Lv 8 - Mam Ostuncalco Bible

Tej kyok Aaron kyuk'i'lju' tk'wal toj kyoklen(Ex 29.1-37)

1Tzaj tma'n Qman Dyos te Moyses kjalu:

2Q'inqe'tza Aaron kyuk'i'lju' tk'wal, exju' kyxb'alun te pale, exju' aseyt te xjansb'il, exju' qpoj tman wakx kb'el q'et te chojb'il tu'n tpaj il, exqe' kab'e' rit exju' tal chi'l te wab'j mixti' ttx'amal,

3ex b'uyinqe'tza tnam ttziju' Ja te Mujb'ab'ltib'il, chij.

4Xitb'incha'n Moyses tma Qman Dyos te, ex kykyaqilju' xjal b'aj kyb'u'yi'n kyib' ttziju' Ja te Mujb'ab'ltib'il.

5Xi'tzun tma'n Moysestz kye kykyaqil aj Israel: A matxi' tchaq' Qman Dyos ja'lu tu'n tb'inchet, chij.

6E'tzajtzun tk'le'n Moyses Aaron kyuk'i'lju' tk'wal ex eb'aj tichi'n.

7Kyb'ajlenxi'tzun ichin, oktq'o'n t-xb'alun Aaron ku'j ex oktq'o'n tk'alb'il, ex oktq'o'n pinpa't ti'jxi'; oktzun tq'o'n t-ẍa'ytz ex oktk'lo'n tu'njxju' taq'e'l.

8Ex oktq'o'nju' tal xb'alun ttzitk'u'j, ex e'oktq'o'nju' ab'j Urim, ex Tumin ti'j.

9Ex jax tq'o'nju' ẍipb'il twi' ex oktq'o'n plak q'anpwaq ti'j toju' plaj twitzxi' tu'n tok toklen te pale, kse'nxju' tchaq' Qman Dyos.

10Tzajtzun tiq'i'n Moyses aseyt te xjanb'il ex jax tqo'n tib'aju' ja xjan ex kyib'aj kykyaqilju' ate' toj, iktzu'n kub'a' t-xjansa'na'.

11Tu'nxtzunju' aseyt lu b'aj twitxk'a'n wuq maj ti'jile q'olb'eb'l ex kub' tqo'n tib'aj ex kyib'aju' aq'unb'il inche ajb'en te, ex tib'aj tkb'elju' a' exju' tq'uqlil tu'n kxjanset.

12Jaxtzun tqo'n Moyses aseyt te xjansb'il toj twi' Aaron tu'n t-xjanset te pale.

13Ex e'tzaj tiq'i'n tk'wal Aaron, ex oktq'o'nju' kyxb'alun ku'j, oktk'lo'nju' kyk'alb'il ex jax tq'o'nju' ẍipb'il kywi' kse'nxju' ojetoq tchaq' Qman Dyos.

14Xi'tzun tma'n Moysestz tu'n ttzaj q'i'nju' qpoj tman wakx nkub' q'et te chojb'il tu'n tpaj il, kub'tzun kyq'o'n Aaron kyq'ob' kyuk'i'lju' tk'wal tib'aj twi'ju' qpoj tman wakx.

15Kub'tzun tb'yo'n Moyses qpoj tman wakx ex jawtiq'i'n chik' kyu'n twitq'ob' ex okt-sun kyi'j tuk'a q'olb'eb'l ti'jile tu'n t-xjanset, atzunju' chik' kyej sob'rin kub' tqo'n t-xe q'olb'eb'l. Iktzu'n xjanseta' q'olb'eb'l tu'n tk'metju' najsb'il il tib'aj.

16Yajxi'tzuntl tzaj tiq'i'n Moyses tkyaqilju' unt tok kyi'ju' t-xqintxa, exju' unt tok kyi'ju' twab'l exqe'ju' kab'e' tchinaq' kyuk'i'lju' ky-until, kub' ttz'e'ysa'ntzuntz tkyaqil tib'aj q'olb'eb'l;

17atzu'n jni'tlju' wakx, ttz'umal, tchib'jil ex ttxa, oktq'o'n kyq'aq'al ti'jxi'ju' najb'il, kse'nxju' tchaq' Qman Dyos te.

18Xitma'n Moyses tu'n ttzaj iq'i'n tman rit inkub' q'et te chojb'il k'ok'sb'il, ex kub' kyq'o'n Aaron kyq'ob' kyuk'i'lju' tk'wal tib'aj twi'.

19Kub' tb'yo'ntzun Moysestz ex kub' tqo'nju' tchk'el tib'aj q'olb'eb'l ex ti'jile,

20kub' tpẍu'nju' rit toj tx'naji'n, ex kub' ttz'e'ysa'n tuk'i'lxi'ju' twi' exju' unt;

21ex eb'aj ttxjo'nju' t-xqintxa exqe'ju' tkux, kub' ttz'e'ysa'ntzuntz tkyaqil tib'aj q'olb'eb'l te jun chojb'il k'ok'sb'il te jun oyaj tb'anil tk'ok'jal te Qman Dyos, kse'nxju' tchaq' Qman Dyos te.

22Ex tchaq' Moyses tu'n ttzaj iq'i'nju' juntl rit, ju' tu'n tb'inchet te xjansb'il, ex kub' kyq'o'n Aaron kyq'ob' kyuk'i'lju' tk'wal tib'aj twi'.

23Kub' tb'yo'ntzun Moysestz, jawtiq'i'n ch'i'n tchk'elju' alu'mj ex okt-sun tjaq' t-ẍkyin Aaron toj tb'a'nq'ob', ex ti'ju' tman twitq'ob' teju' tb'anq'ob' ex ti'ju' tman twitqan toj tb'a'nq'ob'.

24Ex e'tzaj tlaq'b'a'n tk'wal Aaron, ex ikx okt-sun chik' tjaq' kyẍkyin toj kyb'anq'ob', ex ti'j tman twikyq'ob' toj kyb'anq'ob' ex ti'j tman twikyqan toj kyb'anq'ob'; atzunju' jni'l chik' kub' tqo'n tib'aj q'olb'eb'l ex ti'jile.

25Ex e'tzaj tiq'i'n Moyses unt, tje, tkyaqil t-untilju' t-xqintxa, t-untilju' twab'l, exqe' kab'e' tchinaq' tuk'i'lju' ky-until, exju' tkux toj tb'a'nq'ob'.

26Jatztzun tiq'i'n Moyses jun muqin mixti' ttx'amal, jun muqin xyuq'i'n tuk'i'l aseyt ex jun tal xwok' muqin toju' tal chi'l jatku'xa' wab'j mixti' ttx'amal, ju' nkub' q'et twitz Qman Dyos, ex e'kub'tq'o'n tk'etzju' unt exju' tkux alu'mj te tb'anq'ob';

27kub' tq'o'ntzuntz tkyaqil toj tq'ob' Aaron ex toj kyq'ob'ju' tk'wal tu'n kyb'inchanteju' tu'me'l tu'n kyq'onte oyaj twitz Qman Dyos.

28Xi'tzun Moysestz k'molte tkyaqil ja'lu kye, ex kub' ttz'e'ysa'n tib'aj q'olb'eb'l junx tuk'i'l chojb'il k'ok'sb'il, te jun oyaj te xjansb'il tb'anil tk'ok'jal: jun oyaj tz'e'ysa'n te ninb'ilte Qman Dyos.

29Yajxi'tzuntl tzaj tiq'i'n Moyses ttzitk'u'ju' rit ex tb'inchaju' tu'me'l tu'n tq'onte twitz Qman Dyos. Atzun kyaju' te Moyses ti'ju' rit te xjansb'il, kse'nxju' ojetoq tchaq' Qman Dyos te.

30Ex tzaj tiq'i'n Moyses ch'i'n aseyt te xjansb'il ex ch'i'n chik' ju' ati tib'aj q'olb'eb'l, kub' twitxk'a'ntzuntz tib'aj Aaron, ex kyib'aju' tk'wal, ex kyib'aju' kyxb'alun te pale. Iktzu'n e txjansaya' Aaron kyuk'i'lju' tk'wal, exju' kyi'j te pale.

31Xitma'ntzun Moysestz te Aaron ex kyeju' tk'wal: kytzq'ajsanku'xe' chib'j ttziju' Ja te Mujb'ab'ltib'il, ex axtzu' kych'yonxa'ye' tuk'i'lju' wab'j atku'x toju' tal chi'l te xjansb'il, kse'nxju' tzaj tma'n Qman Dyos weye' qa aye'ye' kyuk'i'lju' tk'wala che xe'lch'yonteju' chib'j lu.

32Qatzun min xb'aju' chib'j exu' wab'j, kypatinku'ye.

33Ex lalun che el lq'eye' ttziju' Ja te Mujb'ab'ltib'il toju' wuq q'ij, qu'n a tq'ijlalilju' te xjansb'ilkyeye'.

34Oje tchaq' Qman Dyos tu'me'l aj t-xi' q'etju' chojb'il tu'n tnajsetju' il makyb'inchaye'; ati tu'n tb'inchet kse'n xb'inchet ja'lo.

35Qu'mtzun ati tu'n kykyajtene' q'ijl ex qonik'an ttziju' Ja te Mujb'ab'ltib'il toju' wuq q'ij. Kynimanxju'ye' tchaq'b'il Qman Dyos, laytzun che kyimtze', qu'n a chaq'b'ilju' tzaj q'o'n weye', chij.

36Kyb'inchatzu'n Aaron kyuk'i'lju' tk'wal tkyaqilju' tchaq' Qman Dyos te Moyses.