Is 64 - Mam Ostuncalco Bible

1Naqwit txitlaqu'na kya'j ex tu'n tku'tza

tu'n kylu'lunju' witz teya ajtula,

2kse'n ajkyb'aj tz'e'yju' ch'i'x tu'n q'aq'

mujqa kse'n ajtloqlon a' tu'n.

K'eleltzun kynik'ju' tajq'oja ti'ju' tb'iya

ex che lu'lulju' nimaqtnam twitza.

3Tej tb'inchanteya ti'xti' xob'ajilqe'x naqmix qnab'ene',

tej tku'tza, eb'aj lu'lunju' witz teya.

4B'ajx b'injtza' ex b'ajx tz'ilwa'xi'tl

qa atiwt juntl dyos ti'jxi'ya

inwt che tb'incha'n ti'xti' lu

o'nb'il kyeju' q'uqlok kyk'u'j ti'j.

5Intk'mo'n teju'ya nb'inchante b'a'n tuk'i'l tzalajb'il

ex ntzajtna'n tu'n tb'inchanteju' tajb'ila.

Matzaj ttx'u'jila qu'n mana' qo b'inchan ile';

matxi b'et q'ij nokqq'o'ne' ttx'u'jila.

6Qkyaqile' ikyqo'ye' kse'n xjal tz'il;

tkyaqilju' qaq'unb'ene' b'a'n ikyqe' kse'n ẍb'u'y tz'il;

qkyaqile' xqo okye' kse'n t-xaq tze nb'je'l tz'aq,

ex nqo'x kyiqa'ne' b'yojxjali'n eqb'inchaye' naku'j tu'n kyq'iq'.

7Mix-a'lo'tlte nxina'nteya

ex mix-a'lo'tl noktq'o'ntilil tu'n tqe tk'u'j ti'ja;

qu'mtzun makub' tewa'ntib'a qeye'

ex maqo kyej tq'o'na tu'n kypaju' qb'inchb'aje' myab'a'n.

8Tu'npetzunju' aya qmane', Nman Dyos;

tx'otx' qo'qe', ateju'ya b'inchal k'wil;

¡aya kub'inchanqeye' qkyaqile'!

9Nman Dyos, lalun q'ojinxi'xa qi'je'

ex lalun tzaj tna'ntla qb'yoj xjali'ne'.

¡O'ttanam qo'na'ya!

10matxi' che kyej chq'ajlajixu' xjan nimaqttanama

naq tik'lentlju' Jerusalen kub'ni xitj.

11Kub' xitju' najb'il xjan tb'anilxi'xtoq tu'n q'aq'

janajwalinjtza'toqa kyu'n ojtxi' qchmane'.

¡Tkyaqilju' nxi'xtoq qo tzalaje' ti'j, xitjniqe'tl!

12¿Mixtzunti'x ktb'incha'ya tu'n tkyaqil ja'lu, Nman Dyos?

¿Mamixti'xte ktma'ya tu'n

ex maqob'el tme'ssa'n xi'xtla tejumajx?