1Tzalajb'ilte' kyeju' xjal min nche b'inchan il
ex nkyb'incha'n kse'nx t-xnaq'tzb'il Qman Dyos.
2Tzalajb'ilte' kyeju' nche japun tchaq'b'il Qman Dyos kyu'n
ex nche jyon ti'j tu'n tkyaqil kyk'u'j,
3aye' min nche b'inchan myab'a'n,
aye' nche b'et toju' tb'eyil Dyos.
4Tzaj tab'tzi'nxi'xa
tu'n tjapunju' tchaq'b'ila ilxi'xti'j.
5¡Chin b'et-xwite' b'a'n!
tu'n kyxinnima'ne' tkawb'ila.
6Lay chin ch'ixwiye'
ajkyxi nnima'ne' tkyaqilju' tchaq'b'ila.
7Chin b'itzale' teya tu'n tkyaqil nk'u'je'
ajkykaneju' tchaq'b'ila tz'aqliqe'xi'x toj nwitze'.
8¡Wajb'ile' tu'n kyjapun tkawb'ila wu'ne'!
¡Lalun chin kyej tkolb'e'nch'i'na!
Tkab'9¿Titi' ktb'incha'ju' ku'xun tu'n lalun b'inchan il?
¡Tu'n tanq'in kse'nxju' ntma'n tyola!
10In njyo'na tu'n tkyaqil wanmiye';
lalun taja tu'n tel npa'nwib'e' kyi'ju' tchaq'b'ila.
11Matxi' che kyej tenju' tyola toj wanmiye'
tu'ntzun lalun chin b'inchan ile' twitza.
12¡Nimanjtzxwita, Nman Dyos!
¡Xnaq'tzanqe'tza tkawb'ila weye'!
13Kxe'l npakb'a'ne'
tkyaqilju' tchaq'b'ila intma'na.
14Inxi'x chin tzalaje' ajnxilpeye' kyi'ju' tchaq'b'ila,
kyetwitz kyi'j q'inumal.
15Chin ximale' kyi'ju' tnuk'b'ila
ex k'okyil nxon nk'u'je' ti'ju' tb'eya.
16Chin tzalajele' kyi'ju' tkawb'ila
ex lay tzik'tna'lju' tyola wu'ne'.
Toxi'n17¡Q'ontza nchwinqlale' ayine' tmajena!
¡Kxe'l nnima'nwe' tyola!
18Jqomqe'ju'ya nwitze'
tu'n nka'yinteye' kywitzlalilju' tchaq'b'ila tb'anilqexi'x.
19Naq ajb'etunqine' twitzu' tx'otx' lu;
lalun che kub'tewa'na tchaq'b'ila nwitze'.
20Xi' nkub'aje' atl junjun kmuj,
tu'n nchin elb'aje' tu'n wojtzqinteye' tchaq'b'ila.
21Inche ttzak'u'nju'ya txko'n toj kywi' nkynima'n kyib',
inel kypa'n kyib' kyi'ju' tchaq'b'ila.
22Chin tkloma teju' kyq'oj ex kyasb'il,
qu'n matxi' che'x nb'i'nju'ye' tchaq'b'ila.
23Maskye nkyxima'n xjal nimaq kyoklen tu'n kyb'inchan taq'wix wi'je',
chin ximalwe' kyi'ju' tkawb'ila ayine' tmajena.
24Inchin tzalaje' kyu'nju' tchaq'b'ila;
qu'n nkyq'o'n nnab'le'.
Tkyaji'n25Naqch'inxtl nkyime';
¡Chin twab'a'nktza kse'nxju' yol tzaj ttziya'na!
26Matxi' txinma'ne' teya se'n nchin b'eta'ye', ex matxi' chin tzaj ttzaq'we'na.
¡Xnaq'tzanqe'tzju'ya tkawb'ila weye'!
27Q'ontza nnab'le' tu'n nxilpeye' kyi'ju' tchaq'b'ila,
wajb'ile' tu'n nximane' kyi'ju' tb'inchb'ena tb'anilqexi'x.
28Matxi'xi'x ku'xch'yon ti'jnk'u'je' tu'n k'ixk'oj;
¡q'uqb'ama nk'u'je', kse'nxju' tzaj ttziya'na!
29Chin tpa'mila ti'ju' b'e te chajyolil
ex yek'u'nqe'tza tchaq'b'ila weye' tu'n tk'u'jlalila.
30Matxi' kub' nxima'ne' tu'n nb'i'ne' teya
inchin laqje' kyi'ju' tchaq'b'ila.
31Nman Dyos, matxi' tz'ok nxon nk'u'je' kyi'ju' tchaq'b'ila;
¡lalun taja tu'n tel nch'ixawe'!
32Nnoktilil wu'ne' tu'n kyjapunju' tchaq'b'ila
qu'n inxi'x chin tzalaje' tu'na.
Tjwe'yi'n33Nman Dyos, xnaq'tzanqe'tzju'ya tkawb'ila weye',
wajb'ile' tu'n woklpeye' kyi'j toj tkyaqilju' nchwinqlale'.
34Q'ontza nnab'le' tu'n kyjapun tchaq'b'ila wu'ne';
¡wajb'ile' tu'n kyxinb'incha'ne' tu'n tkyaqil nk'u'je'!
35Yek'unqe'tza tchaq'b'ila weye',
qu'n atzu' nchin tzalaja'ye' kyi'j.
36Chin toniya tu'n tokten nwitze' kyi'ju' tchaq'b'ila
mya ti'j jamjoni'n.
37Lalun taja tu'n tokten nwitze' kyi'ju' noqxgan;
¡chin tonima tu'n nb'ete' toju' tb'eya!
38Japunxtzunju' tyola weye'
e'ttziyaya kyeju' nche niman teya.
39Chin tkloma teju' ik'b'il nchin xob'e' te,
qu'n tz'aqli qekye' tchaq'b'ila.
40Ina' chin laqjwe' kyi'ju' tchaq'b'ila;
¡q'ontza nchwinqlale', qu'n tnik'altati'j!
Tqaqi'n41Nman Dyos, yek'untza tk'u'jlalila ex chin tloma,
kse'nxju' kyajni ttziya'na.
42Tu'n ttzaq'wet wu'ne' kyeju' nche ok ik'lenweye',
q'uqlina'we' nk'u'j ti'ju' tyola.
43Lalun taja tu'n tb'aj nyolinteye' tyola ax,
matxina' tz'okqe nk'u'je' kyi'ju' tchaq'b'ila.
44¡Wajb'ile' tu'n wanq'inteye' t-xnaq'tzb'ila,
kukxju', toj tkyaqil tq'ijlalil!
45Chin anq'iltzuntze' toj tzaqpib'l,
matxina' chinx lpewe' kyi'ju' tchaq'b'ila.
46Chin yolile' kyi'ju' tchaq'b'ila kywitzu' nimaqkawil
ex lay chin ch'ixwiye'.
47Ina' che nk'u'jla'nwe' tchaq'b'ila
ex nchin tzalaje' kyi'j.
48K'u'jla'nqe' tchaq'b'ila wu'ne' ex chi' nk'u'je' kyi'j,
ex nxi'x chin ximane' kyi'ju' tkawb'ila.
Twuqi'n49Na'ntza tyola tzaj tma'na weye' ayine' tmajina:
qu'n ti'j soka'qe nk'u'je' tu'na.
50Ate q'uqb'ab'l nk'u'jju'ye' toj b'is:
qu'n intq'o'na nchwinqlale' tu'nju' tyola tziya'n.
51Kukx wok ik'le'nju'ye' kyu'nju' nknima'n kyib',
ayintzunwe' min nkyaj ntzaqpi'ne' t-xnaq'tzb'ila.
52Inche tzaj nna'nju'ye' tchaq'b'ila te ojtxi',
ex inqe nk'u'je' kyi'j.
53Inchin tx'u'jine' kyi'ju' b'inchal myab'a'n
ju' nkyej kykoli'nju' t-xnaq'tzb'ila.
54Matxi' che okju' tkawb'ila te nb'itze'
twitzju' tx'otx' lu, ajb'etun xjal qine' toj.
55Nman Dyos, intzaj nna'na toj qonik'an;
¡wajb'ile' tu'n wanq'inteju'ye' t-xnaq'tzb'ila!
56Awe' waq'un:
tu'n kyxi' nb'incha'nju'ye' tchaq'b'ila.
Twajxaqi'n57Nman Dyos, o'kxa nim toklena weye';
oje ntziyaye' tu'n wanq'inteju'ye' tyola.
58Nnoktilil wu'ne' tu'n tkyaqil nk'u'je' tu'n ttzalaja wi'je';
q'aq'antz tk'u'ja wi'je' kse'nxju' kyej ttziya'na.
59Inximane' ti'ju' tu'me'l nchin anq'ina'ye',
ex mache'x nb'incha'ntle' tchaq'b'ila.
60Matz'oktilil wu'ne'
ex lwiy ẍe'x nb'inchanju'ye' tchaq'b'ila.
61Mache oktxoli'n xpatxab' wi'je' kyu'n b'inchal myab'a'n,
ex min sik'tna'lju' t-xnaq'tzb'ila wu'ne'.
62Inchin jawe'ye' tk'u'j aq'b'il q'ol chjonte teya
tu'nju' tz'aqlqe'xi'xju' tchaq'b'ila.
63Wamiw qe'we' nche niman teya
exqe'ju' nche japun tchaq'b'ila kyu'n.
64Nman Dyos, nojni twitz tx'otx' tu'n tk'u'jlalila;
¡xnaq'tzanqe'tzju'ya tkawb'ila weye'!
Tb'eljoji'n65Nman Dyos, majx b'a'n wilwiye' tu'na ayine' tmajina,
kse'nxju' tyola ttziyaya.
66Chin t-xnaq'tzantza tu'n tten nnab'le' ex wojtzqib'le',
q'uqliwe' nk'u'j kyi'ju' tchaq'b'ila.
67Nim chuksb'il xnb'inchaye' na'mxtoq nkub' tme'ssa'na,
atzu'n ja'lo nxinb'i'ne' tyola.
68Majx b'a'nta, ex nb'inchan xtalb'ila;
¡xnaq'tzanqe'tza tkawb'ila weye'!
69Naqx kyak'a'nju' nkynima'n kyib' ate'qe'k poqol weye',
ayintzunwe' nwanq'i'ne' tchaq'b'ila tu'n tkyaqil nk'u'je'.
70Tzpetni kye' xjal lu kynab'l,
ayintzunwe' nchin tzalaje' tu'nju' t-xnaq'tzb'ila.
71B'a'nte' ẍin kub'messa'ne',
qu'n mache kaneju' tkawb'ila toj nwitze'.
72Nimxi'x toklenju' t-xnaq'tzb'ila ntma'na weye',
kyetwitz txqan medi q'anpwaq ex saqpwaq.
Tlajoji'n73Aku'ya kub' b'inchanweye'
¡q'oma tu'n nximane' tu'n tel nnik'e' kyi'ju' tchaq'b'ila!
74Inche tzalaju' nche niman teya ajntzaj kyka'yine',
qu'n matxi' tz'okqewe' nk'u'j ti'ju' tyola.
75Nman Dyos, b'i'n we'wu'n tz'aqliqe'xi'xju' tchaq'b'ila
ex toj tu'me'l nchin kub'ttzak'una'ya.
76¡Tz'okxwitju' tk'u'jlalila te q'uqb'ab'l nk'u'je',
kse'nxju' tyola tzaj ttziya'na weye'!
77Yek'untza tk'i'wlalila ex q'ontza nchwinqlale',
qu'n nchin tzalaje' kyi'ju' tchaq'b'ila.
78Tz'elxwit kych'ixawju' nkynima'n kyib'
aye' noqxkyak'a'n nchin kywuli'ne';
chin ximalwe' kyi'ju' tchaq'b'ila.
79Kymujb'axwit kyib'ju' nche niman teya wuk'i'le',
aye' ojtzqi'n tchaq'b'ila kyu'n.
80Chin okxwite' tz'aqli kyoju' tkawb'ila,
tu'ntzun mitz'ela' nch'ixawe'.
Tjunlajoji'n81Inxi'x chin elb'aje' tu'n tula klol weye';
¡qu'n o'kxtzu' q'uqla' nk'u'je' ti'ju' tyola!
82Naq tuk'ilxtl kyu'n nwitze' oyb'enteju' ttziyaya,
¿Jtojtzun tzula q'uqb'alte nk'u'je'? nchije'.
83Maskye matxi' chin tijine', mixti'tl wajb'ene' ex kyejni kolb'e'n qine',
min nnik'kyna'lju' tkawb'ila wu'ne'.
84¿Jte'lo q'ijtl tu'n tkub' wayo'ne'?
¿Jtojtzun kub' ttz'e'ysa'n kywitzju'ya nche yajun weye'?
85Matxi' che ku'xlku'n xpatxab' toj nb'eye',
kyu'nju' nkynima'n kyib' ex min lepchqe'k ti'ju' t-xnaq'tzb'ila,
86¡Chin tonima, qu'n ljo'n toj nq'ije' extzun mixti' wile'!
¡Kykyaqilju' tchaq'b'ila ax qe'!
87Ma'toq chin kub'a' najsa'ne' twitz tx'otx',
ex min sik' tna'lju' tchaq'b'ila wu'ne'.
88Q'ontza nchwinqlale' tu'nju' tk'u'jlalila,
ex che japumel tchaq'b'ila e'tmaya wu'ne'.
Tkab'lajoji'n (12)89Nman Dyos, tejumajxte' tyola;
¡majx ati toj kya'j!
90In japunju' tyola tu'na tejumajx;
kub'tb'incha'nju'ya tx'otx' ex majx kyejten.
91Kukxkyten ti'xti'ju', kse'nxju' tchaq'a,
qu'n kykyaqil nche ajb'en teya.
92Noqwit myaju' t-xnaq'tzb'ila ntzalajsan weye',
matxi'wtlo chin b'aje' tu'n b'is.
93Milo najchi'j tu'n tik'kyna'lju' tchaq'b'ila wu'ne',
mana' tzaj tq'o'na nchwinqlale' kyu'n.
94¡Chin tkloma, qu'n teqina
ex inche wanq'i'nju'ye' tchaq'b'ila!
95Inche xq'uqinju' b'inchal myab'a'n wi'je' tu'n nkub' kyb'yo'ne',
ayintzunwe' toknwi'ye' kyi'ju' tchaq'b'ila.
96Matxi' wile' qa kykyaqilju' ti'xti' nche b'aj,
aye'tzu'nta tchaq'b'il milo che b'ajela'.
Toxlajoji'n97¡Inxi'x che nk'u'jla'ne' tchaq'b'ila!
¡Nb'aj q'ij tu'n nximane' kyi'j!
98Weqe'we' tchaq'b'ila tejumajx;
atixi'x nnab'le' kyu'n kyekywitzju' wajq'oje.
99In kanexi'x toj nwitze' kyekywitzju' xnaq'tzalweye'
qu'n nxi'x chin ximane' kyi'ju' tchaq'b'ila.
100Inxi'x kane toj nwitze' kyekywitzju' tijwnaq
qu'n nche'x nnima'nju'ye' tchaq'b'ila.
101Matxi' tz'el npa'nwib'e' ti'ju' b'e myab'a'n
tu'n tjapunju' tyola wu'ne'.
102B'ajx tz'ela' npa'nwe'wib' kyi'ju' tchaq'b'ila
qu'n aya xnaq'tzalweye'.
103Chi'xi'xte' tyola ttziyaya
kyetwitz ta'lkab' toj ntziye'.
104Tu'nju' tchaq'b'ila xtena' nnab'le';
qu'mtzun nche el wik'u'nju'ye' chajyoli'n.
Tkyajlajoji'n105Jun spik'unte' tyola weye'
ex jun txaqb'ilte toj nb'eye'.
106ntziyaye' jun yol, ex kjapumel wu'ne':
¡che b'el wanq'i'nju'ye' tchaq'b'ila tnik'alkyi'j!
107Nman Dyos, inxi'x chin b'isune';
¡q'ontza nchwinqlale', kse'nxju' oje tmaya!
108Nman Dyos, k'monxju'ya aq'b'il chjonte nxinma'ne' teya,
xnaq'tzanqe'tzju'ya tchaq'b'ila weye'.
109Naq nneljeti'ju' nchwinqlale' tkyaqil q'ij,
ex min in ik'tna'lju' tchaq'b'ila wu'ne'.
110Inche kub' kyq'o'n b'inchal myab'a'n xpatxab' toj nb'eye',
ex min nnel npa'nwe' wib' kyi'ju' tchaq'b'ila.
111Aye' wetzb'ilju'ye' tchaq'b'ila tejumajx,
qu'n inxi'x chin tzalaje' kyu'n.
112Oje kub' nxima'ne' tu'n kyxinb'incha'ne' tkawb'ila,
kukxju' ex tejumajx.
T-o'lajoji'n113Inche el wik'u'nju'ye' xjal xmletz'qe',
aye'tzu'n t-xnaq'tzb'ila k'u'jla'nqe' wu'ne'.
114Aya e'wb'il weye' ex klol weye';
atzu' matxi' tz'oka' qe nk'u'je' ti'j ju' tyola.
115¡Kypa'mil kyib'e' wi'je' b'inchal myab'a'n,
qu'n wajb'ile' tu'n kyjapun tchaq'b'il Dyos wu'ne'!
116Q'ontza wipumale' kse'nxju' ttziyaya, chin anq'iltzuntze';
¡lalun tz'el nch'ixawe' tu'nju' q'uqlok nk'u'je' ti'ja!
117Chin tonima, tu'ntzun nklete';
che japumeltzun tkawb'iltzu'ya wu'ne' kukxju'.
118Nche eltik'u'nju'ya min nche oklpe kyi'ju' tkawb'ila,
qu'n mixti'x nche ximan b'a'n.
119Naku'j tz'is qe'ju' b'inchal myab'a'n twitz tx'otx' teya;
qu'mtzun nche nk'u'jla'nwe' tchaq'b'ila.
120Inchin lu'lune' tu'n xob'il twitza;
¡inche nnima'nwe' tchaq'b'ila!
Tqaqlajoji'n121Kukxwe' nb'inchante tnik'alilti'j;
lan chin kyej tq'o'na toj kyq'ob'ju' nche yajun weye'.
122Chin tka'yima tu'n ntene' b'a'n;
tu'n lalun chin b'ajkyajla'ne' nkynima'n kyib'.
123Matxi' che sikti nwitze' ayob'enteya tu'n tula klol weye',
inchin ayone' tu'n ntzaqpete' tu'na kse'nxju' ttziyaya.
124Chin tka'yika ayine' tmajena kse'nxju' tk'u'jlalila;
¡yek'unqe'tzju'ya tkawb'ila weye'!
125Ayinweju'ye' tmajena. Q'ontza nnab'le',
wajb'ilwe' tu'n tel nnik'e' kyi'ju' tchaq'b'ila.
126Nman Dyos, matxi' pon tq'ijlalil tu'n tjaw tiq'i'ntib'a,
kyib'aju' min nxikyima'n t-xnaq'tzb'ila.
127Qu'mtzun nche nk'u'jla'nwe' tchaq'b'ila
nimxi'x kyekywitzju' q'anpwaq tb'anil.
128Qu'mtzun lepchqinxe' kyi'ju' tchaq'b'ila
atzu'n myab'a'n nkyb'incha'n xjal ik'o'n wu'ne'.
Twuqlajoji'n129Majx tb'anilqe'kye' tchaq'b'ila;
qu'mtzun nche'x nnima'ne'.
130Jun spik'unte' chik'b'ab'l tib'aju' tyola,
inten kynab'lju' xjal noq ch'i'n kyojtzqilb' tu'n.
131Inxi'x che k'atjnenju' tchaq'b'ila weye',
qu'n nchin laqje' kyi'j.
132Chin tka'yintza, ex q'aq'antz tk'u'ja wi'je',
kse'n ntb'incha'na kyeju' nche k'u'jlanteya.
133B'inchama tu'n nb'ete' kse'nxju' ntma'n tyola;
lalun taja tu'n tkub' wi'je' tu'nju' myab'a'n.
134Chin tkloma teju' yajb'il kyu'n xjal,
wajb'ile' tu'n kyjapunju' tchaq'b'ila wu'ne'.
135Chin tka'yintza tuk'i'l tk'u'jlalila,
ex xnaq'tzanqe'tza tkawb'ila weye'.
136Inxi'x el ta'l nwitze'
qu'n min nche'x nima'nju' t-xnaq'tzb'ila.
Twajxaqlajoji'n137Nman Dyos, tz'aqlixi'xta;
ex tu'me'l qe'xi'xju' tchaq'b'ila.
138Tkyaqilju' tchaq'b'ila
tz'aqliqe'xi'x ex ax qe'.
139Xi' nkub'aje' tu'n xky'aqli'n ti'j ju' tyola,
qu'n matxi' tzik' kyna'l kyu'nju' wajq'oje.
140Toj tkuwal oje tzik' twitzlalilju' tyola ttziyaya;
qu'mtzun k'u'jla'n wu'ne' ayine' tmajena.
141B'a'ntzun qa mixti'we' woklen ex ik'u'nqine',
min nik' kyna'lju' tchaq'b'ila wu'ne'.
142Te jumajxte' tnik'alilti'j tu'na,
ex ax qe' t-xnaq'tzb'ila.
143Matxi' chin tene' toj b'is ex toj yajb'il,
aye'tzu'n tchaq'b'ila machin kytzalajsaye'.
144Tz'aqliqe'kye' tchaq'b'ila kukxju';
¡q'ontza nnab'le' tu'ntzun tb'ent wanq'ine'!
Tb'eljlajoji'n145Nman Dyos, in ntxko'na tu'n tkyaqil nk'u'je';
¡chin ttzaq'wentza, wajb'ilwe' tu'n kyjapun tkawb'ila wu'ne'!
146Twitza nchin kub'sana'ye', chin tonima
tu'n kyjapunju' tchaq'b'ila wu'ne'.
147Na'mxtoq qsqix nchin jawe'ye' qanil o'nb'il teya;
matxi' tz'okqe nk'u'je' ti'ju' tyola tzaj ttziya'na.
148Ajqok yupj, min ntzajnaj nwatle'
tu'n nkub' tene' ximal ti'ju' tyola tzaj ttziya'na.
149Nman Dyos, chin tb'intza tu'n tk'u'jlalila;
q'ontza nchwinqlale' kse'nxju' b'a'n toj twitza.
150Okniqe' lq'eju' ljolte toj nq'ije' ti'ju' myab'a'n,
atzu'n ti'ju' t-xnaq'tzb'ila najchaq ta'qe'.
151Nman Dyos, nqaku' ta'ta,
ex tkyaqilju' tchaq'b'ila ax qe'.
152Wojtzqi'nqe'we' tchaq'b'ila atxi'x ojtxi',
e'kyajtq'o'na tejumajx.
Tjunaqi'n153Ka'yintza nchin yajtiye' ex chin tkloma,
b'ajxna tzik'a' kyna'lju' t-xnaq'tzb'ila wu'ne'.
154Chin tkloma toju' yajb'il lu;
¡q'ontza nchwinqlale' kse'nxju' tziya'n tu'na!
155Min nnonina kyi'ju' b'inchal myab'a'n,
qu'n min nche anq'in kse'nxju' tkawb'ila.
156Nimxi'xju' tk'u'jlalila Nman Dyos;
q'ontza nchwinqlale' kse'nxju' b'a'n toj twitza.
157Nim kyb'aju' wajq'oje exqe' nche yajun wi'je',
atzunwe' min nelnpa'n wib'e' kyi'ju' tchaq'b'ila.
158Lay che ik'xju' nche okmiltz'uj ti'ja wu'ne',
aye' min nche'x kynima'n tchaq'b'ila.
159Ka'yintzpe'ya Nman Dyos, inche nk'u'jla'nwe' tchaq'b'ila;
¡q'ontza nchwinqlale' kse'nxju' tk'u'jlalila!
160Atiju' ax toj tkyaqilju' tyola;
tkyaqilju' tchaq'b'ila tz'aqliqe' ex tejumajxqe'.
Tjunaqi'n jun161Ljo'n toj nq'ije' kyu'n xjal nimaq kyoklen, extzun mixti' wile' kye,
ayintzunwe' inche'x nnima'nju'ye' tyola.
162Inchin tzalajwe' kyi'ju' tyola tzajni ttziya'na,
kse'n nknet jun k'uwenj tb'anilxi'x tu'n jun xjal.
163Inel wik'u'nwe' chajyolil, min nkub' toj nwitze'
atzu'n t-xnaq'tzb'ila in nk'u'jla'ne'.
164Tkyaqil kmuj nchin b'itzane' teya
tu'nju' tz'aqliqe'xi'xju' tchaq'b'ila.
165B'a'n ta'qe'kye' nche k'u'jlante t-xnaq'tzb'ila,
ex lay che kub' tz'aq.
166Nman Dyos, awta klonweye',
qu'n matxi' che wanq'inju'ye' tchaq'b'ila.
167Nche'x nb'i'nwe' tchaq'b'ila
ex nche nk'u'jla'ne' tu'n tkyaqil nk'u'je'.
168Nche'x nb'i'nwe' tchaq'b'ila ex tyola;
¡ojtzqi'nta tu'n se'n tu'me'l nchin anq'ina'ye'!
Tjunaqi'n kab'e' (22)169Nman Dyos, b'intzju'ya nkub'sb'ile';
¡q'ontza nnab'le' kse'nxju' ntma'n tyola!
170Japunxwitju' nna'j Dyose' twitza;
¡chin tkloma, kse'nxju' tyola tzajni ttziya'na!
171Chin b'itzanxwite' te ajwalilteya,
mache tzajtyek'u'na tkawb'ila weye'.
172Kchin b'itzale' tu'nju' yol tzaj ttziya'na,
qu'n tkyaqilju' tchaq'b'ila tz'aqliqe'xi'x
173Nman Dyos, lwiyxwit tzaja klol weye',
qu'n matxi' kub' nxima'ne' tu'n kyxi'nb'i'ne' tchaq'b'ila.
174Nman Dyos, ¡wajb'ile' tu'n nklete' tu'na!
¡Nchin tzalaje' ti'ju' t-xnaq'tzb'ila!
175Wajb'ile' tu'n wanq'ine' ajwalilteya;
awtju' tchaq'b'ila tz'oninweye'.
176Matxi' chin tzpete' kse'n jun rit; ¡kuttzaja jyolweye',
min nik'tna'lwe' tchaq'b'ila wu'n! chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
