1Xi' Dab'i Nob', ka'yilteju' pale Aymelek, jaw lab'ti ti'j tej tetz k'lulte, ex xitma'n te:
—¿Se'n taq'witzun naq tjunala saja, ex mix-a'lo' saj tuk'i'la?, chij.
2Atzunte Dab'i xittzaq'we'n te:
Machin tzajchq'o'ne' b'inchal jun ti'xti' tu'n nimaqkawil, ex matzaj tma'n weye' qa mix-a'lo' juntl tu'n tb'inte titiqu'n ẍin tzaja' tchq'o'ne', ex titi'ju' chaq'b'il saj tma'n weye'. Aye'tzu'n ichan ate'qe' tjaq' nkawb'ile' makyej nma'ne' kye jatu'n qmujb'ante qib'e' kyuk'i'l.
3B'a'nxpelo atiya, ¿titi' qwa ati tuk'i'la? Q'ontz jwe'we' nwa, mujqa ti'jxku' matz'elyal tu'na, chij.
4Xi'tzun ttzaq'we'n pale:
—Atite wab'j wuk'i'le', naq a mya wab'jxi' kse'n nkywan xjalxi', qu'n xjansa'n. Kxe'l nq'o'nwe' teya, naq a qa jk'u'nkyib'ju' ichan k'le'nqe' tu'na, tu'n mitxa' kytzyu'na' qya, chij.
5Xi'xi'xtzun ttzaq'we'n Dab'i te:
—Tkyaqil maj ajqexe' q'ojil min qotenqe' kyuk'i'l qya. Maskyepe' mya toj okslab'lu' qb'eye' lu, iqa'nxi'xti'j kyu'nkye' ichan atxi'x xqo tzaje', mitzunloyate' ja'lo, chij.
6Xi'tzun tq'o'n paleju' wab'j xjansa'n te Dab'i, qu'n o'kxtoq wab'ju' ate'toq xjansa'nqe' twitz Qman Dyos, expe' a q'iju' e'jaw q'i'n tib'aju' q'olb'eb'l, tu'n kykub' q'et kyxel ak'a'j.
7Tojtzunju' q'ij lu atitoq jun tmajin Sawul, ju' ojetoq kyejten toju' ja xjan. Atoq Doew aj Edom, nejenel kye k'ik'lel kye talu'n Sawul.
8Xitma'n Dab'i te Aymelek:
¿Ma ati jun ch'ut mujqa jun k'uẍtx'e'nb'il tuk'i'la? Naq a mixti'x xtaq' anb'il tu'n kytzaj wi'nju'ye' nk'uẍtx'e'nb'ile' ex jte'tl nq'ojb'ile', qu'n inxi'xtoq ojqelan tu'n tb'inchet tchaq'b'ilju' nimaqkawil, chij.
9Xi'tzun ttzaq'we'n pale te:
Ati jun, aju' tk'uẍtx'e'nb'il Kolyat, ju' pilistey kub'ti'j tu'na toju' b'ya' Ela. Lu ati na'tz ti'jxi' ẍay, ptzo'n toj jun pinpa't. B'a'n tu'n t-xitiq'i'na qa ati tajb'en teya, qu'n o'kxte atiju' nk'etze', chij.
Xitzun ttzaq'we'n Dab'i:
Q'ontzna'ya, qu'n ate b'a'nxi'xju' kyekywitz txqantl, chij.
10Ax q'iju' lu kub' oq Dab'i twitz Sawul, ex xi' yek'ultib' te Akyis, nimaqkawil toj Kat.
11Aye'tzu'n nejenel kye t-xjal Akyis te q'oj xikyma'n te:
—¡Ma mitzunya Dab'i ja'lu, ajb'el te Sawul, ju' nimaqkawil toju' tx'otx' lu! ¡Anate intoq b'itzanjtzu' kyu'n b'ixil kjalu: kab'k'al Jo'naq (1,000) ichan xkub' tb'yo'n Sawul, atzun junmutx' jo'k'al (10,000) xkub' tb'yo'n Dab'i!, chechij.
12Jaw ximan Dab'i ti'ju' ntoq q'manjtz ti'j, ex xob' te Akyis nimaqkawil toj Kat.
13Qu'mtzun, oktq'o'ntib' naku'j nnoktojtwi', naq tak'a'n okten sqitulkye tjpel ja, ex aq'wi ẍeriyil.
14Xi'tzun tma'n Akyis kyeju' nejenel kye t-xjal te q'oj:
—¿Qama tz'okkyka'yi'ne' nnoktojtwi' ichan lu, tiqu'n saja' kyiq'ina'ye'?
15¿Ma ntzun nojqelan jun nnoktojtwi' weye', tu'nju' saj kyiq'i'ne' xjal lu, tu'n tb'inchante chaqju' toj twitz toj njaye'?, chij.
Who We AreWhat We EelieveWhat We Do
2025 by iamachristian.org,Inc All rights reserved.
