1Nman Dyos, kxel nb'itza'ne' kukxju'
qa b'inchal xtalb'ila;
kxe'l nma'ne' kukxju'
qa in japunxi'x tyola.
2Kxe'l npakb'a'ne' qa tejumajxju' tk'u'jlalila;
ex minti' nch'exb'et tyola,
kse'n kya'j majx ati.
3Kyej b'entti'j jun yol tu'na tuk'i'l Dab'i;
kyej ttziya'na teju' tmajena sk'o'ntl tu'na:
4Knb'incha'ye' tu'n kykawinju'
tyajajila kukxju' te t-xela. Chija te.
5Nman Dyos,
Kykyaqilxju' najlqe' toj kya'j
inche niman teya tu'nju' tyola njapun ex tkyaqilju' tb'inchb'ena tb'anilxi'x.
6¡Mixti' jun dyos, mixti' jun toj kya'j
ikywitju' kse'n aya, Nman Dyos!
7Aya Dyos nim tchiylala ex nim toklena,
txoli'nk ti'ja kyu'n anjl te toj kya'j.
8Nman Dyos, te tkyaqil ipumalj,
teya tkyaqilju' ipumalj ex txoli'n ti'ja tu'nju' ax;
¡mixti' juntel kse'n aya!
9Aya ntzak'unteju' ninnjab' intx'u'jin
tu'na nkub'a' nak'eju' ttolob';
10kub' tpech'u'na Raab'
naku'xwitloj jun kyimni;
mache'x t-slama'nju'ya tajq'oja
tu'n tipumal tq'ob'a.
11Te teju'ya kya'j ex tx'otx';
aya kub' b'inchante tx'otx' ex tkyaqilju' ate' twitz.
12Aya b'inchanteju' ati, tzajx tnayajkya'j pomnix tb'a'nq'ob'kya'j;
nche b'itzanju' witz Tab'or ex Ermon tu'n kytzalajb'il toj tb'iya.
13Nimtipumalju' tq'ob'a;
kuwju' tb'a'nq'ob'a ex inkub'ti'j tkyaqil tu'n.
14A tq'uqlil tkawb'ilju'ya ttxolilti'j ex tnik'alilti'j;
nejlqe' tk'u'jlalil tuk'i'lju' ax twitza.
15Nman Dyos,
ky'i'wla'nte' tnam in niman teya tuk'i'l tzalajb'il
ex in b'et toju' t-spik'umala,
16intzalaj tkyaqil kmuj toj tb'iya
ex intzalaj tu'nju' tz'aqlixi'xa.
17Axxi'x aya tipumal ex tb'anil;
naq tu'n t-xtalb'ila nim qipumale' inten.
18¡A Qman Dyos kolol qi'je'!
¡Ate Xjan tib'aj Israel nimaqkawil qe!
19Jun q'ij yolina toj witzik',
kyeju' tmajena tnik'alkyi'j ex tzaj tma'na kye:
Matxi' jawnsk'o'ne' jun ichan min nxob' toju' ntaname',
matxi' txi' nq'o'ne' toklen ex matxi' woniye'.
20¡Matxi' knetju' nmajine' Dab'i wu'ne'!
Matz'oknq'o'ne' te nimaqkawil tu'n waseyte' xjan
21ex tkyaqil kmuj kwoni'ye'.
¡Knkuwsa'ye' tu'n wipumale'!,
22lay che q'ojinju' tajq'oj ti'j
ex lay kub'ti'j kyu'n b'inchal myab'a'n.
23Che kb'el nb'yo'nju'ye' tajq'oj;
¡che elil wiq'i'ne' twitz!
¡Che kb'el ntoqi'nju'ye' ntx'a'lti'j kyk'u'j ti'j!
24Ktenb'el nk'u'jlalile' ti'j ex kjapumel nyole' te,
ex nim tipumal ktenb'el wu'ne'.
25Knkuwsa'ye' toklen tu'n tkawin
tzajx ttzi ninnjab' Mediteraney, tponx ttzi nin a' Ewprates.
26Ktma' weye': Aya Nmane';
aya Ndyose', klol weye' ex xq'uqilweye'. Chiku'.
27Kxe'l nq'o'ne' toklen te tnejil k'wa'lb'aj,
kyib'aj kykyaqilju' nimaqkawil twitz tx'otx'.
28Ktenb'el nk'u'jlalile' ti'j kukxju',
ex majx kjeltenju' nyole' kyejni b'entti'j tuk'i'l.
29Kche kawilju' tyajajil kukxju' te t-xel
akx atiju' kya'j.
30Qatzun makyej kykolb'i'nju' nxnaq'tzb'ile'
qa min nche anq'in kse'nqe'x nchaq'b'ile',
31qa min ẍejapun nkawb'ile' kyu'n
exqa min nche'x kyb'i'n nchaq'b'ile',
32kb'el ntz'e'ysa'ne' kywitz tu'n tpaj kypi'sal ex kyb'inchb'en myab'a'n
che b'ajel njumane' toj tze;
33atzu'n Dab'i lay b'aj nk'u'jlanteye',
ex ilti'j kjapumel nyole' b'entniti'j tuk'i'l.
34Lay kub' nxitu'nju'ye' nyole' kyej b'enti ti'j tuk'i'l
ex lay nch'exb'eju'ye' nyole' xintziya'ne' te.
35Jumajx oje txi' ntziya'ne' te, toj nxjanile',
ex lay chin chanyole' te:
36kche kawilju' tyajajil te t-xel kukxju',
akx atiju' q'ij.
37¡Ktenb'el kukxju', kse'n xjaw!
¡Ktenb'el kukxju', akx atiju' kya'j! Chija Dyos.
38Tu'npetzunju', matxi' tz'el tik'u'nju'ya
nimaqkawil jawni t-sk'o'na;
¡matxi' jaw tx'u'jina te!
39Matxi' kub' t-xitu'na tyola kyejni b'entti'j tuk'i'lju' tmajena;
matxi' kub't-xonju'ya toklen twitz tx'otx'.
40Macheb'aj t-xopq'i'nju'ya ttapi:
¡ex mache b'ajt-xitu'na nimaqttanam!
41Kykyaqilju' xjal nche b'jik' inb'ajx kyelq'a'n titi'xku' kyajb'il;
inche xmayinkju' tb'esin ti'j.
42Matxitq'o'na kyipumalu' tajq'oj
ex mataja tu'n kyb'aj tzalaj tu'nju' ẍe kanb'an.
43Matz'elti'na twitzteju' tk'uẍtx'e'nb'il
ex min xtkuwsaya toju' q'oj.
44Matz'el ti'na tajwalil;
matxi' kub't-xonju'ya tq'uqb'il twitz tx'otx';
45mattaqk'uya tab'q'iyil tchwinqlal
ex nim tch'ixaw sel tu'na.
46Nman Dyos,
¿ma kukxtzun tkub' tewa'n tib'ju'ya?
¿Ma kukxtzun ktenb'il ttx'u'jilju'ya kse'n q'aq' nk'ant?
47Taye, na'ntza naqch'i'n toju' nchwinqlale';
naq jte' q'ij in anq'inju' ichan kub' tb'incha'na.
48¡Mix-a'lo'te jun xjal in anq'in ex lay kyim!
¡Mix-a'lo' jun kkletil te tipumal kamik!
49Nman Dyos,
¿jatzunta' tk'u'jlalila atitoq tnejel,
ju' kyej ttziya'na te Dab'i tu'n tjapun tu'na?
50Nman Dyos, na'nqe'tzju'ya tmajena
nche ok ik'le'n kyu'n txqan xjal;
ex inche exch'yonju' ik'b'il lu toj nk'u'je'.
51Nman Dyos,
¡iktzun nqo oka' ik'le'naju'ye' kyu'n tajq'oja!
¡iktzu'n noka' ik'le'n tmajenju'ya jawni t-sk'o'na!
52Nimanjtzxwitju' Qman Dyos tejumajx.
¡Ikxwitju'! Chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
