Neh 8 - Mam Ostuncalco Bible

1B'ajtzun kyb'u'yi'n kyib' kykyaqilju' tnam ja nkychmo'na' kyib' xjal twitzju' tjpel a' tb'i, ex xikyma'n te Esdras xnaq'tzal tu'n ttzaj tiq'i'n tu'jil tkawb'il Moyses, ojetoq tzaj tq'o'n Qman Dyos kye aj Israel.

2Toj tnejel q'ij te twuqi'n xjaw, tzaj tiq'i'n pale Esdras tu'jil kawb'il kywitzju' b'u'yi'ntoqkyib', e'ichan ex qya ex kykyaqilju' intoq che ximantl;

3ex jawt-ẍch'i'n kywitz kykyaqil jamajx ate' xjal tpenju' tjpel a' tb'i, tzyet-x te prim ex tzmax te wanq'ij.

Tkyaqilju' tnam intoq kub' kyb'in tej tjaw ẍch'i'n tu'jil tkawb'il Dyos.

4Wa'ltoqju' xnaq'tzal Esdras tib'aj jun t-xwe'lb'il tze b'incha'n tu'n tajb'en te. Ex wa'lqe'toqju' Matatiy, Sema, Anyiy, Uriy, Ilkyiy ex Maaseyiy, toj tb'a'nq'ob'. Ex wa'lqe'toq Pedayiy, Misael, Malkyiy, Asum, Asb'adana, Sakariy ex Mesulam, toj tnayaj.

5Jawtzun tjqo'n Esdras u'j kywitz kykyaqilju' tnam, qu'n q'ancha'lxi'xtoq jawl kye kykyaqil; tetzunj tjaw tjqo'nju' u'j, kykyaqilu' xjal eb'ajkub' we'.

6Jawtzun tajwali'n Esdras Qman Dyos nimtipumal, ex tkyaqilju' tnam jaw kyq'o'n kyq'ob' jawtl ex xikytzaq'we'n: Ikxwitju', Ikxwitju', chechij. E'kub' joqetzuntz majx ku'pun kyplaj twitz tx'otx', ex ek'ulun te Qman Dyos.

7Aye' aj Leb'i Joswe, B'ani, Sereb'iy, Jamin, Akub', Sab'tay, Odiy, Maaseyiy, Kyelit, Asariy, Josab'ad, Anan ex Pelayiy inche'x chik'b'a'nteju' tkawb'il Dyos kye tnam. Tej wa'lqe'toqju' xjal ja ta'qe',

8kuwtoq njaw kyẍch'i'n tu'jil kawb'il, ex ntoq jaw kypju'n tu'n tkyaj chik'exi'xu' ntma'n.

9Ex tkyaqilju' tnam intoq che o'q' tej kyb'inteju' ntma'n tkawb'il Dyos, ikxju' kawil Neemiy ex xnaq'tzal ju' pale Esdras, exqe' aj Leb'i nche'x chik'b'ante tkawb'il Dyos kye tnam, xikyma'n kye kykyaqil tu'n lalun che b'isun ex tu'n lalun che oq', qu'n aju' q'ij lu tu'n tajb'en te Qman Dyos.

10Xipetma'ntl Esdras kye: kukyxi'ye' ex che wanqe'ye' ti'ju' tb'anilxi'x, che k'wanqe' b'ine' chi' ex che kytxkonqe'xju'ye' mixti' kywa b'incha'n, qu'n xjansa'nte' q'ij lu te Qman Dyos. Lalun che b'isune', qu'n a qkuwalju' tzalajb'il te Qman Dyos.

11Ikyqe'xju' aj Leb'i intoq che'x kymyo'n xjal, xikyma'n tu'n kyqjen ex tu'n lalun che oq'tl, qu'n te Qman Dyosju' q'ij lu.

12Kykyaqiltzunju' xjal eb'ajx wal ex k'wal, ex tu'n txikyq'o'n kywaju' mixti' kywa ex tu'n tkub' kyik'sa'nju' ninq'ij, qu'n matxi'toq tz'el kynik' ti'ju' xixnaq'tza'n kye.

Ik'saj Kyq'ij pach tq'ob' tze

13Te juntl q'ij, b'aj kyb'u'yi'n kyib' kykyaqilju' nejenel kye junjun ja xjal, exqe' pale exqe' aj Leb'i, tuk'i'l Esdras xnaq'tzal tu'n kyxnaq'tzantekyib' ti'ju' tkawb'il Dyos,

14ex b'je'l kyu'n tz'ib'a'n qa ojetoq tchaq' Qman Dyos toj ttzi Moyses, qa atitoq tu'n kynajan aj Israel kyoj pach tq'ob' tze toju' tq'ijlalilu' ninq'ij toju' twuqi'n xjaw.

15Extzun tqaniltz kyoj kykyaqilju' nimaqtnam ex toj Jerusalen, tu'n kyexju' xjal jyolte tq'ob' tze olib'o tuk'i'lxi' t-xaq kyoj k'ul, ex tq'ob' ktxab', tut ex alkyexku' juntl tze pujin tu'n kyb'inchetju' pach, kse'nxju' tz'ib'a'n toju' tkawb'il Dyos.

16Eb'je'xtzu'n xjal jyolte ex anjtzkyi'j iq'i'n tq'ob' tze kyu'n tuk'i'lxi' t-xaq tu'n tjaw kyb'incha'n kypach tq'ob' tzeyile, kyib'aj ja ex kywi' pe'n, ex tpenju' tja Dyos, ex ja nchi tena' nim xjal ttziju' nintjpel a' tb'i ex ttziju' nintjpel Eprayin tb'i.

17Kykyaqilu' tnam xjal b'je'xniqe'toq q'i'n ex eb'ju'l jumajtl, kyb'incha kypach tq'ob' tze ex eb'jo'kxten toj, qu'n b'ajxtoq b'inchet ja'lu ttzajlenx toj tq'ijlalil Joswe, tk'wal Num, tzmax toju' tq'ijlalil lu. Ex ojexi'x che tzalaj.

18Kub'kyik'sa'n wuq q'iju' ninq'ij; tzyet-x tnejel q'ij tzmax te b'ajsb'il, intoq jawt-ẍch'i'n Esdras tu'jil tkawb'il Dyos tkyaqil q'ij; tojtzun twajxaqi'n q'ij ok jun b'uyjtib'il nim toklen, kse'nxju' nb'inchet tnejel.