Am CHIK'B'AB'L - Mam Ostuncalco Bible
CHIK'B'AB'LAju' tuj Amos mya' o'kx tu'nju' nejl tkub' tz'ib'a'n kywitzju' txqantl u'j kyu'n t-sanjelal Dyos, ex tu'n aju' Amos ok tnejel t-sanjelal Dyos toju' jo'naq ab'q'i tb'anilxi'x kye aj Eb'rey (wajxaq jo'naq ab'q'i na'mtaq titz'ji Krist), ex ikx tu'nju' a tnejel pakb'alju' yolin kyi'j kykyaqil ti'xti' nb'aj kxol kykyaqil xjal twitz tx'otx'. Ate Amos atzu' tzajna' toj juntl tal kojb'il te Juda, ex jun tal k'ik'leltaq. Ex txokli tu'n tpakb'an toj tnam Israel ex toj tb'a'nq'ob' kya'j, aj ma'toq jaw b'enti ex ma'toq kub' b'enti il toj ex ajpaji'n. Aju' kyokslab'l ma'toq tz'okxju' taq'wixil toj exju' witzleb'in ex naq jte'qeju' ma'toq che jaw q'inumax kyib'aj txqan xjal inxi'xtoq che yajt ex tqe' toj prowil.Aq'wi Amos q'mal txqan tpakb'alil kyi'ju' tnam najlqe' nqayin tk'etz Israel (1.1—2.5) Ex ikx aq'wi yolil ti'j Juda ex Israel, qu'n ikx kb'ajelju' kyi'j kse'nqe' txqantl tnam, mya' tu'nwt sk'onqe' te ttanam Dyos lay kub' tz'e'ysa'n kwitz, qu'n aj ilqe' kykyaqil. Qu'n ate Amos tnejel tpakb'ab'l atzu' yolina' qa ate Dyos Taye kye kykyaqil tnam, ex aju' malb'ilte il k'ik'el kyib'aj kykyaqil, b'a'ntzunqa sk'o'n mujqa mya sk'o'n tu'n Dyos, qu'n a penate' tnam sk'o'n tu'n Dyos nimxi'x tz'e'ysb'il twitz tzul qu'n b'i'ntlna' tu'n ex kanli twitz qa myab'a'n b'inchaj il (2.6—6.14). Atzu' nyolina' jwe' witzik' ajtb'aju' u'j lu (7.1—9.15) ti'ju' tz'e'ysb'il witzb'aj tzul tu'n Qman Dyos, ex toju' tnejel tnej nka'yina' qa nlaqj tk'u'j Dyos kyi'ju' xjal. Aju' b'ajsb'il teju' u'j lu nyolin qa kjawel b'ent jumajtlu' tnam te Israel.Okq'o'n Amos qa tu'me'lxi'x tu'n, tu'nju' yolin ti'ju' myab'a'n nb'aj kyxol xjal. B'a'npetzunqa myaxi'xtzu' yolina' tpakb'ab'l ti'ju' myab'a'n nb'aj kyxol xjal, qu'n atoqte' nttziya'nju' kjalu: Ate Dyos axxi'xte', ex ate tnik'alxi'xti'j kyekywitz kykyaqil xjal twitz tx'otx'. Qu'mtzun ntzaj toj twitz qa mya tnik'alkyi'j xjal tu'nju' nkyb'incha'n il, ex tu'nju' nche okten ik'lelte Dyos tnik'alti'j ex majx pi'sqe' twitz Dyos. Tu'me'lxi'xtoq tu'nju' t-sanjelal Dyos lu tu'nju' intoq tma'n kye xjal tu'n kyok tnik'alkyi'j, qu'n axtoq tajb'il Dyosju' tu'n tb'inchante.
