Sal 102 - Mam Ostuncalco Bible

Tna'j Dyos jun xjal nb'isun

1Nman Dyos, b'intzju'ya nna'j Dyose',

¡ponxwitju' nkub'sb'ile' twitza!

2Lalun txitewa'n twitza weye'

qa nchin b'isune';

¡b'inchama xtalb'il chin tb'itza!,

¡lwiyx chin ttzaq'wetza ajntxokone' teya!

3Qu'n xitkub' b'aju' nchwinqlale' kse'n sib',

inche k'antju' nb'aqile' naku'j ttxalq'aq',

4matxi' kub'numj wanmiye'

kse'n k'ul nkub' tzqij;

¡expe' mixti'x q'aq'a'n wi'je'!

5Matxi' tz'ok b'aju' ntz'umale' ti'j nb'aqile'

tu'nju' nchin oq'e'.

6Ikyqinju'ye' kse'n jun tukru toj chq'ajlaj,

kse'n jun tukru kyxol ttx'anqa'n ja.

7Min nchin wtane'.

Ikyqinju'ye' kse'n jun pich' tjunal twi' jun ja.

8Kukx wok ik'le'nju'ye' kyu'n wajq'oje

ex nnajb'enju' nb'iye' kyu'n te qanb'il myab'a'n.

9Tza'j nxinwane' te t-xel nwaye';

ex nxi' simli ta'l nwitze' toju' nk'wa'ye',

10tej saj ttx'u'jila ex tq'oja,

injaw tiq'i'na tu'n nkub' t-xontla.

11Kxi' tkub' naju' nchwinqlale' kse'n leku'n;

xi' wok tzqije' kse'n itzaj.

12Atzunta Nman Dyos, in kawina tejumajx;

¡ktzajel na'n tb'iya kukxju'!

13Q'i'nktztib'a, q'aq'antz tk'u'ja ti'j Syon,

qu'n matxi' japun tq'ijlalil;

¡matxi' ponju' kmuj tu'n tnajsanteju'ya kyil!

14Kye kyilwiju' tab'jil ttapi kyu'nju' tmajena;

¡inxi'x exch'yonju' xitb'il toj kyk'u'j!

15Kykyaqilju' nimaqtnam ex nimaqkawil twitz tx'otx'

kkynima' tb'i Qman Dyos tb'anilxi'x

16ajtjaw tb'incha'n jumajtlju' tnam Syon

ex ajtyek'u'ntetib' toj tajwalil,

17ajttzajtb'i'n tna'j Dyosju' xjal mixti'x te

ktzajel tb'i'nju' tkub'sb'il.

18B'a'n tu'n tkyej tz'ib'et ja'lu

kyeju' che ul itz'ji yajxi'tl,

tu'n tjaw kynima'n Qman Dyos.

19Tzaj tka'yi'n Qman Dyos tx'otx' tzmax toj kya'j,

toju' tnajb'il xjan,

20tu'n ttzaj tb'i'n tq'ojq'ojel kywi'ju' presi'nqe'

ex tu'n kykletju' b'entnitlti'j tu'n kykyim;

21tu'ntzun tjaw nima'n tb'i Qman Dyos,

ex tu'n tpakb'anjtz toj tnam Syon ex toj Jerusalen

22ajtb'aj kyb'u'yi'n kyib'ju' xjal

te kykyaqil nimaqtnam tu'n kyk'ulun te.

23Matz'el tiq'i'n wipumale' toj nik'jan b'e;

mattaqk'u tq'ijlalil nchwinqlale'.

24Inxi' nkub'sa'ne' te: Nman Dyos,

lalun taja tu'n nkyimnaje' toj nik'janju' tq'ijlalil nchwinqlale' Nchije'.

¡Mixti'ta b'ajsb'il te!

25Tkuwsaju'ya tx'otx' atxi'x t-xe tnejel;

aku'ya kub' b'inchante kya'j.

26Kykyaqil ja'lu kche b'ajel,

atzunta majx atiya.

Kb'ajel tkyaqil ja'lu, kse'n xb'alun;

¡ktch'ixpu'ya, kjeltzuntz ch'exb'e'ntl,

kse'n jun xjal ajtel tch'ixpu'n ti'j!

27Atzunta axteju'ya;

mixti'x b'ajsb'il kyeju' tab'q'iyila.

28B'a'n che anq'ila' kyk'walju' tmajena tu'na;

kche tenb'il twitza. Chiju' b'itzal.