1 Cr 26 - Mam Ostuncalco Bible

Xq'uqil ttzija ex txqantl nejenel toj kawb'il

1Tej kyb'aj aq'pu'n xq'uqil ttzija tu'n kych'exb'ente kyib', e'kyaj kjalu:

Kyxolju' tyajajil Kore, aye' Meselemiy tk'wal Kore, tk'wal Eb'yasap.

2Aye' tk'wal Meselemiy ja'lu: tnejel, Sakariy; tkab', Jedyael; toxi'n, Seb'adiy; tkyaji'n, Jatnyel;

3tjwe'yi'n, Elam; twaqaqi'n, Joanan; atzu'n twuqi'n Elyeoenay.

4Aye' tk'wal Ob'ed-edom ja'lu: tnejel, Semaiy; tkab', Josab'ad; toxi'n, Joa; tkyaji'n, Sakar; tjwe'yi'n, Natanael;

5twaqaqi'n, Amyel; twuqi'n, Isakar; twajxaqi'n, Pewltay. Qu'n matxi'toq ky'iwlanjtz Ob'ed-edom tu'n Dyos, tu'nju' txqan tk'wal.

6Kab'e' tk'wal Semayiy ten, ju' tk'wal Ob'ed-edom, intoq che kawin kyib'aju' toj kyja kyman, qu'n atitoq kyipumal ex kynab'l.

7Aye' tk'wal Semaiy ja'lu: Otni, Rapael, Ob'ed, Elsab'ad, Elyu ex Samakyiy, kuw qe'ju' ichan lu.

8Kykyaqil ja'lu, tyajajil Ob'ed-edom qe', kuw qe'ju' kyk'wal exqe' kyitz'in ex kytzik tu'nju' kyipumal intoq kyyek'u'n toju' kyajb'eb'l. Oxnaq kab'e' (62) kyb'aju' tyajajil Ob'ed-edom tu'n kykyaqil.

9Wajxaqlajoj kyb'aju' (18) tk'wal Meselemiy, e' ttziky ex titz'in, kykyaqil kuw xjal ex ati kynab'l.

10Aye' tk'wal Osa, tyajajil Merari: Somri, ju' nejeneltoq, maskye myatoq tnejel k'wa'lb'aj, okq'o'n te nejenel tu'n tman;

11tkab', Ilkyiy; toxi'n, Teb'aliy; tkyaji'n, Sakariy. Oxlajoj (13) kyb'aju' tk'wal Osa ex titz'in tu'n kykyaqil.

12Aye'tzun b'yoju' in kych'exb'e'n kyib' xq'uqil ttzija. Atoq kyaq'un nejenelju' exqe' kyuky'i'l tu'n kyajb'en toju' tja Dyos.

13Teyile junjun ja, e'nimaq ex k'ok'e', e'kyaj xq'uqil junjun ttzija kse'nxju' elyal tej t-sipanjtz kyxol.

14Ate Selemiy elyal tu'n t-xq'uqinteju' ttzija toj tjawetzq'ij, atzu'n Sakariy ju' tk'wal, q'ol nab'l atixi'x tnab'l, tu'n t-xq'uqin teju' toj tb'a'nq'ob'kya'j.

15Atzu'n Ob'ed-edom tu'n t-xq'uqinteju' toj tnayajkya'j, aye'tzu'n tk'wal tu'n kyxq'uqinteju' k'ub'l ti'xti' te tja Dyos.

16Atzu'n Osa tu'n t-xq'uqin toj tkub'exq'ij, jata' ttzija Salekyet tb'i, toju' b'e tk'u'j witz.

Eb'aj nk'u'nju' kyajb'eb'l junjun b'yoj ikjalu:

17atl junjun q'ij, ate'toq waqaq xq'uqil toju' plaj tjawetzq'ij, kyaje' toj tb'a'nq'ob'kya'j ex kyaje' toj tnayajkya'j, atzun kakab' ti'j junjunju' k'ub'l ti'xti'.

18Ate'toq kyaje' xq'uqilteju' b'e nim twitz twipe'n tkub'exq'ij, atzun kab'e' teku' pe'n.

19Iktzu'n sipana' kyaq'unju' xq'uqil ttzija kyyajajil Kore Ex Merari.

20Junjuntl tyajajil Leb'i intoq che kyxq'uqi'n k'uwenj toju' tja Dyos exqe' k'ub'l oyaj xjansa'nqe'.

21Atzu'n kyxolju' tk'wal Ladan, ju' tzajni kyyajil kyi'j Werson ex Jeyel,

22exqe' tk'wal Jeyel ex kyk'wal Setam ex Joel ju' kyitz'inkyib' kyuky'i'l, toj kyq'ob'toq ta'qe' k'uwenj toj tja Dyos.

23Atzu'n kyxolju' kyyajajil Amram, Isar, Eb'ron ex Usyel,

24atoq Seb'wel, kyyajajil Werson ex Moyses, nejenel kyib'aju' k'uwenj.

25Aye'tzu'n kywitze'l, tyajajil Elyeser aye' Reab'iy, tk'wal Elyeser; Isayiy, tk'wal Reab'iy; Joram, tk'wal Isayiy; Sikri, tk'wal Joram; ex Selomit, tk'wal Sikri.

26Atzu'n Selomit kyuk'i'lju' ttzik mo titz'in, toj kyq'ob'toq ta' kykyaqilu' k'ub'l ti'xti' xjanqe', ju' ojetoq che eltpa'n Dab'i te Qman Dyos kyuky'i'lju' nejenel kye junjun ja, nejenel kye nimaq tnej xjal te q'oj, nejenel kye lajnaq (200) xjal te q'oj, ex nejenel nimaq kyoklen kyeju' xjal te q'oj.

27Aye' ti'xti' ekanb'et kyu'n toj q'oj ex ojetoq kub' kyq'o'n tu'n kyajb'en toju' tja Dyos.

28Ex atitoqju' kub'ni kyxjansa'n Samwel, ju' inel tnik', ex Sawul tk'wal Kyis, ex Ab'ner tk'wal Ner, ex Joab' tk'wal Seruya, atzu'. Toj kyq'ob'toq Selomit kyuky'i'lu' ttzik mo titz'in ta' tkyaqilju' ti'xti' xjansa'n.

29Aye'toq Kyenaniy kyuky'i'lju' tk'wal kyxolju' tyajajil Isar, onil kawil ex ajkawil kyi'ju' k'aẍjel kyuk'i'l txqantl tnam.

30Atzu'n kyxolju' tyajajil Eb'ron, aye' Asab'iy kyuky'i'lju' twitze'l, kyajk'al jo'naq (1,700) ichan min nche xob' ex ati kynab'l, intoq che ka'yin kye aj Israel toj tkub'exq'ij te a' Jordan, toj tkyaqilju' taq'un Qman Dyos ex ajb'eb'l te nimaqkawil.

31B'aj jyo'n kyojile junjun ja xjal kyxolu' tyajajil Eb'ron toj tkab'naqi'n (40) ab'q'i nkawin Dab'i, ex elyal ate'toq ichan min nche xob' ex ati kynab'l kyxol, toj Jaser te Kalaad. Atoq Jeriy nejenel kyxolju' tyajajil Eb'ron;

32qaqk'al o'lajnaq (2,700) nejenel kye junjun jatu'n kykyaqil, ichan min nche xob' ex ati kynab'l, junx kyuk'i'lju' kywitze'l. E'oktq'o'n nimaqkawil Dab'i kyib'aju' kyyajajil Rub'en ex Kad ex nik'jan tyajajil Manases, tu'n kyka'yinte tkyaqilju' nb'inchet te Dyos ex teju' nimaqkawil.