Os 2 - Mam Ostuncalco Bible

1Kxe'ltzun kyma'ntze' kye kyitz'ine' mo kytzike' kjalu:

Ttanam Dyos

ex kxe'l kymane' kye kyanab'e':

Matzajlaqj tk'u'j Dyos kyi'je', chechiku'ye'.

Elkypa'n kyib' aj Israel ti'j Qman Dyos

2Chi Qman Dyos kjalu:

¡Kypoqonxjuye' kytxuye', kypoqonxe',

qu'n mya nxu'jiltlwe' ex myayintlwe' tchmil!

¡Tu'n lalun tz'ajpajintl!

¡Ex tu'n lalun che ku'xtentl tajpaj titk'u'j!

3Qatzun min xkyaj tkyajsa'n, majxtzun kb'el nẍb'iqb'a'ntze'

majx kjel ẍb'iqe' kse'nx tej titz'ji,

kjawil b'ent wu'ne' te jun chq'ajlaj

majx kjel te tzqij tx'otx',

expe' kkyimel tu'n k'waj wu'ne'.

4Lay tzaj laqj nk'u'je' kyi'ju' tal,

qu'n toj ajpaji'n ẍetzaja'ti'n.

5Matxi'ju' kytxu toj ajpaji'n;

mix-a'lotlte nniman te, tej tmante:

Machinxe' jyolkye wajpaje',

aye' nche tzaj q'onte nwaye' ex nk'wa'ye',

e'tzmal nrite' ex nxb'alune' tz'umin,

ex waseyte' kyuk'i'l nk'wa'ye', chij.

6Qu'mtzun kb'el njpu'ne' tb'e tu'n ch'i'x

ex k'okyel nch'laji'ne' ti'j,

tu'ntzun lalun tz'el yal tb'eyil tu'n.

7Kxe'l lpe kyi'j tajpaj extzun lay kub'kyi'j tu'n;

Kjyol kyi'j, ex lay che elyal tu'n.

Ktma'tzuntz kjalu:

K'anjel wi'je' tk'etz tnejel nchmile',

b'a'ntoq tinqina'we' tuk'i'l kyetwitz ja'lo, chiku'.

8Min selte' qya lu tnik'

qa ayine' nchinxtoq q'onte

ttriy, tb'in ex taseyt;

ayintoqe' nchin jaw chmet-sante

t-saqpwaq ex tq'anpwaq xkub' tb'incha'n twitzileb' tu'n.

9Qu'mtzun, k'elel wi'ntle' te

k'anjel wi'ntlwe' ntriy ex nb'in

toju' q'ij ajtjaw b'uyit awal,

ex k'anjel wi'nwe' tzmal nrit ex nxb'alun tz'umin,

xinq'o'ne' te ktxub'lte.

10Kywitzku' tajpaj

kb'ela' nẍb'iqb'a'ne'.

¡Mix-a'lo'x jun kklolte toj nq'ob'e'!

11Kb'el nnajsa'ne' ttzalajb'il,

e'tninq'ij ex ak'a'j xjaw,

exqe' tq'ij te ojlab'l

ex tkyaqilju' tninq'ij.

12Kb'el nxitu'ne' tqan t-ub'a ex tqan t-iw,

aye'ju' intoq tma'n kyi'j:

Atzun chjob'lteju' lu

tzaj kyq'o'n wajpaje', chij.

kjawil b'ent wu'ne' te jun tx'otx' mixti' tawal,

kb'ajel kywan toj k'ul txkupju' k'ul toj.

13Kb'el ntz'e'ysa'ne' twitz tu'nju' tq'ijlalil

xkub' tq'o'n sturak kywitz witzileb',

tej intoq achun kyoj tu ex t-xmilq'ob'

lepchiktoq kyi'ju' tajpaj

ex matzik' nna'le' tu'n.

Ayine' Dyos Manb'aj nchin q'mante, chi Dyos.

Ntk'u'jla'n Qman Dyos Israel ttanam

14Tu'npetzunju', k'okyel nxmoxi'n jumaqjtle':

kxe'l wi'ne' toj chq'ajlaj

kchin yolitle' te tu'n toklaqtl wi'je'.

15Kxe'l nq'o'ntle' tqan t-ub'a,

ex kjawil b'entju' b'ya' Akor wu'ne'

tu'n tqe jumajtl tk'u'ju' qya.

atzuntzu' ktzajela' ttzaq'we'n weye' kse'n toj tku'xumal,

kse'n toju' q'ij tej kyetzju' ntaname' toj Ejipt.

16Ktzajel tma'ntzuntz weye' kjalu: aya nchmile',

mya tu'nwt ttzajtma'ntl, Nb'aal chiwt.

Ayine' Dyos Manb'aj nchin q'mante.

17Ex kche elel wi'ne'

kyb'i twitzleb' toj ttzi,

layx che tzaj tna'ntl.

18Tojtzu'n tq'ijlalil tjawx chix

kjel b'entti'j jun yol wu'ne'

kyuk'i'l tojk'ul txkup, e'pich' exqe' kan;

che k'elel wi'ne' smaj, k'uẍtx'e'nb'il,

ex k'elel wiq'i'ne' q'oj toju' tnam lu,

tu'ntzun ttenju' ntaname' toj nak'b'il.

19K'okyelta Israel te nxu'jile' tejumajx,

k'okyela te nxu'jilkuxi'xe' kse'nxju' ntma'n kawb'il,

qu'n inxi'x chin laqje' ti'ja.

20K'okyela te nxu'jile' ex chin okyele' b'a'n teya,

k'eleltzun tnik'tza weye' ayine' Dyos Manb'aj.

21Ayine' Dyos Manb'aj nchin q'mante:

knb'incha'ye' tu'n tq'onte kya'j,

jb'al tib'aj ju' tx'otx';

22atzunte tx'otx' ktq'a' txqan tawal

triy, b'in ex aseyt,

ikytzu'n kb'antela'ju' b'ya' Jesreel.

23Kb'el nq'o'ne' ntaname' toju' tx'otx',

ex k'okyel we'ku'xi'xe';

ktzajel laqj nk'u'je' ti'j Lo-rwama,

ex kxe'l nma'ne' te: Lo-ami ¡Aya ntaname'!, nchiku'ye',

atzunte ktzajel tma'n weye' ¡Aya Ndyose'! chiku'.