1Tb'ajlenxi'tzun ja'lu kub'kyi'j pilistey tu'n Dab'i, ex e'kyajten tjaq' tkawb'il, ex etzaqpaju' txqantl tnam tu'n toj kyq'ob'.
2Ex e'kub' aj Moab' tu'n, eb'aj kub'tjoqb'a'n twitz tx'otx' txoli'n kyten, ik' qinb'a'ntzun jun q'intz kyib'aj: e'kub' tb'yo'nju' e'kyaj kyjaq' kab'e' echa'n tu'n q'in, aye'tzu'n naq jun echan ik' kyib'aj minti' e'kub' tb'yo'n. Iktzu'n e'kyaja' aj moab' tjaq' tkawb'il Dab'i ex e chojon te.
3Ex kub'ti'j Adad-eser, tu'n Dab'i tk'wal Reob', nimaqkawil te Sob'a, tej xi'toq txi' kolpilte jumajtlju' tx'otx' ja inik'a' nin a' Ewprates tu'n tkawin jumajtl tib'aj.
4E'kub' tjpu'n Dab'i kyajk'al jo'naq (1,700) xjal te q'oj kyi'j chej ex kab'mutx' lajk'al (20,000) tu'n kyqan; ex eb'aj ttoqi'n kyqan kykyaqilju' chej jk'ulkye karwaj te q'oj, e'kyajtzun tklo'n jni'tel naqx tu'n kyjk'et jo'naq karwaj.
5O'kxtzun kypontlju' aj siryo te Damask onilte Adad-eser, nimaqkawil toj Sob'a, ex mixti' e'kanun te Dab'i, qu'n e'kyim kab'mutx' o'lajk'al (22,000) aj siryo tu'n.
6Kub' tq'o'ntzun Dab'itz jun tnej xjal te q'oj xq'uqil toj Sirya te Damask, e'kyajtzun aj Sirya tjaq' tkawb'il ex e'chojon te. Iktzu'n intoq kanb'ana' Dab'i tu'n Qman Dyos jaxjaku' matxa'.
7Kanb'antzun Dab'itz kyi'ju' kolb'il q'anpwaq intoq che ajb'en kyeju' nejenel te Adad-eser, ex exi' tiq'i'n Jerusalen.
8Ex kanb'an kyi'j txqan q'ank'uxb'il toj B'eta ex B'erotay, kab'e' nimaqtnam te Adad-eser.
9Tetzunj tb'inte Toy, nimaqkawil toj Amat, qa matxi'toq kub'kyi'j kykyaqilju' t-xjal Adad-eser tu'n Dab'i,
10tzaj tchq'o'n Joram ju' tk'wal kyuk'i'l ti'xti' saqpwaq, q'anpwaq, ex q'ank'uxb'il, te q'ol chjonte te Dab'i tu'nju' q'ojin ti'j Adad-eser ex tu'nju' kub'ti'j tu'n, qu'n ikxte Toy ojetoq q'ojinxi' tuk'i'l Adad-eser.
11Kub' t-xjansa'n Dab'i kykyaqilju' oyaj lu twitz Qman Dyos, kse'nxju' ojetoq tb'incha ti'j q'anpwaq ex saqpwaq, aju' eb'aj tzaj tiq'i'n kyoju' nimaqtnam eb'jo'kx tjaq' tkawb'il:
12toj Edom, toj Moab', toj Amon, kyxol pilistey ex kyxol aj Amalek, exju' eltiq'i'n tej tq'ojin tuk'i'l Adad-eser, tk'wal Reob', nimaqkawil toj Sob'a.
13Jaw nima'nte Dab'i b'a'nxi'x. Tetzunj tmiltz'uj tkub'lenxi' kyi'j edom tu'n, eb'aj kab'mutx' jok'al (18,000) aj Edom tu'n toj b'ya' Sal.
14Ex e'kub' tq'o'ntlu' junjun tnej xjal xq'uqil toj tkyaqil Edom, kykyaqiltzu'n aj Edom ekyejten tjaq' tkawb'il, qu'n intoq kanb'an Dab'i tu'n Qman Dyos jaxjaku' matxa'.
Nimaq ajb'el te Dab'i(2 S 20.23-26; 1 Cr 18.14-17)15Kawin Dab'i tojxi'x tu'me'l ex tnik'alilti'j kyib'aj kykyaqil xjal toj tkyaqil Israel.
16Atoq Joab' tk'wal Seruya nejenel kyeju' xjal te q'oj; atzu'n Josapat tk'wal Ayilud ajtz'ib'al te nimaqkawil.
17Aye'tzunkye Sadok, tk'wal Ayitub', ex Ayimelek tk'wal Ab'yatar, pale qe'toq; atzu'n Serayiy aj tz'ib'altoq,
18atzu'n B'enayiy tk'wal Joyada, nejenel kye xq'uqil kyeretey ex peletey. Aye'tzu'n tk'wal Dab'i pale qe'toq.
Who We AreWhat We EelieveWhat We Do
2025 by iamachristian.org,Inc All rights reserved.
