1 S CHIK'B'AB'L - Mam Ostuncalco Bible
CHIK'B'AB'LAte Samwel ok te mankb'il ajkawil ex tnejel t-sanjelal Dyos nim toklen toj Israel. Aju' u'j lu tok tb'i Tnejel Tuj Samwel, nyolin ti'ju' tej tb'aju' tq'ijlalil mixtoqti' jun kawil toj Israel ex ti'ju' tq'ijlalil tej tok jun nimaqkawil tib'aj tkyaqilju' tnam Israel, sk'o'n tu'n Qman Dyos ex xjansanjtz tu'n jun t-sanjelal Dyos.Nyolinxi'xju' u'j lu kyi'j oxe' xjal nimaq kyoklen, aye': Samwel, Sawul ex Dab'i. Atzu' nyolina' ti'j Samwel kyoju' tnej jun tzmax toj wuq (caps. 1-7), tzajx ti'ju' titz'jlen ex ntchik'b'a'n kyi'ju' tb'inchate nejenel kyxol aj Israel. Aye'tzu'n tnejel jte' ab'q'i ttzyetlen tkawin Sawul atzu' ntma'na' kyoju' tnej wajxaq tzmax toj o'lajoj (caps. 8-15). Atzu'n kyoju' tnej qaqlajoj tzmax toj junaq lajoj (caps. 16-30) nyolin ti'ju' ttzajlen numju' tkawb'il Sawul ex yajb'il tzaj toju' tchwinqlal tu'nju' txqan tb'inchb'aj tej tokten yajulte Dab'i ex tajb'iltoq tu'n tkub' tb'yo'n. Tu'ntzun tpaju' ok Dab'i te jun q'ojil toj k'ul, expe' k'onil kye pilistey toj q'oj. Atzu'n toju' mankb'il tnej nyolin ti'ju' kykamik Sawul kyuk'i'lju' tk'wal toju' q'oj ok toj Jilb'oa.Tetzunj tok jun nimaqkawil tib'aju' tnam ntyek'u'n toju' u'j lu qa tzaj ttzaq'we'n Dyos kyqanb'e'tzu' tnam, ex min eltiq'i'ntib' Dyos te nimaqkawil ku'xi'x kyib'aj aj Israel, ju' ati toklen kyib'aju' kawil ex ati tu'n t-xib'i'n toj tkyaqil tkawb'il kyu'n tnam. A ntma'n Dyos toj tkyaqilju' Xjan Tu'jil, qama kynima xjalju' Qman Dyos kukxju', b'a'n che anq'ila' ex nche jawb'ent, qatzun qa min, ntzaj yajb'il kyib'aj.
