1Nman Dyos,
wajb'ile' tu'n nb'itzane' teya tu'n tkyaqil nk'u'je'
ex tu'nt-xi nchik'b'a'ne' nim tb'inchb'ena tb'anilxi'x.
2Aya atiya toj kya'j,
naq tu'nela wajb'ile' tu'n nẍch'ine' tu'n tzalajb'il;
¡wajb'ile' tu'n nb'itzane' b'itz toj tb'iya!
3In cheb'aj oqu' wajq'oje twitza;
inche kub' tz'aq ex nche kyim.
4Machin tkola toj tnik'alilti'j:
nche oktq'o'na xjal toj xjel tojxi'x tu'me'l kukxju' toj tq'uqb'ila.
5Matxi' che'x ttzak'u'na nche niman kye txqantl dyos,
matxi' che kub't-xitu'na b'inchal taq'wix,
¡matxi' kub' tnajsa'nju'ya kyb'i tejumajx!
6Matxi' kyimju' ajq'oj,
ex matxi' che b'aju' nimaqttanam tuk'i'l;
aya xkub' xitunkye,
ex mixti' jun nab'ab'lkye xkyaj.
7Atzunte Qman Dyos nimaqkawil tejumajx;
makub' tq'o'n tkawb'il tu'n kyok xjal toj xjel tu'n:
8kykyaqilu' xjal twitz tx'otx' che okyel tq'o'n toj xjel tojxi'x tu'me'l,
kb'el ttz'e'ysa'n kywitzju' tnam kse'nxju' kyb'inchb'en.
9A Qman Dyos nklonkyeju' nche yajlanjtz;
inche tklo'n toj tq'ijlalil yajb'il.
10Nman Dyos,
aye'ju' ojtzqilteya q'uqli kyk'u'ju' ti'ja,
mixti' nche kyej ttzaqpi'nju'ya nche jyon ti'ja.
11Che b'itzanqe' b'itze' te Qman Dyos, ju' nkawin toj Syon;
kymanxe' kye tnam aju' matxi' tb'incha.
12Inche tzaj tna'n Dyosju' xjal nche yajti
ex min in ik'tna'lju' kyb'is tu'n;
inkub' ttz'e'ysa'n kywitzju' nche b'iyun kye.
13Nman Dyos, q'aq'antz tk'u'ja wi'je',
ka'yintzpe'ya nchin yajtiye' kyu'n ik'ul weye',
¡chin tiq'imitza ttziju' kamik!
14Kxel nma'ntzuntze' kye xjal ttziju' tnam Jerusalen,
qa o'kxa b'a'n tu'n tjaw nimeta,
exqa nchin tzalaje' tu'nju' ẍin tkola.
15Tojx kyjulju' min nche okslan teya nche ku'xtz'aqa';
inche kyej q'e'tju' kyqan
tojxju' kyxpatxab' e'wa'n kyu'n.
16Matxi' tyek'utib' Qman Dyos:
¡tu'nju' tnik'alilti'j xtb'incha!
Nkyaj jupliju' b'inchal myab'a'n
tojxju' t-xpatxab' kub'ni tq'o'n.
17Che b'ajelkye' b'inchal myab'a'n exqe' nche niman kye txqantl dyos, toj tkawb'il kamik;
aye' in ik'tna'l Dyos kyu'n;
18lay tzik'kyna'lju' prow tu'n,
ex lay b'aju' q'uqb'ab'l kyk'u'j.
19Iq'i'nktz tib'a Nman Dyos;
lalun taja tu'n tjaw ti'ntib'ju' xjal;
¡Q'onqe'ka nche niman kye txqantl dyos toj xjel!
20Nman Dyos, q'onk tchiylala kye;
¡q'manxa kye qa naq xjalqe'xi'! chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
