye' tu'nju' b'a'n xnb'inchaye' kye,
intzaj txqan nb'ise' tu'n tpaj ja'lu;
13qu'n tej ntoq che kub' yab'ti
tzaj nb'ise' kyi'j,
intoq oknq'o'n wi'je' te b'is ex intoq chin mewayine',
ex mixtoqti' nchin q'jene' tu'n nna'n Dyose' toj wanmiye'.
14Intoq chin numje' nchin b'ete' tu'n b'is,
naku'j makyim ntxuye',
jun wuk'i'le' mujqa jun ntzikku'ye'.
15Tetzu'n ẍinkub' tz'aqe',
kykyaqil ẍeb'jaw tze'n wi'je';
naku'j najchaq xjal qine' ex min ojtzqi'nqine' kye,
ex min nche qen tu'n kywulin wi'je'.
16Machin b'ajkyyajla'ne' ex machin b'ajkxmayine',
inxi'x tx'u'jin kywitz ajkytzaj ka'yin weye'.
17Nman Dyos, ¿jte'lo q'ijtl naq kka'yila ti'j ja'lu?
¡Klom ch'iwe' nchwinqlale',
kyeju' b'alun nche' tzanunk wi'je' lu!
18Chin q'olwe' chjonte teya kywitzju' ttanama nim kyajlal;
¡kjawil wajwali'na kywitzju' tnam xjal!
19Lalun che b'jaw tzalaju' wajq'oje wi'je';
lalun taq'a anb'il tu'n kyxmayin wi'je', mixti'we' wil kye.
20Qu'n min nkyjyo'n kye'lu nak'b'il,
xi'pe' nkyximana' tu'n kyb'inchan jun ti'xti' taq'wix
kyi'ju' xjal me'sqe' toju' tnam;
21inxi' kyk'ab'u'n toj kytzi wi'je', ex inkyma'n ¡ja ja'!
¡Ka'yinxtzuna la, matxi' qila tu'n qwitze'! chechij.
22¡Matilta Taye!
¡Lalun noqxwit tzaj b'ina!
¡Lalun tz'el tpa'ntib'a wi'je'!
23Iq'i'nktz tib'a, Nman Dyos,
b'inchama tu'me'l b'a'n weye', yolina wi'je'.
24Chin tq'onka toj xjel, Nman Dyos,
qu'n tz'aqli ta.
¡Tu'n lalun che b'jaw tze'n wi'je'!
25Tu'n lalun kyma ex tu'n lan kub' kyxima'n:
¡Atzun qajb'ilju'ye' lu!
¡Majx matxi' kub'o'lj qu'ne'! chechiwt.
26Tz'elxwit kych'ixaw
ju' nche tzalaj tu'n nkub' b'o'lje';
tz'elxwit kych'ixaw b'a'nxi'x
ju' nkyxima'n qa nimxi'x kynab'l nwitze'.
27Aye'tzu'n kyajb'il tu'n nkanb'ane'
che tzalajxwit ex che ẍch'inxwit tu'n kytzalajb'il;
ex tu'n kmante kukxju':
¡Nim te Qman Dyos toklen,
ex a ttzalajb'ilju' tu'n tten tmajen b'a'n! chechiku'.
28Kchin yolile' ti'ju' tz'aqli ntb'incha'na;
¡kb'ajel q'ij wu'ne' tu'n nb'itzane' teya!, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
