Pr 19 - Mam Ostuncalco Bible

1Ate b'a'nju' prowqo' qa nqoksla'n Dyos,

kyetwitzju' xnak jk'ulyol.

2Myab'a'nte' nb'ajx qk'u'j ti'jun ti'xti'; ati tu'n qximan nej

ex min nel b'a'n naq wa'lq'e'l nb'incheta'.

3Tu'n t-xnakyil xjal, nela' txalpuj ti'ju' tb'e,

yajxi'tzuntel nnoktq'o'n te tpaj Dyos.

4Qa ati qpwaq nim txqan qamiw,

Atzunte prow xipe' nel ik'u'na' kyu'n.

5Ilti'j ktz'e'ysetel twitzju' mya ax tziyal;

exju' chalyol mixti'x kolb'ilte.

6Nimte' jyolte xjal b'a'n oyin,

ex kykyaqil tamiwileqe'.

7In pena' nel ik'u'n prow kyu'n ttzik mo titz'in,

mitzunlo yakye' tamiw, majx nelkyik'u'n.

8Aju' xjal ntb'incha'n xnaq'tzb'il kse'nxju' ntkno'n,

intk'u'jla'n tib' ex nch'iy toj tkyaqil.

9Aju' mya ax tziyal, ilti'j kb'el tz'e'ysa'n twitz;

exju' chalyol ati tu'n tb'aj.

10Myab'a'n tka'yinx ntzalaju' xnak kyoj achb'il,

mitzunloya jun lq'o'n majen tu'n tkawin kyib'aj nimaqkawil.

11Inten tpasensju' xjal ati tnab'l,

extzun a tb'anilxi'xju' tu'n tkub'najsetju' il.

12A ttx'u'jilju' nimaqkawil kse'n tq'ojq'ojel twi' b'alun aj tzanun,

atzunju' t-xtalb'il kse'n ẍmu's tib'aj awal.

13Jun k'walb'aj xnak nche yajti tman tu'n.

ex ikyte qyaju' noqx nẍalb'i kse'n jun ja ntx'atjne kukxju'.

14Ntzaj kyq'o'n qman qtx'otx' ex qja te qetzb'il;

atzu'n xu'jilb'aj ati tnab'l a Qman Dyos ntzaj q'onte.

15Tu'nju' ky'ejil ntzaj txqan qwatl,

exju' ky'ej kyajtel tu'n we'yaj.

16Alkyete ntb'incha'n chaq'b'il ati tchwinqlal;

alkyetzunte nel ik'unte t-xnaq'tzb'il Qman Dyos, kb'ajel.

17Naku'j te Dyos nxa' tmajina'n xjal nonin tiju' prow,

ex aku'te Dyos ktzajel q'onte tu'me'l t-xel.

18Tzak'umju'ya tk'wala inxku' tq'a' tzak'u'tib',

laytzun majxkub' tb'yo'na toju' tzak'b'il.

19Alkyete' kuw ttx'u'jil ktk'ma' tu'me'l t-xel

myab'a'n tu'n txi' myet qu'n kytzajelxi'x ttx'u'jil.

20B'inkuya nab'l ex k'momju'ya tzak'b'il;

ktenb'eltzun tnab'ltzuya ajttijina.

21Aju' xjal nim txqan t-xim tu'n tb'inchante,

atzunte' Dyos kq'malte qa kjapumel.

22B'a'nte' qa tnik'alti'ju' xjal;

ate b'a'nju' prowqo' kyetwitz tu'n qok chalyol.

23Atite chwinqlal qanb'ina te Qman Dyos;

nqo' tzalaj ex mixti'te' nqo ik'a'.

24Aye'kye' ky'aj kyky'ajpe' tu'n kywan,

noqpe' tu'n txi' kyiq'i'n toj ktzi.

25Ate' xnak ilxi'xti'j kytz'e'ysetil twitz tu'ntzun teltnik';

atzunte' ati tnab'l tu'n jumajxte' q'unb'ente te.

26Alkye matz'ok miltz'ujti'j tman, ex matz'ex t-xla'ja'n ttxu tja

jun nimaq leq' mixti' tch'ixaw.

27Aya nk'yajul lalun tz'el tik'unjuya tzak'b'il

qatzun minti', k'elil txalpuja tiju' tb'eyil nab'l.

28Aju' mya ax tziyal nxmayin ti'ju' kawb'il;

exju' myab'a'n ntb'incha'n noq xlab'yol ntyoli'n.

29Noq tkub'ku'tlte' tz'e'ysb'il kwitzju' b'inchal myab'a'n;

exte' syal ktze'lti'ju' xnak.