Zac 9 - Mam Ostuncalco Bible

Tz'e'ysb'il kwitzju' tnam nqaku' te'qe' kyk'etz aj Israel

1A tpakb'al ja'lu tzaj tma'n Qman Dyos tiju' tx'otx' Adrak ex ti'ju' nintnam Damask: Te Qman Dyos qeju' nimaqtnam Sirya, ex ikxqe' tnej kyyajajil aj Israel.

2Ex tete' Qman Dyosju' Amat, nqayin kyk'etzju' nimaqtnam Damask, exju' Tiro ex Sidon tuk'i'lxi'ju' kyanq'ib'l.

3Mache jawtb'incha'n Tiro ja kuwsa'n, ex mache kub' tchmo'nju' q'anpwaq ex saqpwaq kse'n jun ch'uq q'antx'otx'.

4Atzunte Qman Dyos k'elel q'inte tkyaqil ex kb'elex tq'o'nju' tq'inumal toj ninnjab', ex majx kb'el tz'e'ysa'nju' nintnam tkyaqil.

5Ajtka'yinteju' nintnam Askalon, tzul nim xob'ajil ti'j. Ex ikxte Kasa kyajtel nim, exu' q'uqb'ab'l tk'u'j Ekron tzul tz'aq twitz tx'otx'. ¡Kjeltente Kasa mixti'tl tnimaqkawil, atzunte Askalon kjelten mixti' xjal toj!

6Che najalju' xjal smo'n kyyajil toj Asdod, iktzu'n kb'el nme'ssa'nju'ye' nimjtib'il kyeju' pilistey.

7K'elel wi'ne' kychi' tuk'i'l chik' toj ktzi aju' nkch'yo'n, ex k'elel nxk'a'yine' toj ktzi, aye'ju' wab'j minti' tu'n kwante. Kxoltzunju' xjal lu ate junjun che kjelten weye'; che okyel naku'j aj Judaqe', atzunte Ekron k'okyel kse'nqe' jeb'usey.

8Ayintzunwe' atinqine' klolkyeju' weye' te alchaqxkyeku' matzik' tzalu. Aju' tok yajulkye lay tz'oktentl yajulkye, qu'n ayinku'we' chin ka'yilkye ja'lo tu'nku' nwitze'.

Tulilju' jun nimaqkawil

9¡Tzalajxa nimxi'x, nintnam Syon!

¡B'itzana tuk'i'l tzalajb'il nintnam Jerusalen!

Tzulju' tnimaqkawila tk'etza, tnik'alti'j ex ati kanb'ab'l tk'etz,

extzun me's nchejin tib'aj jun b'ur,

tib'aj jun tal b'ur tal jun ttxu b'ur.

10Che kb'el t-xitu'n tkarwaj Eprayin,

exqe' chej toj Jerusalen

exqe' smaj te q'oj.

Ktma' tqanil nak'b'il kyeju' nimaqtnam

ex ktzajelxju' tkawb'il ttzi ninnjab' kpomelx ttzi juntl ninnjab',

tzajx tk'etz nin a' Ewprates ponx b'ajsb'il twitz tx'otx'.

Kjawil b'incha'n jumajtlju' Israel

11A ntma'n Qman Dyos ja'lu:

Tu'nju' chojb'il tu'n chik' tiju' yol kyejni b'entti'j tuk'i'la, Jerusalen,

che jawitz wiq'inju'ye' jpu'nqe'ku'x

toju' xoch mixti' a' toj.

12¡Atixu' oyb'il kyeye' aye'ye' jpu'nqeye',

kutanj kyi'je' toju' ja kuwsa'n!

Kxe'l nmane' kyeye' qa k'anjel wanjsa'n ti'je' ky'i'wb'il

kamajxi'x kse'n matxi' che yajtiye'.

13Ate Juda matxi' tz'ok te nsmaje' te q'oj,

ex matxi' kub' nq'o'ne' jun talsmaj, aju' Eprayin.

Ti'jta Syon kb'ela nb'inchane' jun k'uẍtx'e'nb'il,

kjawil kyiq'inkyib'u' tk'wala kyi'ju' tk'wal Kresya, chi Dyos.

14Ktyek'utib' Qman Dyos tib'aju' ttanam;

che b'ajex t-xonju' tal t-smaj kse'n q'ankyaq.

Kxe'l tq'ajsa'nte Qman Dyos chun

ex kb'etel toju' q'ankyaq te tnayajkya'j.

15Kche tkla'te Qman Dyos nimtipumalju' teqe',

aye'tzunkye che b'ajel kywab'e'n kab'aju' chik'tzeyil

ex che b'ajelju' kyajq'oj kyu'n;

che k'wal ti'ju' kychk'el kse'n nche k'wan b'in,

kche nojel ti'j naku'j nnoj jun ninlaq,

kse'n tuk'a q'olb'eb'l.

16Tojtzu'n tq'ijlalil lu, che tkla' Qman Dyos

ju' ttanam naku'j te jun tnej rit,

ex che qoptz'ajelju' te tojku' kytx'otx'

kse'nqe' tb'anil ab'j te jun koron te oklenj.

17¡B'a'nxi'x, ex xawa'nkuxi'xju' tx'otx'!

tu'nju' kche chmetelju' ttriy exu' tk'wa' b'in,

kche ch'iyelju' ku'xun exqe' qpoj tb'anilqexi'x.