Ez 47 - Mam Ostuncalco Bible

A' netz toju' tja Dyos

1In okxtiq'i'n jumajtle' ichan ttzi tja Dyos. Wiltzuntze' intoq etz qojl a' tjaq'ju' tjpel ex nxi' tu'me'l tjawetzq'ij, janka'yinxa' tja Dyos. Xi'nku'tza' a' toj tb'a'nq'ob' tja Dyos, nku' toj tnayajkya'j te q'olb'eb'l.

2Inetztiq'i'ntzuntze' toju' ttx'otx' tja Dyos toju' ttzi toj tqb'anq'ob'kya'j, inxitiq'i'ne' ti'jile tzmax npone' toju' qokex toj tiawetzq'ij. Ati jun tal b'o's a' netz toju' plaj toj tnayajkya'j teju' qokyex.

3Etzju' ichan toj tjawetzq'ij iq'i'n jun ky'jaj te echb'il tu'n, kub' techa'n junk'al jo'naq (500) metr ex inik'x tiq'ine' toju' a'; japun a' weye' tqul nqane'.

4Ex kub' techa'n junk'al jo'naq (500) metrtl ex inik'x tiq'ine' toju' a'; japuntzun a' weye' toj nch'ekye'. Xitecha'n junk'al jo'naq (500) metrtl ex inik'x tiq'i'ne' toju' a'; atzu'n a' japun weye' twinẍo'pe'.

5Xitecha'n junk'al jo'naq (500) metrtl, atzu'n a' matxitoq ch'iy nim min b'entl wik'xe' toj; jun nin a'tltoq nim t-xe, o'kx tu'n tb'ant qik'x toj qa b'a'n a' qu'n.

6Tzajtzun tma'n ichan weye': Q'onk kwenta b'a'nxi'x ti'ju' matxi' tila, chij.

Yajxi'tzuntl nxitiq'i'ntle' ttziyele nin a',

7ex wile' ate'toq txqan nimaq tze ttziyile toj kykab'il plaj.

8Tzaj tma'ntzuntz weye': Majx nxi'te' a' lu toju' tx'otx' toj tjawetzq'ij ex npon tzmax toju' nin a' Jordan, ex nponb'aj toj Kyimni Ninnjab'. Ajtzun tpon atzu', kb'el chi'yixju' a' toj ninnjab'.

9Jaxjaku' mapona' a' lu, kb'antel kyanq'in tkyaqil ch'ix txkup ex txqan kyiẍ. Qu'n kjawil ch'i'yixju' k'a a' tu'n a' toju' nin a' lu, che anq'il tkyaqil txkup tu'n.

10Che tenb'el tzyul kyiẍ tzajx En-kadi ponx En-eklaym, ex atzu' che b'ela' kysa'n kypa tzyub'l kyiẍ. Nim chukchaq kyiẍ ktenb'el atzu' kse'nxju' toj Ninnjab' Mediteraney.

11Atzu'n kyoj sob'on ex kyoj xoq'l lay chi'yix a'; pitz'moj a' kjel atzu', che ajb'el tu'n tjatz atz'an kyoj.

12Che ch'iyel tkyaqil tze nel kywitz te lob'j toj kykab'il plaj ttziyileju' nin a'. Layx che kub'jilj kyxaq, ex layx qen kywitzan. Atl xjaw ktenb'el kywitz, qu'n a'li'n kyxe tu'n a' netz toju' ja te k'u'lb'il. Che ajb'elju' kywitz te k'a'chb'il, aye'tzu'n kyxaq te q'anb'il.

Tnaqachalju' tx'otx'

13Ayine' Dyos Manb'aj, nxinma'ne': Aye' tnqachil tx'otx' ja'lu kyk'ma' kab'lajoj (12) tnej tyajajil Israel (kab'e' tmalel kye tyajajil Jse kyetzb'il kyk'ma').

14Oje nmaye' tu'n txinq'o'ne' tx'otx' lu kye ojtxi' kychmane'. Kypa'nxe' junelni kyxole'. A kyetzb'ilju' tx'otx' lu.

15Aju' nqach toj tb'a'nq'ob'kya'j, tzajx ttzi ninnjab' Mediteraney, tu'n tik' jata' nintnam Etlon ex ja ta'qe' nimaqtnam Sedad,

16B'erota ex Sib'raym (ju' ate' toju' tx'otx' Damask ex Amat), ex Asar-atikon (tnaqach tib' tuk'i'l Awran).

17Ikytzu'n, xi'kxe'la' nqach te tb'a'nq'ob'kya'j, tzajx ttzi Mediteraney tu'n tpon tzmax Asar-enan, nche kyejten Damask ex Amat toj tb'a'nq'ob'kya'j.

18Atzu'n nqach toj tjawetzq'ij ktzajelx kyxol Awran ex Damask tu'n tpon tzmax jata' nintnam Tamar, ttzi Kyimni Ninnjab', ale'x tnuqub' nin a' Jordan, k'ajb'el te nqach te tx'otx' Kalaad tuk'i'l Israel.

19Atzu'n nqach toj tnayajkya'j ktzajelx Tamar, tu'n tik' jata' a' toj Merib'a-kades ex tk'etzju' tal a' toj Ejipt, tu'n tpon tzmax ttzi ninnjab' Mediteraney.

20Atzu'n nqach toj tkub'exq'ij, kxe'l ttziyile ninnjab' Mediteraney, tzajx ttzi nqach tuk'i'l Ejipt tu'n tpon tzmax mlaj ttzi Amat.

21Atzun tx'otx' ja'lu tu'n tkub' pa'yet kyxolju' kab'lajoj (12) tnej tyajajil Israel.

22A etzb'ilju' kxe'l kyeye', ex kyeju' najchaq xjal najlqe' kyuk'i'le' ex ate' kyk'wal kyxole'. Ati tu'n kyok kyu'ne' naku'xwitloj e'itz'ji toj Israel. Ajtkub' kyaq'pu'ne' tx'otx' kyxolju' tnej tyajajil Israel, ikxkye kxe'l kytx'otx'.

23Kxe'l kytx'otx'ju' najchaq xjal toj kytx'otx'ju' tnej tyajajil Israel janche anq'ina'. Ayine' Dyos Manb'aj, manchaq'e'.