Sal 8 - Mam Ostuncalco Bible

Tajwalil Dyos exu' toklen xjal

1Nman Dyos, nimaqkawil qib'aje'

¡tb'anilxi'xju' tb'iya tib'aj tkyaqil twitz tx'otx'!,

¡nimxi'x tajwalila tib'ajxi' kya'j!

2Inpe' xikyb'itza'n tal k'wal exqe' tal ne'ẍ.

Jawtb'incha'na jun ja kuwsa'n

tu'n tkleta kyeju' tajq'oja,

tu'n tjpet kytziju' nche jawmiltz'uj ti'ja exqe' ajq'oj.

3Ajt-xi nka'yi'ne' kya'j kub' tb'incha'na,

exju' xjaw exqe' che'w e'kub' tq'o'na twitz,

4inkub' nxima'ne':

¿Titi' toklenju' xjal?

¿Titi'xi'xtzu'n toklenju' wnaq,

tu'nju' ntzaj tna'na ex nb'ajx tk'u'ja ti'j?

5Kub' tb'incha'na naq ch'intlmi kse'n jun anjl,

okttxoli'na ti'j tu'n oklenj,

6kub' tq'o'na tu'n tkawin tib'aju' tb'inchb'ena,

xitq'o'na toklen tib'aj tkyaqil:

7kyib'aj rit ex wakx,

kyib'aj tojk'ul txkup,

8kyib'aj pich' nche' lipan twitz kya'j,

kyib'aj kyiẍ toj ninnjab',

¡ex kyib'aj tkyaqilju' ati toj ninnjab'!

9Nman Dyos, aya nkawin qib'aje',

¡tb'anilxi'xju' tb'iya tib'aj tkyaqil twitz tx'otx'! chiju' b'itzal.