Ez 11 - Mam Ostuncalco Bible

Tz'e'ysb'il twitz Jerusalen

1Injaw tiq'i'ne' tipumal Dyos ex nxitiq'i'ne' toju' plaj tjawetzq'ij te tja Qman Dyos. Ate'toq junaqjo' (25) ichan ttzija. Elnnik'e' te Jaasaniy tk'wal Asur, ex Pelatiy tk'wal B'enayiy, nejenelqe' te tnam, ate'toq kyxol.

2Ex tzaj tma'n Qman Dyos weye':

Aye'tzun b'inchaltten b'yojxjali'n ja'lu ex nkynk'u'nti'j tu'n kyb'inchante myab'a'n toju' nintnam lu.

3Inkyma'n: Tzqeku' kyb'jaw qb'incha'ntle' ja. Qokletelqe' tzalu, kse'n chib'j toj k'wil, chechij.

4Qu'mtzun q'manxa kye toj nb'iye', chi Dyos.

5Ulju' t-xew Qman Dyos wib'aje', ex tchaq' tu'n txinma'ne' kjalu:

A ntma'n Qman Dyos ja'lu: ma atzun nkyxima'nju'ye' lu, aj Israel. Wojtzqi'nweye' kyxime'.

6Nimxi'x b'yoj wnaqil matxi' b'aj kyb'incha'ne' toju' nintnam lu, matxi'xi'x b'aj noj kyoju' xky'ichb'e kyu'n kyimni kyu'ne'.

7Qu'mtzun kxe'l nma'ne' kyeye' axxi'x, ayine' Dyos Manb'aj: ikyk'okyela' Jerusalen kse'n jun k'wil, mitzun yaqe'kye' chib'j toj, aye'kye' kyimni oje che b'aj kub' kyb'yo'ne', che jawetz wiq'i'nkye' toju' k'wil.

8¿Ma nche xob'e' te q'oj? Tzulwiq'i'n q'oje' kyib'aje', ayine' Dyos Manb'aj nchin yolin.

9Ktzajel nq'o'ne' tz'e'ysb'il kywitze': che elexwiq'ine' tzalu ex che kxe'lnq'o'ne' toj kyq'ob' xjal min ojtzqi'nqe' kyu'ne'.

10Che b'ajkyimele' tu'n k'uẍtx'e'nb'il. Che okyele' toj xjel wu'ne' kyoj tnqachil Israel, k'eleltzun kynik'tze' qa ayine' Dyos Manb'aj.

11Lay tz'ajb'enju' nintnam te k'wil kyeye', ex myaye'kye' che okyel te chib'j. Che okyelkye' toj xjel wu'ne' kyoj tnaqachal Israel,

12k'eleltzun kynik'tze' qa ayine' Dyos Manb'aj. Na'mx kyanq'inkye' kse'nxju' nmaye' kyeye' ex na'mx kyanq'ine' kyoju' nkawb'ile', xi'matxi' che'xa' lpeye' ti'ju' nkyb'incha'n nimaqtnam kyi'jileye', chiku'ya, chi Dyos.

13Akxtoqtzun nchin yoline' kye toj tb'i Qman Dyos, kub' tz'aq Pelatiy, tk'wal B'enayiy, majx kyim. Inkub' mejeye' majx ku'pun nplaje' twitz tx'otx', injaw ẍch'ine' kuw ex nmaye': ¡Taye! ¿Makb'el tb'ajsa'na jte'tl aj Israel itz'qe'x? nchije'.

Tzaj tma'n Qman Dyos tqanil jun ak'a'j yol

14Tzaj yolin Qman Dyos weye', ex tma:

15Inche yolinju' xjal najlqe' toj Jerusalen kyi'ju' aj Israel, ju' twnaqila, inkyma'n: ¡Najchaq ta'qe'kye'lu ti'j Qman Dyos! Ayo'tzunqe', matzaj tq'o'n tx'otx' qe tu'n qok te tajaw, chechij.

16Qu'mtzun q'manxa kye: Lu ntma'n Dyos kjalu: Ayine' ẍinetz q'inkye toj kytx'otx', ex mache'x nsputi'ne' kyxol nimaqtnam, kyoj tx'otx' min ojtzqi'n kyu'n, ex naq te jte'x tq'ijlalil. Ayinxe' chin okyel te jun ja xjan kye kyoju' tnam jachaq ẍe'xa'.

17Q'manxa kye: A ntma'n Dyos ja'lu: K'anjetz kyi'j wu'ne' kyoju' tx'otx' ex nimaqtnam lu ja matxi' che'xa' nsputi'ne', che tzajel nb'u'yi'ntle' ex kxe'l nq'o'ntle' tx'otx' Israel kye.

18Che pomil junmajtl toju' kytanam ex kb'el kynajsa'n tkyaqilju' ntoq kyb'incha'n ik'b'ajilx ex taq'wixqe'xi'x.

19K'elel wiq'i'ne' kyanmi kuwxi'x kse'n ab'j, kxe'l nq'o'ne' jun kyanmi ak'a'j ex jun kyxew ak'a'j.

20Che anq'iltzuntz kse'nqe'x nkawb'ile' ex nnuk'b'ile', ex che kxe'l kyb'incha'n. Che okyel te ntaname' ex che ajb'el weye'.

21Aye'tzunkye' nche anq'in toju' myab'a'n ex ik'b'ajil taq'wixi'x lu, che okyel toj xjel wu'ne' ti'ju' kyb'inchb'aj. Ayine' Dyos Manb'aj nchin yolin, chi Dyos.

El lq'e tajwalil Qman Dyos ti'j Jerusalen

22-23E'jaw lipanju' kyerb'in, kyuk'i'lxi' kytulil. Jawtzu'n tajwalil Dyos janche ajb'ena' aj Israel, ju' atitoq kyib'aj ex el lq'e ti'ju' nintnam, xi'pona'ten tib'aju' witz ati toj tjawetzq'ij te nintnam.

24Njawtzun tiq'i'ne' tipumal Dyos ex anjtlwi'je' tu'n toj B'ab'ilon, ja ta'qe' txqantl b'je'xniq'i'nqe' toju' tx'otx'. B'aj ju'lu toj jun naku'j witzik' tzaj tyek'u'n t-xew Dyos weye'. Tb'ajlenxi'tzun ja'lu kub' naju' naku'j witzik',

25Ex xinma'ne' kyeju' b'je'xniqe' toj kytx'otx', tkyaqilju' matxitoq tzaj tyek'u'n Qman Dyos weye'.