1Toj kyajlajoj ab'q'i ntoq kawin Esekyiy, q'ojin nimaqkawil Senakyerib' aj Asirya kyi'j kykyaqilju' nimaqtnam kuwsa'nqe' toj Juda ex e'kub' ttzyu'n.
2Tzaj tchq'o'n jun nejenel kye t-xjal te q'oj tuk'i'l jun tnej xjal te q'oj kuwqe' tzmax Lakyis, ti'j Esekyiy nimaqkawil toj Jerusalen, ex kub' kynk'u'nkyib' tk'etzju' tb'e a' npon toju' tk'b'el nimin, toju' b'e nxi' toju' kojb'il tx'ajb'il su't.
3Atzuntzu' e'etza' Elyakyim kyi'j, tk'wal Ilkyiy ju' ntoq ka'yinte tkyaqil toj tja nimaqkawb'il, ex Seb'a tz'ib'al tqanil; ex Joa, tk'wal Asap, ttz'ib'al nimaqkawil.
4Tmaju' nejenel kye xjal te q'oj aj Asirya kye:
—Kymanxe' tqanil lu te Esekyiy tu'n nimaqkawil nim toklen aj Asirya, ikjalu: ¿Tiqu'ntzun q'uqlixi'x tk'u'ja?
5¿Ma a nkaneju' toj twitza qa ikyqe'x tb'anil yolju' kse'n tu'me'l njyet ex kse'n ipumalj tu'n tokju' q'oj? ¿Alqi'j q'uqla' tk'u'ja tu'n tjaw tiq'i'ntib'a wi'je'?
6Inel nnik'e' qa atzu' q'uqla' tk'u'ja ti'j tipumal Ejipt. Anate' Ejipt naku'j tze matxi' kub'toqj, qama txiqtzyu'n nxitx'ikli toj qq'ob' ex nk'ixb'i tu'n. Ikytzun Paraonju', nimaqkawil aj Ejipt kye kykyaqilju' nokqe kyk'u'j ti'j.
7Qatzun matmaya weye': Xi'q'uqla'qe' qk'u'j ti'j Qman Dyos janqo ajb'ena'ye', qa chechiye', ¿ma mitzun jun e'eltiq'i'n Esekyiy najb'il te k'u'lb'il exqe' q'olb'eb'l teju' Dyos lu, ex tchaq' kye xjal aj Juda ex aj Jerusalen tu'n kyk'ulun naq tib'aj jun q'olb'eb'l?
8Tziyamti'j jun tyola tuk'i'l wajawe', ju' nimaqkawil aj Asirya: kxe'l nq'o'ne' jo'k'al (2,000) chej teya, qama che elyal xjal chejilqe' tu'na.
9Laypena' xkyeta tu'n toq junju' nejenel mixti'x tipumal kyxol t-xjal aj Asirya, ¿ma oktzun che kyknetel chejil tu'na ex chej toj Ejipt?
10Jakupe' kub't-xima'na qa mya tuk'i'l tonb'il Qman Dyos ẍintzaja'ye' q'ojil ex xitulteju' tnam lu. ¡A pena'te saj chq'onweye' q'ojil ti'j ex xitulte! chij.
11Xitzun kytzaq'we'n Elyakyim, Seb'na ex Joa teju' nejenel kye xjal te q'oj aj Asirya, kjalu:
—B'inchama xtalb'il, yolina qeye' toj aramey, ina' kaneqe' toj qwitz. Lan tzaj yolina qeye' toj eb'rey, qu'n kykyaqilju' xjal ate'qe' toju' nimaqtapi nche b'in, chechij.
12Atzunte' nejenel kye xjal te q'oj aj Asirya tma:
—Mya tete' kynimaqkawile' ex mya kyeye' xqo tzaja' tchq'o'ne' qnimaqkawile' aj Asirya q'malte' lu. Kyena'kye' xjal ate'qe' tib'aju' nintapi, qu'n kykyaqilxe' kyuk'i'lju' xjal lu, kxel kywane' kytxaye' ex kxel kyk'wa'ne' kytz'a'le', chij.
13Kub'tzun we' nejenel kye xjal te q'oj lu ex jaw t-ẍch'i'n kuw toj eb'rey:
—Kyb'intzpe'ye' ntma'n nimaqkawil nim toklen te Asirya kyeye' kjalu:
14Lalun kyq'a' sb'u'kyib'e' te Esekyiy; lay b'entkye kyklet tu'n.
15Qa tok Esekyiy oksalte kyk'u'je' tu'n tqe kyk'u'je' ti'j Qman Dyos, exqa matxi tma'n kyeye': Kna' qokletelte' tu'n Qman Dyos; lay taj tu'n tkub'ti'ju' nintnam lu toj tq'ob'ju' nimaqkawil aj Asirya, qachi,
16lalun txikyb'i'ne'. Machin tzaj tchq'o'ne' nimaqkawil toj Asirya q'malte kyeye' tu'n kyb'inchanteye' nak'b'il tuk'i'l, ex tu'n kyq'onte kyib'e' toj tq'ob', teyiletzun junjuntz ktnik'b'e' twitz tawal ub'a ex iw, ex kk'wal ti'jxju' t-xoch.
17Yajxi'tzuntl che kxe'lq'i'ne' tu'n toj jun tx'otx' ikyininxju' kse'n kytx'otx'e', ja ntzaja' triy ex ub'a, tu'n tb'inchet wab'j ex b'in.
18Qa nxitma'n Esekyiy kyeye' qa che kletele' tu'n Qman Dyos, lalun kyaq' sb'u'kyib'e' te. ¿Ma ma'tzun che kletju' txqantl tnam tu'n kydyos toj tq'ob'ju' nimaqkawil te Asirya?
19¿Jatzun ta'qe' dyos te Amat ex te Arpad? ¿Jatzun ta'qe' kydyos aj Separb'aym? ¿Ma ma'tzun tb'ent tklet Samarya kyu'n toj kyq'ob' aj Asirya?
20¿Alkyetzun jun kyxol kykyaqilju' dyos lu xklet jun tnam tu'n toj tq'ob' nimaqkawil te Asirya? ¿Tiqu'ntzun nkub' kyximana'ye' qa kkletelju' Jerusalen tu'n Dyos Manb'aj? chij kye.
21Aye'tzunkye eb'ajkyaj nume ex mixti'xte xikytzaq'we'n, qu'n matxi'toq tchaq' nimaqkawil tu'n lalun txikytzaq'we'n.
22Aye'tzunkye Elyakyim, ka'yilte toj tja nimaqkawb'il; ex Seb'na, tz'ib'al tqanil; ex Joa ttz'ib'al nimaqkawil, kub' kylaqu'n kyi'j, exi'tzuntz tk'etz Esekyiy q'malte tyolju' chaq'ul kye xjal te q'oj aj Asirya.
Who We AreWhat We EelieveWhat We Do
2025 by iamachristian.org,Inc All rights reserved.
