Am 2 - Mam Ostuncalco Bible

1Chi Qman Dyos kjalu:

Nim txqan myab'a'n matxi' kb'inchaju' xjal te Moab'

ex naq chin ka'yine' kyi'j;

qu'n kub' kytz'e'ysa'n tb'aqilju' nimaqkawil toj Edom

tzmaxi'x tkub' tza'jix kyu'n.

2Qu'mtzun k'okyel nq'o'ne' tq'aq'alju' tnam te Moab',

ex che kb'ajel patju' tja kawb'il te Kyeryot tu'nju' q'aq' lu;

kche kyimelju' aj moab' toj q'oj

ajtq'ajti chun.

3¡K'elel wiq'i'ne' nimaqkawil toj tnam:

kb'el nb'yo'ne' junx kyuk'i'lju' t-xjal nimaq kyoklen!

Chin Qman Dyos

4Chi Qman Dyos kjalu:

Nim txqan myab'a'n matxi' kyb'inchaju' xjal aj Juda

ex lay naq chin ka'yine' kye;

qu'n elkyik'u'nju' nxnaq'tzb'ile' ayine' Dyos Manb'aj

ex min xikynima'nju' nkawb'ile',

xi'pe' ẍe'k'uluna' kywitzxju' witzleb' jae'k'uluna' kyman.

5Qu'mtzun k'okyel nq'o'ne' tq'aq'alju' tnam Juda,

ex che kb'ajel patju' tja kawb'il te Jerusalen tu'nju' q'aq' lu.

Tz'e'ysb'il kywitz aj Israel

6Chi Qman Dyos kjalu:

Nim txqan myab'a'n matxi' kyb'inchaju' xjal aj Israel

ex lay naq chin ka'yine' kye;

qu'n nxikyk'a'yi'nju' mixti' til tu'n tpaj pwaq

atzunju' prow naqx tu'n tpaj jun muj xjab'.

7Nche kub' kyjtz'o'nju' prow ex nche kub' kyaju'n,

ex min kb'incha'nju' tnik'alilti'j kyeju' me'sqe'.

Aju' manb'aj exju' k'walb'aj nche kub'kẍe tuk'i'l junx qya,

tu'ntzunju' lu nkub' ksaqchb'e'nju' nb'iye' xjan.

8Nche kub' kẍe kyib'aj xb'alun nche kyajq'o'n k'as,

nche wan ti'ju' wab'j nkub' b'incha'n te ninb'ilkyeju' witzleb';

nkylq'o'n kyk'wa' b'in tu'nju' pwaq nelkyiq'i'n mya toj tnik'alti'j kyi'ju' xjal,

nche k'wa'n toj tjaju' kydyos.

9Ayintzunwe' naqx tu'n tjqet kyb'eye' wu'ne',

eb'ajkub' nb'yo'ne' aj amorey;

majx e mankun kykyaqil wu'ne',

b'a'nqa nimaqtoq kywe' kse'n tze k'ute ex b'a'nqa kuwqe'toq kse'n k'ol.

10Aye'tzunkye' eb'je'tz wiq'i'ne' toj Ejipt,

ex nẍaqlu'n kab'naq (40) ab'q'i kyi'je' toj chq'ajlaj

tu'n txi' nq'o'ne' ktx'otx' kyeye'.

11Lay b'ent tkub' kyewane' aj Israel,

qa eb'jaw nsk'o'ne' junjun tu'n kyok te sanjelal ex junjuntl te nasarey kyxole'.

Chiku' Qman Dyos.

12Aye'tzunkye' e'ok kychq'o'ne' nasarey tu'n kyk'wan b'in,

ex min kyaje' tu'n kyolinju' sanjelal toj nb'iye'.

13Qu'mtzun knb'incha'ye' tu'n kb'aj wab'ane' kyu'n kyajq'oje',

kse'n tx'otx' nb'aj potz'j tjaq' ttulil jun karet iqa'n nim triy tu'n.

14B'a'nqa kuw che ojqelane', lay che tzaqpaje';

lay xkyetlju' kuw tipumal,

ex lay kletju' mib'a'n xob'.

15Lay b'ent t-xontlju' b'a'n smajil,

lay kletju' kuw tz'ojqelan

ex lay kletju' makub' oq tuk'i'l chej.

16Toju' q'ij lu naqpena'ju' kuwxi'x kxolju' nimaq q'ojil

kje t-xonju' taq'unb'il te q'oj tu'n tb'ent toq.

Chiku' Qman Dyos.