1A tpakb'al ja'lu tu'n Qman Dyos nimtipumal, kyi'j aj Moab':
¡Qab'anxju' nimaqtnam Neb'o,
xitjnitl!
¡Ttzyet Kyiryataym ex kub' me'sa'n!
¡Majxkub' xon tipumal twitz tx'otx'!
2Matxi' b'aju' t-spik'umal Moab'.
Nkynk'u'n kyximju' ajq'oj toj Esb'on
tu'n tkub' naju' nintnam Moab'.
Ikxta Madmen, kb'el xitu'na,
ex lay qjen tipanju' q'oj ti'ja.
3Njaw kyẍch'i'n xjal toj Oronaym:
¡Jun xitb'il ex maqokub'o'lj!
4Makub' xitj Moab';
npon tq'ojq'ojel kyoq'el xjal tu'n b'is tzmajx Soar.
5Inxi'x el ta'lkywitzju'
ljo'n kyjax tk'u'j Luwit;
inxi'x che ẍch'inju' ljo'n kyku'x Oranaym
toj kyoq'el tu'n b'is tu'n tpaju' xitb'il.
6¡Kukyoqe'! ¡Lwiyx, alkye kb'antel tklontetib'!
¡Che okxe' kse'n ch'i'x k'ul toj chq'ajlaj!
7Q'uqlitoq tk'u'ja Moab' ti'ju' tipumala
ex kyi'j tq'inumala,
extzun ikxta ktzyetela.
K'elex q'i'n kyemos ju' tdyosa ti'jxi' ttx'otx'a,
kyuk'i'lxi' pale exqe' nimaq kyoklen nche ajb'en twitz.
8Tzulte xitb'il kyoj kykyaqilju' nimaqtnam,
ex mix-a'lo'te kkletel,
che kjel xitu'n b'ya' ex witz.
Ayine' Dyos Manb'aj nchin yolin.
9Kyq'onke' jun t-xik' Moab',
qu'n kb'el xitu'n,
majx che kjel xitju' nimaqtnam toj
ex mix-a'lo'tl kjelten najal toj.
10(¡Tzajxwit taq'wix tib'aju' mintb'incha'n aq'untl tu'n tkyaqil tk'u'j, ju' oqxena'n tu'n Qman Dyos!
¡Tzajxwit taq'wix tib'aju' min xb'yon xjal!)
11Matxi' che anq'in aj Moab' kukxju' toj nak'b'il, b'ajx che exa'xi' q'i'n ti'jxi' kytx'otx'. Ikse'n b'in naq nkyajten, min nelb'et toj jun lmet tu'nwt tik'x toj juntl lmet, qu'mtzun min nkub'naju' tk'ok'jal ex tk'ayil.
12Atzunte Qman Dyos intma'n:
Kpomel q'ij che tzajel nchq'o'ne' xjal tu'n tku'x kyqo'n b'in kyoj txqantl lmet, ex tu'n kykub' kypa'n lmet mixti' kyoj.
13Che b'eltzun ch'ixwi aj Moab' ti'j Kyemos ju' kydyos, kse'nqe' aj Israel e'kub'ch'ixwi tu'n tpaj B'etel, jaq'uqla'toq kyk'u'j.
14Lalun kyma aj Moab': Kuw qo'qe',
q'ojil qo'ye' nim qipumale', chechiwt.
15Xi'tulju' xitulte Moab' kyuk'i'lxi' nimaqtnam toj;
che kyimelkye' tb'anil ku'xun toj.
Ikyju' ntma'n Nimaqkawil, a tb'iju' Qman Dyos nimtipumal.
16Xi' tul lq'e xitb'ilte Moab',
naqxi'x tu'n tkub'o'ljtel.
17Kykyoq'e' ti'j Moab',
aye'ye' nqaku' ta'qe'ye' tk'etz,
ex kymame' kjalu:
¡Kyka'yinxpe'ye' majx makub' xitju' tkawb'il
majx kuw ex tb'anilxi'xtoq!.
18Tku'tza toju' oklenj jata'ya, nintnam Dib'on,
ex qeku'ya twitz tx'otx' tzqij,
qu'n xi'tulkanunju' xitul ti'ja
ex matxi' che kub't-xitu'n tkuwala.
19We'ku'ya nintnam Aroer
ttx'u'kju' b'e ex ka'yinxa,
xjeluna kyeju' itz'qe'x titi' xb'aj.
20Matxi' kub' me'sa'n Moab' inxi'x xob'.
¡Che oq'e' tu'n b'is ti'j!
¡Kymanxe' tqanil toju' nin a' Amon
qa matxi' kub' xitu'n Moab'!, chi Qman Dyos.
21Ulkanunju' tz'e'ysb'il witzb'aj b'antnitlti'j kyi'ju' nimaqtnam kywi' b'us Olon, Jaas, Mepaat,
22Dib'on, Neb'o, B'et-dib'laym,
23Kyiryataym, B'et-kamul, B'et-meon,
24Kyeryot, B'osra ex kykyaqilju' nimaqtnam toj Moab', nqaku' ex najchaq ta'qe'.
25Intma'n Qman Dyos kjalu:
Matxi' taqk'uju' tipumal Moab',
ex xitjnitlju' toklen.
26Che kytx'ojsanku'ye aj Moab',
qu'n ma jawkyi'nkyib' ti'j Qman Dyos.
Oktzun t-xq'ipu'tib' Moab' tiju' t-xab'
ex kykyaqil che xmayil ti'j.
27Aj Moab', intoqna' che xmayine' kyi'j aj Israel
ntoq che kub'kyoli'ne' tuk'i'l ik'b'il,
kuxi'xtej jun eleq'.
28Che kyq'onqe'kje' nimaqtnam, ju' najlqe'ye' toj Moab',
kukyxi'ye' najal kyoju' piky kse'nqe' xlak'uk'
nb'aj kyb'incha'n kyja kywitz xaq.
29Ojtzqi'nxi'x nxi'x tnima'ntib' Moab':
inxi'x jawtlaq'b'a'ntib' ex ntpi'ssa'ntib'.
30Ex tojtzqi'n Qman Dyos tx'u'j kywi',
naq nkyla'ji'nkyib' ex nche xob'tzan.
31Qu'mtzun chi oq'ele' ex chin b'isule'
ti'j tkyaqilju' tnam Moab'
ex kyi'ju' ichan aj Kyir-eres.
32Chin oq'ele' nimxi'x ti'ju' tqan ub'a toj Sib'ma,
kyewitzju' woq'e' ti'j Jaser.
B'je'xniqe'toqu' tq'ob' ti'j ninnjab'
pomniqe'toq tzmajx Jaser.
Atzu'n ja'lu matxi' kub'o'lju' twitz tu'ntoq tjaw.
33Mixti'tlte sich' te tzalajb'il
kyoju' awal toj Moab'.
Matxi' b'aju' b'in kyoju' k'ub'lte.
Miaxa'lo'tlte tu'n pch'unte ub'a,
mixti'tlte b'itz te tzalajb'il.
34Nche ẍch'in aj Esb'on tu'n b'is,
q'ojq'ojqe' tzmajx Elale ex Jaas,
ex tzajx Soar ponx Oronaym ex Eklat-selisiy,
qu'n expe' tzqij qe'tlju' t-xiklil a' toj Nimrim.
35Intma'n Qman Dyos:
Che b'el nyupi'nwe' aj Moab'
ju' nche jawx kywi'witz kyoj q'olb'eb'l kye witzleb',
q'ol chojb'il ex sturak kywitz kydyos.
36Qu'mtzun nxi'x chin b'isune' ti'ju' tnam Moab'
ex kyi'ju' ichan aj Kyir-eres
kyuk'i'l xux te kyimni,
qu'n naqẍe kub' naju' tq'inumal b'aj tchmo'n.
37Kykyaqil xjal elkyjon kywi' ex kyxmatzi,
mab'aj kyk'ixb'sa'n kyq'ob' kykyaqil
ex mab'jo'k kyq'o'n kyi'j te b'is.
38Naq oq'e'n nnok
kyoj kykyaqil tx'otx' plansa'n
ex xky'ichb'e toj Moab',
qu'n makub' npẍu'ne' Moab'
kse'n jun k'wil mixti'tl tajb'en.
Ayine' Dyos Manb'aj nchin yolin, chi Qman Dyos.
39¡Che oq'e' ti'j Moab'!
¡Inxi'x xob' b'a'nxi'x!
¡Nxitewa'n twitz toj tch'ixaw!
Matz'ok taq'wixi'x ex ik'b'iltwitz
kye kykyaqilju' nqaku' ta'qe' tk'etz.
40Intma'n Qman Dyos:
Tzul tzaqpaju' ajq'oj ti'j Moab'
kse'n jun q'anjel lik'u'nqe' t-xik'.
41Che kb'el tz'aqu' nimaqtnam e' tkuwal
toj tq'ob'ju' ajq'oj.
42Lay tentlju' nintnam Moab',
qu'n majaw tiq'i'ntib' wi'je'.
43Qu'mtzun nchin yoline' ayine' Dyos Manb'aj:
Ikyche okyela' xjalju' najlqe' Moab'
kse'n txkup xla'ja'nqe' kyu'n ub'al
naq tu'n kyxitz'aqtl toj jul mujqa toj xpatxab'.
44Aju' matzaqpaj kye ub'al kxel tz'aq toj jul.
ex aju' majatz toj jul kb'eltz'aq toj xpatxab',
qu'n tzul nq'o'ne' tq'ijlalil
tz'e'ysb'il twitz Moab'.
Ayine' Dyos Manb'aj nchin yolin.
45Junjun mixti'tl kyipumal nche kub' oq
jyol kolb'ilkye toj t-xlekumal Esb'on;
atzunte Esb'on, ninttanam nimaqkawil Siyon,
inb'aj tu'n q'aq', ex nximlenju' q'aq'
nche b'ajtwanju' k'ul toj Moab',
aju' tnam nxi'x tnima'ntib'.
46¡Malayxwita Moab'!
¡Ttanam Kyemos, matxi' b'o'lja!
¡Che kxelq'i'n tk'wala ex tmyala toj juntl tnam!
47Yajxi'tzuntel knch'exb'eye' tanq'ib'l Moab';
ayine' Dyos Manb'aj nchin yolin, chi Qman Dyos.
Who We AreWhat We EelieveWhat We Do
2025 by iamachristian.org,Inc All rights reserved.
