1Jun q'ij xi' Sanson toju' nintnam Kasa. Oktka'yi'n jun qya naq eqch kyuk'i'l ichan atzu', ex okx toj tjaju' qya tu'n tkyejten tuk'i'l te qonik'an.
2Tetzunj kyb'inteju' xjal aj Kasa qa atitoq Sanson toju' nintnam, b'jo'k kytxoli'n kyib' ti'jile; ex b'aj q'ij kyu'n xq'uqilte ttziju' nintnam. Exi'tzuntz wtal te qonik'an, toj kynab'l qatoq kb'el kyb'yo'n ajqsqix.
3Atzunte Sanson naq nik'jan qonik'an wtan. Texi'x tk'u'j aq'b'il tjawe' ex b'jatz t-xb'oqi'n tjpelju' nintnam kyuk'i'lxi' tqul ex xtanb'ilte, eb'jax tq'o'n tkyaqil ti'j tqul, jax tiqa'ntzuntz twi'ju' witz ati tk'etz Eb'ron.
Sanson tuk'i'l Dalila4Yajxi'tzuntel oklaqj Sanson ti'j jun qya Dalila tb'i, najlitoq toju' b'ya' Sorek.
5Aye'tzu'n kynejel pilistey exi' tk'etz Dalila ex xikyma'n te kjalu:
—Sb'unku'ya Sanson ex jyoma tu'me'l tu'n teltnik'a ja ntzaja' tipumal nimxi'x, ex se'n taq'wi tu'n tkub'ti'j qu'ne'; tu'n tb'ant tk'let ex tu'n ttzyet qu'ne'. Tu'ntzu'n tajb'eb'la lu, teyle junjunqe' kxe'l tq'o'n kab'k'al o'lajnaq 1,100 saqpwaq teya, chechij.
6Xitzun tqani'n Dalila te Sanson kjalu:
—Q'mantztzunta weye' ja tu'me'l ntzaja' tipumala nimxi'x. ¿Ma ati jun tu'me'l tu'n tkub'k'leta ex lay b'ent ttzaqpaja? chij.
7Xi'tzun ttzaq'we'n Sanson te:
—Qama chin kub'k'lo'ne' tu'n wuq tz'u'n aqwil cha'x, oktzun k'elel wipumaltze' ex chin okyele' kse'n alkyexku' xjal, chij.
8Xi'tzun kyiq'i'n kynejel pilistey wuq tz'u'n aqwil ak'a'jqe' te Dalila, kub'tzun tk'lo'n Dalila Sanson kyu'n aqwil lu.
9Matxitoqtzun che okx tewa'n jte' ichan toju' tja, jawtzun ẍch'in:
—¡Sanson, luqe' pilistey che ul ti'ja! chij.
Atzunte Sanson b'je'l tlaqu'nju' aqwil, naku'j jun tal ky'jaj tz'e'ynaqtl te. Ex min nelkynik' pilistey ja ntzaja' tipumal.
10Xitzun tma'n Dalila te:
—¡Machin kub' t-sb'u'na! ¡Naqpelo taky'i'na weye'! Q'mantz tzuna weye' axxi'x, titi' ati tu'n tb'inchet tu'n tb'ent tk'leta, chij.
11Xitzun tma'n Sanson te:
—Qama chin kub'k'lo'ne' kyu'n nimaq aqwil ak'a'j b'ajx che ajb'ena', k'eleltzun wipumaltze' ex chin okyele' kse'n kykyaqil xjal, chij.
12Tzajtzun tiq'i'n Dalila jte' nimaqkawil ak'a'j ex kub' tk'lo'n kyu'n, jaw ẍch'intzuntz:
¡Sanson, luqe' pilistey che ul ti'ja! chij.
Ex toju' maj lu matxitoq che okx tewa'n Dalila jte' ichan toju' tja; atzunte Sanson eltlaqu'nju' nimaq aqwil naku'j tal q'in ẍk'li'k te.
13Xitzun tma'n Dalila te Sanson:
—¡Kukx nkub' t-sb'u'nju'ya! ¡Kukx tchan yolju'ya weye'! ¡Q'mantza weye' titi' tu'n tb'inchet tu'n tb'ent tk'leta! chij.
Xi'tzun ttzaq'we'n Sanson te:
—Xpatx'inxa wuq tneju' t-xya'mal nwi'ye' kyuk'i'l tq'inil chemuj ex awanku'xa stak kuw toj tx'otx'. K'eleltzun wipumaltze' ex chin okyele' kse'n alkyexku' xjal, chij.
Kub'tzun twat-sa'n Dalila Sanson, ex kut-xpatx'i'n wuq tneju' twi' Sanson kyuk'i'l tq'inil chemuj,
14kux tpoji'ntzun staktz b'a'nxi'x toj tx'otx', jawtzun ẍch'intz:
¡Sanson luqe' pilistey che ul ti'ja! chij.
Atzunte Sanson jaw we' ex majx b'jatz xb'oqliju' stak toj tx'otx' exju' chmob'l xb'alun tu'n.
15Xitzun tma'n Dalila te:
—¡Chalyol! ¿Tiqu'ntzun ntma'na qa nxi'x chin tk'u'jla'na? Matxi' b'ent oxmaj nchin kub' t-sb'u'na, ex na'mx ttzaj tma'na weye' ja ntzaja' txqan tipumala, chij.
16Tu'ntzunju' nxi'xtoq wulin Dalila, ax t-xjelju' tkyaqil maj, matxitoq sikti Sanson ex tajb'iltoq tu'n tkyim;
17xi'xtzun tma'ntz te Dalila ja ntzaja' tipumal:
—Mix-a'lo'xi' jun tz'el jonte t-xya'mal nwi'ye', qu'n xjansa'n qintltoqe' twitz Qman Dyos na'mxtoq witz'jiye'. Qatzun matz'el jonju' t-xya'mal nwi'ye', knajelju' wipumale', chin okyeltzuntze' mixti' wipumale' kse'n kykyaqil xjal, chij.
18Tetzunj teltnik' Dalila qa xitma'n Sanson axxi'x te toju' maj lu ja ntzaja' tipumal, xitchq'o'n tq'umli kyeju' kynejel pilistey kjalu:
—¡Kutzun kytzaje' ja'lo, qu'n matxi' tzaj tma'nte Sanson weye' ja ntzaja' tipumal! chij.
Exi'tzu'n pilistey tk'etz Dalila ex xikyiq'i'n pwaq.
19Kub'tzun twat-sa'n Dalila Sanson, kub' tkuẍb'a'n twi'tqan, ex xitma'n te jun ichan tu'n tel tjonju' wuq xpatx'b'ente twi'. Aq'witzuntz ililte Sanson,
20ex xit-ẍch'i'n te:
—¡Sanson, luqe' pilistey che ul ti'ja! chij.
Tzajtzun tna'ntib' Sansontz, toj tnab'l qatoq kb'entel tklet kse'nxju' matxitoq tzajxi', qu'n mixtoqti' b'i'n tu'n qa matxitoq kyej tzaqpi'n tu'n Qman Dyos.
21Tzyettzuntz kyu'n pilistey ex eb'je'tz kyiq'i'n tb'aq' twitz, xikyiq'i'ntzuntz toj tnam Kasa, jab'aja' kyk'lo'n tu'n xpatx'q'ank'uxb'il ex okkyq'o'n aq'unal ti'j jun cheb'l triy toj kars.
22O'kx taq' ch'iyel jumajtlju' t-xya'mal twi'.
Tkyim Sanson23B'aj kyb'u'yi'n kyib' nejenel pilistey tu'n tkub' kytzalajsa'n tkub'lenti'j Sanson kyu'n, ex tu'n t-xi' kyq'o'n chojb'il te Dakon ju' kydyos. Intoq xikyb'itza'n kjalu:
Matxi' kub'tz'aq qajq'oj Sanson toj qq'ob' tu'n qdyos, chechij.
24Tetzunj kyka'yinte xjalu' Sanson, ex ikxkye eb'itzan ex jaw kynima'n kydyos, inkyma'n ikjalu:
Matxi' kub' tz'aq Sanson qajq'oj toj qq'ob' tu'n qdyos, ju' toktoq yajlalte qawal toj kojb'il ex nche kub' tb'yo'n qxjalil, chechij.
25Inxi'xtoq che tzalaj, xikyqani'n tu'n ttzaj iq'i'n Sanson kye tu'n kyxja'jayin ti'j. Etzkyiq'i'n toj kars, ojexi'x che b'aj saqchan ti'j Sanson, ex kub' kywab'a'n kyxol tqan ja.
26Xitzun tma'n Sansontz teju' ku'xun xkolte tq'ob':
—Chin tiq'inxa ja tu'me'l b'a'n kyoka' ntzyu'ne' tqan ja iqalteju' ja te k'u'lb'il, wajb'ile' tu'n wok qejeye' kyi'j, chij.
27Ate'toqu' kynejel pilistey kykyaqil toju' ja te k'u'lb'il nojnitoq kyu'n txqan ichan ex qya. Ex ate'toqlo wuqk'al lajnaqtl (3,000) ichan ex qya twi'xi ja, intoq che ka'yin kyi'ju' txqantl intoq che xja'jayin ti'j Sanson.
28Kub'santzun Sansontz twitz Qman Dyos, xitma'n ikjalu: Nman Dyos, b'inchama xtalb'il, chin tna'tztla tk'i'x o'kx jumajtl, q'ontz jumajtla wipumale' tu'n tok tu'me'l t-xel tejumajx kye pilistey tu'ntpaj setz kyiq'i'n kab'e' tb'aq' nwitze', chij.
29Exi'tzun t-xmaka'n kab'e' tqan ja toj nky'ajchaq, aye' iqalxi'x teju' nin ja, exi' tlmo'ntzuntz kyu'n tq'ob', jun tu'n tb'anq'ob' atzun juntl tu'n tnayaj,
30jaw ẍch'intzuntz ex tma: Chin kyimxtzuntze' kyuk'i'l pilistey, chij.
Exi' tlmo'ntzuntz tu'n tkyaqil tipumal, kub'tzun niq'j jatz kyib'aju' nejenel kye pilistey, ex kyib'aj kykyaqilju' ate'toq atzu'. Nimxi'x kyb'aju' e'kub' tb'yo'n Sanson tej tkyim kyekywitzju' e'kub' tb'yo'n toj tkyaqilu' tchwinqlal.
31Eku'puntzun junjun twnaqil Sansontz ex kykyaqilju' twitze'l, jawx kyiq'i'n xikyiq'i'n t-xmilal ex ku'x kymqu'n t-xol Sora tuk'i'l Estaol, toju' muqb'il te Manoa ju' tman. Winqi'n (20) ab'q'i ten Sanson te nejenel kye aj Israel.
Who We AreWhat We EelieveWhat We Do
2025 by iamachristian.org,Inc All rights reserved.
