Lv 21 - Mam Ostuncalco Bible

Nuk'b'il kye pale

1Tzaj tma'n Qman Dyos te Moyses ikjalu:

Q'manxa kye pale tyjajil Aaron tu'n lalun kytz'ilsa kyib' tu'ntpaj jun kywitze'l kyimnitl,

2o'kx tu'n tok kymko'n jun kyimniju' qa kytxu, kyman, kyk'wal, kymyal, kytzik

3mujqa kyanab' na'mx tmje najlix kyuk'i'l, qu'n na'mxna' tmje; maskye makytz'ilsa kyib' tu'n kpaju' lu.

4Atzu'n qa jun kyimni kywitze'l mjeb'nil, mixti' tu'n tok kymko'n.

5Mixti' tu'n tel kyjon kywi', tu'n tel kyjso'n kyxmatzi, ex mixti' tu'n kyk'ixb'sante kyib',

6naq o'kx tu'n tb'aj kyxjansa'n kyib' nwitze' ayine' Dyos Manb'aj ex mixti' tu'n tkub' kytxa'ju'n nb'iye', qu'n aye' che kb'el q'onteju' oyaj tz'e'ysa'n exju' wab'j nwitze'; qu'mtzun ati tu'n kyten xjansa'nqe'.

7Ex mixti' tu'n kymje tuk'i'l jun qya ajpajil, tuk'i'l jun qya b'ajni yaju'n, mujqa tuk'i'l jun qya kub'ni tpa'ntib' tuk'i'l tchmil, qu'n xjansa'nqe' nwitze'.

8Pa'nqemila ti'j tkyaqil, qu'n aye' che kb'el q'onte wab'j nwitze'. Ex che okyel xjan teya, qu'n ayine' Dyos Manb'aj, xjan qine' ex ayine' inchin xjansankye.

9Qama tz'el twi' ajpajil tmyal jun pale, tch'ixaw tman sel tiq'i'n ex ati tu'n tkub' tz'e'yset itz'x.

10Matxi' tk'amju' kynejel pale toklen tu'n tok toksa'nju' t-xb'alun xjansa'n, qu'n matxi' jax q'etju' aseyt te xjansb'il toj twi'. Qu'mtzun mixti' tu'n ttenju' twi' chitpu'n ex mixti' tu'n t-xi' tlaqu'n t-xb'alun tu'n tpaj b'is;

11ex mixti' tu'n tokx jata' jun kyimni: maskye tman mujqa ttxu, tu'n lalun ttz'ilsatib'.

12Mixti' tu'n tetz toju' njaye' xjan ex mixti' tu'n ttz'ilsante, qu'n oje kub' q'et aseyt te xjansb'il toj twi' tu'n tajb'en weye', ayine' Dyos Manb'aj.

13A t-xu'jilju' ktzajel tiq'i'n aju' na'mx txi' tzyu'n tu'n jun ichan.

14Mixti' tu'n tmje tuk'i'l jun qya kyimni tchmil, kub'ni tpa'ntib' tuk'i'l tchmil, kub'ni yaju'n tu'n ichan, mujqa twi' ajpajil; a te k'okyelju' te t-xu'jil jun txin twitze'lx b'ajx txa' tzyu'n tu'n jun ichan,

15tu'ntzun lalun kub' b'aju' tyajajil kyxolju' twnaqil; qu'n oje nxjansaye', ayine' Dyos Manb'aj, chi Dyos.

Maqb'il tu'n miche oka' te pale

16-17Tzaj tma'n Qman Dyos te Moyses ikjalu:

Q'manxa te Aaron qa okxe'l qex ja'lo, lay txi' q'et anb'il te junju' tyajajil ati ttzakajil tu'n tkub' tq'o'nju' oyaj wab'j nwitze'.

18Qu'n axxi'x, mix a'lo' jun ati ttzakajil tu'nwt tkub' tq'o'nju' lu: qa moẍ, kox, tzkaj ttxa'n mujqa t-ẍkyin,

19qa toqjni tqan mujqa tq'ob',

20qa k'o'lti'j, tal b'o's twe', muj kyi'j twitz, ati ẍal ti'j mujqa b'je'tzni poq'li ti'j, mujqa tzkajqe'ju' tb'aq'.

21Mix a'lo' jun tyajajilju' pale Aaron, ati ttzakajil tu'nwt kykub' tq'o'nju' oyaj nwitze' ju' inche tz'e'yset; myab'a'n tu'n kykub' tq'o'nju' oyaj wab'j nwitze' ayine' Dyos Manb'aj.

22B'a'n tu'n twanteju' oyaj lu, ex kyi'ju' xjanqe' ex xjanqe'xi'x,

23atzu'n ti'jxi'ju' xb'alun te aq'pub'l mixti' tu'n tokx ex mixti' tu'n tpon lq'e tk'etzju' q'olb'eb'l, tu'n lalun ttz'ilsa toklenju' njaye' xjan tu'n ttzakajil. Ayine' Dyos Manb'aj nchin xjansante, chi Dyos.

24Aye'xtzun yol ja'lu xitma'n Moyses te Aaron, kye tk'wal ex kye kykyaqil aj Israel.