Is 25 - Mam Ostuncalco Bible

B'itz ajwalb'ilte Qman Dyos

1Taye, aya nchin nimane' teya;

njaw wajwali'na ex nnimsa'ne' tb'iya,

qu'n mache japunju' t-xima tb'anilxi'x,

axxi'x ex tz'aqliqe'xi'x atxi'x ojtxi'.

2Matxi' che kyej tq'o'na nimaqtnam naqx txqan ch'uq ab'jtl,

naq kyik'lenxtlju' nimaqtnam kuwsa'nqe';

b'ajkub' t-xitu'na kyja nimaqkawb'il kye ajq'oj,

ex layx che jaw b'incha'n jumajtl.

3Qu'mtzun nnimanjtza tu'n jun tnam tx'u'j,

nche xob' nimaqkytanam mya'l xjal teya.

4Qu'n matxi' tz'oka kolb'ilkye prow,

jun klolteju' prow toju' yajb'ilte,

kolb'il te q'ankyaq,

xmuj te tq'ob' q'ij.

Iky kyxew xjalju' txkupqe'

kse'n q'ankyaq toj jb'alil,

5mujqa kse'n kyaq toj tzqij tx'otx'.

Inkub'ti'ju' kymaqb'il ajq'oj tu'na

kse'n ntchewsa'na tq'ob' q'ij tu'n tewun muj.

Ilti'j nche kub'nume xjal txkupqe' tu'na.

6Kb'el tb'incha'n Qman Dyos nimtipumal

jun ninwan kyu'n tb'anil wab'j ex tb'anil k'wab'j

twi' witz Syon, kye kykyaqil nimaqtnam

jun tb'anilxi'x wab'j ex tb'anil k'wab'j.

7Twi' witz lu kb'ela' t-xitu'n Qman Dyos

kutxb'ilkyetoq kykyaqil tnam,

aju' xb'alun kutxb'ilkye nimaqtnama.

8Majx kb'el t-xitu'n Qman Dyos kamik,

k'elil t-sun ta'l kywitz kykyaqil xjal

ex lay tajtl tu'n tel tch'ixawju' ttanam

toj tkyaqil twitz tx'otx'.

Aku' Qman Dyos q'mante.

9Kq'manjtzel toju' q'ij lu:

Ate Qman Dyos ja'lu,

q'uqli qk'u'je' ti'j ex maqo tkole'.

Qoqe' tzalaj, qik'sanku' qu'n maqo tkol, chechij.

10A Qman Dyos kklolte witz Syon,

atzu'n Moab' kb'ajel twab'e'n

kse'n nb'aja' wab'et ttxa triy toj xob'l tz'is.

11Che kxe'ltnuqpi'n Moab' tq'ob'

kse'n nxitnuqpi'n jun xjal tq'ob' ajt-xnu'xin toj a',

atltzun junjun maj ajt-xityukcha'n tq'ob'

kxel mulq'ajxi'xju' nimjtib'il toj.

12Kb'el t-xitu'n Qman Dyos

nimaqttapiyil ex nimin twe' ex kuw,

che b'eltniq'u'n

che kb'elt-xon twitz tx'otx'.