Ef CHIK'B'AB'L - Mam Ostuncalco Bible
CHIK'B'AB'LAtzu' nyolinaxixu' u'j lu ti'ju' t-xim ex tb'is tk'u'j Dyos tejumajx, tu'n kyok tmujb'a'n kkyaqil xjal tch'isb'en tjaq' tkawb'il Krist naqa xpon kanunju' tq'ijlalil. Ate Dyos ntzaj yek'unte t-xim lu kyeju' te, aj ewa'n kye junjuntl. Ex tu'ntzu'n ja'lu, ilti'j tu'n kyok kb'uyi'nkyib'ju' tnam tu'n kyanq'in tuk'i'l Krist, ex naq tu'nel Krist xjqetaju' b'e kye kkyaqil xjal tu'n tok kmujb'a'n kyib'.B'o's ch'i'ntl chik'b'ab'lteju' u'j lu kyetwitz junjuntl (1.1-2). Ex atzunju' u'j lu pa'n tten toj kab'e'. Aju' toju' tnejel (1.3—3.21) atzu' nyolina' ti'ju' mojb'ab'l, ex ikx nyolin se'n xjawa' t-sk'o'n Dyos ttanam, se'n xkub' tnajsa'na' kyil ex se'n ẍe' kleta' tu'n te il naqx tu'nel tk'wal Jesukrist ex tu'nju' tk'u'jlalil nimxi'x Jesukrist nimxi'x kyi'j xjal. Atzun toju' tkab' tnej (4.1—6.20) atzu' nyolinaxi'x ti'ju' mujb'ab'l tu'n Xewb'aj Xjan ex ti'ju' ak'a'j qchwinqlal tuk'i'l Krist ex se'n tu'n knajanaju' tk'wal Dyos. Ex atzun toju' b'asb'il teju' u'j lu (6.21-24) atzu' nyolina' ti'ju' jun q'mal tqanil a tb'iju' Tikiko.Oxe' tu'me'l nyolin mujqa oxe' tilb'ilal kub' tq'o'n Pawl te techlal toju' u'j lu, ti'ju' mujb'ab'l kxol okslal: Aju' ti'ju' qxmilal ex kyi'j okslal, ti'ju' Krist se'n wi'yj; ikx ti'ju' ja aye'qeju' okslal tq'uqlil okslab'l tuk'i'l Krist—, ex ikx nyolin ti'ju' mjeb'le'n— aye'qeju' okslal che okyel naku'j t-xu'jil Krist. Qa nyolin ti'ju' tk'u'jlalil Krist, majx njaw b'ent jun witz tu'n tajwalit tb'i Dyos (3.20-21). Twitzju' mankb'il q'olb'eb'l inche' tzak'untza' okslal tu'n Pawl tu'n kkub' we' toj kyokslab'l ex tu'n tten kyipumal, ex inok tmujb'a'nju' kb'ujb'il xjal te q'oj toju' tq'ijlalil na'j tuk'ilju' kb'ujb'il okslal aj mixti' q'ancha'l (6.10-20).
