1Ayinweju'ye' matxi' tzik'nwitz toju' yajb'il
tjaq' tkyaqilju' ttx'u'jil Qman Dyos.
2Machin iq'injeye' tu'n toj qloj,
machin b'ete' tu'n kyoj b'e qlolj kyoj;
3atl junjun kmuj ex junjun q'ij,
nokmeltz'ujxi'xju' tq'ob' wi'je'.
4Makub' tijin nchib'jile' ex ntz'umile' tu'n,
mache kub' ttoqi'n nb'aqile';
5mab'aj kyjpu'n wijileye'
tu'n k'ixk'oj ex yajb'il;
6machin kub'tq'one' tu'n wanq'ine',
toj qlolj kse'nqe' ojtxi' kykyimlen.
7Mab'aj tjpu'n wi'jileye', mixti'l welixe';
machin kub'tjtz'one' kyu'n txqan xpatx'k'uxb'il;
8maskyepe' nẍch'ine' tu'n tonin wi'je',
kub' tchkyinsa'ntib' weye';
9kub'tmq'o'n nb'eye' kyu'n ab'j b'jaw tnk'u'n,
¡ttch'exb'e tu'me'l nb'eye'!
10Ikymatxi' tz'oka' weye' kse'n jun b'alun jutzlokx toj k'ul,
kse'n jun oso naqx tu'n ttzajlipan wi'je'.
11Machian nel ttxalpu'ne' toj nb'eye', machin b'ajtk'ixb'sa'ne',
¡matz'ok tq'o'n nim xob'il wi'je'!
12¡Matxitqinu'n t-smaj
ex machin tzajtnik'u'ne'!
13Majx ex xopq'iju' wanmiye'
tu'n talt-smaj Qman Dyos.
14Kykyaqil nxjalile' nche xmayin wi'je';
majx atinqine' twi' kyaq' tkyaqil kmoj.
15Nim k'ixk'oj saj tq'o'n Dyos weye';
k'aju' k'wab'j saj tq'o'n weye'.
16Mache b'je'tz nq'uchi'ne' nwisteye ti'j ab'j;
mab'aj nxtoli'n wib'e' toj quq.
17Mixti'tl nak'b'il weye' ja'lo
ex matzik'tna'lju' tzalajb'il wu'ne'.
18Expe' kub' nxima'ne' qa ojetoq tzpetju'
q'uq'b'ab'l nk'u'je' ti'j Qman Dyos.
19Ntzaj nna'ne' b'is nik'a'ye' tej njunale',
toju' k'ixk'oj ex yajb'il nnik'a'ye';
20nchin kub' tene' ximal ti'j tkyaqil ja'lu
ex majx nkub'aj wipumale'.
21Atitzun jun ti'xti' majx ntzaj nna'ne'
ex tu'n tokqe nk'u'je' ti'j:
22Mixti'te b'ajsb'il teju' tk'u'jlalil Dyos,
ex kukx tten t-xtalb'ilju'.
23Ak'a'jchaq atl junjun prim;
¡inxi'x che japunju' tyol!
24Ex inma'ne' toj wanmiye': ¡Ate Qman Dyos tkyaqil weye';
qu'mtzun q'uliwe' nk'u'j ti'j!
25B'a'nte Qman Dyos kyeju' q'uqlok kyk'u'j ti'j,
kyeju' nche jyon ti'j.
26Ate b'a'nju' tu'n qayon
ti'ju' to'nb'il Qman Dyos.
27A b'a'nju' qama t-xitb'i'n xjal tzak'b'il
tzajx toj tku'xumal.
28Ati tu'n tkyajtenju' xjal tjunal ex k'otzli
ajttzak'unjtz tu'n Qman Dyos;
29ati tu'n tkub'tma'tzi'n twitz tx'otx',
qu'n jaku' atix q'uq'b'ab'l k'u'jb'aj te;
30kxe'l tq'o'n poq'cha' ttx'u'k twitz qa ati xb'ujun te,
ex tu'n tb'aj yasu'n b'a'nxi'x.
31Lay qokyaj tleb'a'nte Qman Dyos tejumajx.
32B'a'nqa maqo kub' tyaju'n, inx tzaj q'aq'an tk'u'j,
qu'n nimxi'xte tk'u'jlalil.
33Axxi'x min nkub' toj twitz tu'n ttzaj tq'o'n b'is
mujqa tu'n toktq'o'n k'ixk'oj kyi'j xjal.
34Qama che kub' wab'e'n jpu'nqe' toj tnam
ex mixti'x tlaqb'il kyk'u'jlalil,
35qa min xnimanjtzju' toklen jun xjal
twitzku' Qman Dyos,
36qa min xb'inchanjtz tnik'alilti'j toj jun ttxolil kawb'ill,
tkyaqil ja'lu ik'o'nqe' tu'n Qman Dyos.
37Qa ati nyolinjtz, mujqa ati xb'aji,
aku'te Qman Dyos xq'mante.
38Qama tzaju' b'a'n mujqa taq'wix
ate Qman Dyos inq'mante tu'n tzaj.
39Aj il na'te' xjal twitzju' tx'otx' lu
¿Tiqu'ntzun ntx'eqneya'tz tu'n tzak'b'il?
40Qo ximan b'a'nxi'x ti'ju' qkchwinqlal;
ex kutanjtz ti'j qanmi te Qman Dyos.
41Qq'onx qanmi ex qo na'n Dyos
te Qman Dyos te toj kya'j.
42Maqo' b'inchan ile' ex maqo elpi'se';
ex min xkub' tnajsa'na qile'.
43Mab'aj ttxoli'na qi'je' tu'n ttx'u'jila, ex makub'tljo'na toj qq'ije',
¡mixti'x q'aq'an tk'u'ja tej qkub' tb'iyo'na!
44Okx tewa'ntib'a toj jun muj
tu'n mitzaja' tb'i'na qkub'sb'ile'.
45Ikymatxi' qo oka'ju'ye teya kse'n tz'is
kywitz kykyaqil xjal.
46Matxi'xi'x qo okye'
te kyxmayb'ilju' qajq'oje;
47¡maqo okye' toj ex nqo ik'e' ja'lo
toj xob'il, xpatxab' ex xitb'il!
48Inxi'x che qojli ta'l nwitze'
tu'nju' xitb'il saj ti'ju' ntaname'.
49Min nche ojlan nwitze' tu'n woq'b'ene',
ex layx qe nk'u'je'
50tzmaxi'j ajqtzaj b'i'n
tu'n Qman Dyos toj kya'j.
51Nche ch'yon nwitze' ex majx npon ti'j wanmiye',
tu'nju' ẍe ik'a' tmyal ntaname'.
52Ma chintzaj kyub'a'ne' wajq'oje naku'j pich'
extzun mixti' wile' kye;
53Inku'x kyq'o'ne' itz'qinxe' toj jun xoch
ex kub' kyjpu'n ttzi tu'n jun ab'j.
54Majx nxi'mulq'ije' tjaq' a',
ex kub' nxima'ne': Matxi'tzun chin b'aje', nchije'.
55Intzaj nna'ne' tb'iya, Nman Dyos
tzmajxtzu' t-xe a':
56ina' tzajtb'i'nteya tq'ojq'ojel nwi'ye';
lalun tz'elt-suchu'na nkub'sb'ile'.
57Ina' ul lq'eya nk'etze' ajttzaj ntxko'na
ex ntzaj tma'na weye': Lalun xob'a.
58Nman Dyos, inchin tklo'nta toju' yajb'ilweye'
ex intklo'na nchwinqlale'.
59Nman Dyos, intka'yi'na jitz'b'il weye',
¡b'inchama tnik'alilti'j weye'!
60Tojtzqi'nta kyajb'il tu'n nb'o'lje' kyu'n
ex tkyaqilju' kyxim b'incha'n wi'je'.
61Nman Dyos, b'intzju'ya ajkyok tzaqpaj
ex tkyaqilju' kyxim wi'je';
62e'txqan kyolju' wajq'oje,
tkyaqil kmuj nche yolin myab'a'n wi'je';
63¡Ka'yintza tkyaqilju' nkyb'incha'n
majx intinkye' te kyxmayb'il!
64Nman Dyos, tz'e'ysanku'ya kywitz,
kse'nxju' kyb'inchb'aj,
65Ch'uẍsanku'ya kynab'l,
ex q'ontzju'ya taq'wix txko'ntl kyb'aj.
66Nman Dyos, xla'janqe'ma toj ttx'u'jila,
¡najsanqeku'ya twitzu' tx'otx' lu!
Who We AreWhat We EelieveWhat We Do
2025 by iamachristian.org,Inc All rights reserved.
