1Nman Dyos ex klol weye',
inchin qanin o'nb'ile' teya q'ijtl ex qonik'an,
2¡k'momju'ya nna'j Dyose'!,
¡ex b'intzju'ya nkub'sb'ile'!
3Nim txqan taq'wix matxi' kub' tz'aq wib'aje',
ttzi jul te kamik ta'qine';
4¡nchin okq'o'ntle' toj kyajlal kyimni,
qu'n matxi' chin kyaje' mixti'tl wipumale'!
5Matxi' chin kyej kolb'ine' kyxol kyimni;
ikqinju'ye' kse'nqe' matxi' che b'ajkyim toj q'oj
ex matxi' che b'ajku'x mqu'n;
kse'nqe'ju' oje che kyej ttzaqpi'na
ex matxi' tzik' kyna'l tu'na.
6Matxi' chin ku'x tq'o'na tzmax t-xexi' jul,
kyoj qxopin ex nin kyxe.
7Matxi' tzaj tb'ajsa'nju'ya ttx'u'jila wib'aje',
¡matxi' chin ku'x tmulq'i'na tjaq' ttolob' a'!
8Matb'inchaya tu'n nkyaj kykolb'e'ne' wamiwe';
machin nok tq'o'na taq'wixi'x kye.
¡Ikyqinju'ye' kse'n jun pres layx tzaqpaj!
9Tu'nju' nxi'x chin oq'e' xi'nkyeje' moẍ.
¡Tkyaqil q'ij nchin kub'sane' teya Nman Dyos,
ex inche jaw wiq'i'nju'ye' nq'ob'e' twitza!
10¿Ma oktzun b'entel tb'inchanteya b'a'nq'ob'aj kyi'ju' kyimqe'tl?
¿Ma oktzun b'entel kyq'on chjonteju' kyimni teya?
11¿Ma oktzun b'entel tpakb'etju' tyola ax ex tk'u'jlalila
toj muqb'il ex toj tkawb'il kamik?
12¿Ma ktzunlo k'elel tnik' jun ti'ju' t-xtalb'ila ex tb'inchb'ena tb'anilxi'x
toju' tqxopinil kamik, jannik'a' kyna'l tkyaqil?
13Ayintzunwe' Nman Dyos, teya nchin kub'sana'ye';
inchin kub'sane' teya toj nna'j Dyose' te prim.
14¿Titiqu'n nchin ela' tik'una, Nman Dyos?
¿Titiqu'n nkub'a' tewantib'a nwitze'?
15Ttzajlenx toj nku'xumale'
matxi' chin b'isunxi'ye' ex ch'inaqx min chin kyimaye';
matxi' tzik'x wu'ne' toju' yajb'il saj tq'o'na wib'aje'.
ex layx wipatle'.
16Matxi' tzik'ju' ttx'u'jila xob'ajilx wib'aje';
ex matxi' kub'wi'je' tu'n;
17tkyaqil kmuj txoli'n wi'je' tu'n,
kse'n tnimal a'.
18Mache b'je'l tpa'nju'ya wamiwe' ex wuk'i'le' wi'je',
noqx qlolj ati wuk'i'le' ja'lo, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
