Ez 7 - Mam Ostuncalco Bible

Matxi' tzaj lq'eju' b'ajsb'il

1Tzaj yolin Qman Dyos weye' ex tma:

2Ayine' Dyos Manb'aj, nxinma'ne' teju' tnam Israel kjalu: Matxi' tzulju' b'ajsb'il q'ij, matxi' tzulju' b'ajsb'il te tkyaqilju' tx'otx'.

3Matxi' q'naxa Israel. Ktzajel ntzaqpi'ne' ntx'u'jile' ti'ja; chin xjelule' teya ti'ju' tchwinqlala ex kb'el ntz'e'ysa'n twitza tu'n kypaj tkyaqilju' tb'inchb'aja mixyab'a'n.

4Lay tzaj laqj nk'u'je' ti'ja; kb'el ntz'e'ysa'n twitza tu'n tpaju' tchwinqlal myab'a'n ex kb'ajel tchjo'na tu'n kypaju' tb'inchb'aja taq'wixqe'xi'x. K'eleltzun kynik'tze' qa ayine' Dyos Manb'aj.

5-6Ayine' Dyos Manb'aj nchin q'mante: Ka'yinxa matxi' tzul lq'e b'ajsb'il q'ij, lepchitzx yajte'n ti'j juntl yajte'n; matxi' pon b'ajsb'il q'ij teya.

7Tzulju' xitb'il kyeye' aye' najliqe' toju' tx'otx'. Matxi' che q'anaxe'; matxi' tzul q'ij naq che b'elchukjiye'. Kb'ajelju' tzalajb'il kywi' witz.

8Ktzajel ntzaqpi'ne' ntx'u'jile' kyi'je' ja'loxi'x tzmax ajtqe nk'u'je', chin xjelule' kyeye' ti'ju' kychwinqlale' ex kb'el ntz'e'ysa'n kywitze' tu'n tpaju' kyb'inchb'aje' taq'wixi'x.

9Lay tzaj laqjtl nk'u'je' kyi'je'; kb'el ntz'e'ysa'n kywitze' tu'n tpaj kychwinqlale' myab'a'n ex kb'el kychjo'ne' kyb'inchb'aje' taq'wixi'x. K'eleltzun kynik'tze' qa ayine' Dyos Manb'aj nchin tz'e'ysante kywitze'.

10¡Luju' q'ij! ¡matxi' tzulkanun! ¡Matzulju' xitb'il! In kanb'anju' il toj tkyaqil plaj ex matxi' kub'chmet-xi'xtl pi'sil.

11Njaw q'oj ex naqx b'inchaj il nb'aj. Aye'tzunkye' xjal mixti'xte kykanb'a' tu'n kyq'inumal ex tu'n nche ẍch'in. Mixti'x che oka'.

12Matxi' q'nax, matxi' pon q'ij te, mixti' jatu'n ttzalaja' ka'yil ex mixti' jatu'n tb'isuna' loq'ol. Kb'el ntz'e'ysa'ne' twitzju' nimaltib' toj Israel tuk'i'l ntx'u'jile'.

13Alkye matk'ayi jun ti'xti' lay kotpetl tu'n toj tkyaqilu' tchwinqlal, ex lay b'ent tkub't-xitu'n matxi'toq t-xitk'a'yi'n. Lay b'ent kyk'u'nte' b'inchal myab'a'n kychwinqlal.

14In q'ajti chun te txokb'il toj q'oj; kykyaqil nkyb'incha'nkyib', extzun mix-a'lo' netz q'ojil. Kntz'e'ysa'ye' twitzju' tninb'iltib' Israel tuk'i'l ntx'u'jile'.

15Ati q'oj ti'jxi', atzu'n tojxi' ati yab'il ex we'yaj. Aye' ate'qe' toj kojb'il che b'ajelkyim toj q'oj, aye'tzu'n ate'qe' toju' nintnam che b'ajelkyim tu'n we'yaj ex yab'il.

16Maskye mache oq junjun kywi' witz, che b'ajelxob' kse'n paloms ex kykyaqil che kyimel tu'n tpaju' kyil.

17Kykyaqil che b'elnuqtz'aj kyq'ob', ex che lu'lul kych'ek tu'n xob'el.

18K'okyel kyq'o'n kyxb'alun te b'is te techlal k'ixk'oj; tkyaqil kyxmilal che jawil lu'lun, ex che b'elkyeqax kywitz tu'n kych'ixaw ex sk'o'ji'n kywi'.

19Kb'je'lex kychto'n kysaqpwaq toj b'e; kb'je'lex kychto'n kyq'anpwaq naku'j tz'is. Lay b'ent kyklet tu'n kyq'anpwaq ex kysaqpwaq toju' q'ij ajttzaj ntx'u'jile' ayine' Dyos Manb'aj. Lay b'ent tqjen we'yaj kyi'j ex lay che noj kyu'n, qu'n tu'n tpaju' q'anpwaq ẍekub'a' tz'aq toj il.

20Tu'ntpaju' tb'anil che ka'yin kyu'n u'wj majaw kynima'n kyib', ex b'ajkub' kyb'incha'n kyilb'ilal kywitzleb' taq'wixqexi'x. Qu'mtzun che okyelju' u'wj lu wu'ne' te tz'is.

21Knb'incha'ye' tu'n kyul najchaq xjal ex tu'n kyb'ajx kyelq'a'n, tu'n kyulju' xjal majx ik'u'nqe' twitz tx'otx' ex tu'n kyb'je'l kyiq'i'n kye, ex tu'n tkub'kyaju'n naku'j ti'xti' tz'il.

22K'elel npa'nwib'e' ti'ju' nintnam lu ex kjel ntzaqpi'ne' tu'n tb'aj txa'ju'n njaye' te k'u'lb'il, nk'uwen toqe'. Che b'ju'l taq'wix xjal ex kb'ajel kytz'ilsa'n.

23B'inchanku'ya jun xpatx'i'n k'uxb'il, qu'n nim ktz'e'ysetel kywitz toju' tx'otx' tu'n tpaj b'yojwnaqi'n, ex nim xjal nche b'iyon toju' nintnam.

24Knb'incha'ye' tu'n kyul xjal b'inchal ilqe' ex che b'elkytzyu'n ja toju' nintnam. Kb'el nnajsa'ne' ninb'ilkyib'ju' nimaq kyoklen toj kywitz; knb'incha'ye' tu'n kyb'aj tz'ilixju' kynajb'il xjanqe'.

25Tzulxi'xju' xob'ajil kyi'j; kkyjya' nak'b'il, ex lay knet kyu'n.

26Lepchitzx yajb'il ti'j juntl yajb'il; e'tqanil taq'wix ti'j juntl. Layx knet jun t-sanjelal Dyos kyu'n tu'n tq'onte jun yek'b'il kye; mixti'x qekye' pale xnaq'tzalkye ex mixti'qe' tijwnaq q'olte jun kynab'l.

27Ktenb'elju' nimaqkawil toj b'is, kb'el tz'aqju' kawil toj b'is ex kjawil lu'lunju' tnam. Kche nse'ye' kse'nxju' kyb'inchb'aj ex che okyel toj xjel wu'ne' kse'nxju' e'oka' kyq'o'n txqantl. K'eleltzun kynik'tz qa ayine' Dyos Manb'aj.