1¡Ajwalinjtzxwit Qman Dyos!
¡Tb'anilxi'x tu'n qb'itzan te Qman Dyos!
¡O'kxte b'a'n tu'n qajwalinte!
2Injaw tb'incha'ntl Qman Dyos Jerusalen
ex nche tzaj tb'u'yi'n aj Israel b'je'xniqe' slamj.
3Intq'uqb'a'n kyk'u'ju' aj b'is,
ex nb'aj tq'a'na'nju' kyk'ixb'len.
4A kyej q'onte kyajlanju' che'w,
ex oktq'o'n kyb'i teyle junjun.
5Nimte' Qman Dyos toklen ex nimtipumal;
ex mixti' b'ajsb'il teju' tnab'l.
6Inche jawtlaq'b'a'n Qman Dyos me's,
aye'tzu'n b'inchal myab'a'n nnel kych'ixaw tu'n.
7Che b'itzan qe'ye' te Qman Dyos te aq'b'il chjonte;
kyb'itzanxe' b'itz te Qman Dyos, tuk'i'l chnab' arpa.
8Intktxu'n twitz kya'j tu'n muj,
ntzaj tq'o'n jb'al tib'aj tx'otx',
in tch'isa'n k'ul kywi' witz,
9intzaj tq'o'n kywaju' txkup
ex kywaju' kyal joj aj kyaq' oq'il.
10Myatzu' ntzalaja' te Qman Dyos
ti'j tipumal chej ex tipumal ichan;
11atzu' ntzalaja' te Qman Dyos kyi'ju' nche niman te,
aye' q'uqli kyk'u'j ti'ju' tk'u'jlalil.
12Kyajwali'nktze' Qman Dyos, aj Jerusalen;
ju' najlqe'ye' Syon, kyajwali'nktze'.
13Qu'n e'kyaj t-xtanu'n tjpel kytaname'
ex e'kub' tky'i'wla'n kyk'wale' toju' nintnam.
14Intzaj tq'o'n nak'b'il toju' kytx'otx'e'
ex ntq'uqb'a'n kyk'u'je' tu'n tb'anil triy.
15Intzaj t-sma'n tyol twitz tx'otx',
ex lwiyxi'x nxipuqliju' tyol.
16Intzaj tq'o'n che'w naku'j lan,
ex ntzaj t-sputi'n kse'n quq.
17Intzaj tq'o'n txun che'w naku'j saqb'aqun;
nkub' qtx'e'jixju' a' tu'n che'w ntzaj tq'o'n.
18Ajtzun ttzaj t-sma'nju' tyol, inkub' niwj tu'n;
intzaj t-xupi'n kyq'iq', ex nb'etju' a'.
19Tzaj tyek'u'n tyol, e'tkawb'il ex tnuk'b'il
te Jakob', te Israel.
20Minkxa' tb'inchaju' kye txqantl nimaqtnam,
ju' mixti'x kyojtzqiju' tchaq'b'il.
¡Ajwalinjtzxwit Qman Dyos! Chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
