1Chi nimaqkawil kjalu: Ayine' nimaqkawil Nab'ukodonosor, nak'b'ilxwit ex tzalajb'ilxwit kye kykyaqil xjal kyoj kykyaqil tnam ex nimaqtnam, exqe' nche yolin toj chukchaq yol toju' nkawb'ile'.
2Wajb'ile' tu'n kyxinma'ne' ti'xti' te lab'te'n xtb'incha Dyos te toj kya'j weye'.
3¡Majx tb'anilqe'xi'xju' tb'inchb'aj ex tb'a'nq'ob'! Majx atiju' tkawb'il tejumajx, ex majx ati tipumal toj tkyaqil tab'q'iyil.
4Ayine' Nab'ukodonosor, tzalajb'iltoq nchin anq'ina'ye' toju' tja nimaqnkawb'ile' ex tkyaqilju' xinb'incha'ne' b'a'ntoq nnela'.
5Tojtzun jun qonik'an, intoq chin wtane' ok jun nwitzik'e' xob'ajilx, ex eb'jo'k xim wi'je', ex majx nb'aj xob'e'.
6Nchaq'tzuntze' tu'n kyb'ju'l kykyaqilju' ajnab'lil te B'ab'ilon nk'etze' tu'n ttzaj kypju'nju' nwitzik'e'.
7Eb'ju'ltzun ajpkab', ajnab'lil, xjal nimaq kynab'l exqe' nche xnaq'tzan kyi'j che'w toj B'ab'ilon, xi'tzun nma'nju'ye' nwitzik'e' kye, ex mixti' b'ent ttzaj kypju'n.
8Tzmaxi'tzunj tul Danyel ju' tok tb'i B'eltzasar kse'n tb'i ndyose', ẍaqlu'n tu'nju' t-xew Dyos Xjan, xinchik'b'a'ne' nwitzik'e' te kjalu:
9B'eltzasar, nejenel kye ajnab'lil, b'i'n wu'ne' qa ẍaqlu'na tu'nju' t-xew Dyos Xjan, exqa inel tnik'a ti'ju' ati toj ewaj, b'intzju'ya nwitzik'e' ex q'mantza titi' tz'elpuna'.
10Aye' e'wilju'ye' lu tej intoq chin wtane':
Atitoq jun nin tze toj nky'ajchaq te tkyaqil twitz tx'otx'.
11Ch'iyju' tze ex lamix tk'etz;
intoq japun kanun tzmax toj kya'j,
ex q'ancha'ltoq toj tkyaqil twitz tx'otx'.
12Majxtoq tb'anilxi'xju' t-xaq
ex txijlitoq twitz,
tu'n kywan kykyaqil xjal ti'j.
Intoq che ojlanju' txkup tjaq' t-xlekumal,
intoq kub' kyq'o'n pich' kypaqb'il kyxolju' tq'ob'
ex kykyaqilju' nche anq'in twitz tx'otx' intoq che wan ti'j.
13O'kx myanim xinka'yine' jun anjl xq'uqil ku'tz toj kya'j toj nwitzik'e',
14ex intoq jawtma'n kuw kjalu:
Kyik'sanku'ye' tze, ex kytx'eminkuye' tq'ob',
kyiq'imilju'ye' t-xaq, ex kslaminxju'ye' twitz.
Tu'n kyxi' oqju' txkup ate'qe' tjaq' tewun
exqe' pich' ate'qe'kx kyxolju' tq'ob'.
15Naq o'kx tkuchmal kyuk'i'l tlok' kyq'onkje';
kyk'lonkjtzuntze' tu'n xpatx'k'uxb'il ex xpatx'q'ank'uxb'il
ex kyq'onkje' kyxol k'ul toj kojb'il.
Tu'n tkub' ta'l che'w tib'aj,
ex tu'n twan k'ul toj kojb'il kyuk'i'lju' txkup.
16Tu'n tnaju' tnab'l
tu'ntzun tok kse'n jun txkup,
ex wuq ab'q'i ktenb'elju' taq'wix lu tib'aj.
17Atzun tz'e'ysb'il witzb'aju' lu
xkymaju' anjl xq'uqil ex xjanqe',
tu'ntzun kyb'inte kykyaqil xjal
qa a Dyos toj kya'j ati nimtipumal
kyib'aj kykyaqil nimaqkawb'il twitz tx'otx',
ex a nxi' q'onte kawb'il toj tq'ob'ju' xjal b'a'n toj twitz
ex noktq'o'nju' xjal me's te nejenel tib'aj jun nimaqtnam.
18Atzun nwitzik'ju'ye' lu kub' nwitzk'a'ne', ayine' nimaqkawil Nab'ukodonosor. Q'mantz tzuna titi' tz'elpuna' weye' B'eltzasar, qu'n mix-a'lo' jun ajnab'lil toju' nkawb'ile' neltnik' ti'j, atzunta kb'entel ttzaj tpju'na weye', qu'n atita t-xew Dyos xjan tuk'i'l, nchije' te.
19Atzunte Danyel, aju' okq'o'n tb'i B'eltzasar, majx kyej ximan jun kmuj, tu'nju' xim taq'wix intoq che ul toj tnab'l. Ayintzunwe' nimaqkawil, xinma'ne' te: B'eltzasar, lalun b'isuna ti'ju' nwitzik'e' xkub' nwitzk'a'ne' ex ti'ju' tz'elpuna', nchije' te. Atzunte B'eltzasar tzaj ttzaq'we'n: ¡Xi'wt kyib'aju' tajq'oja kub' tz'aqa' twitzik'a nimaqkawil, tu'nju' tz'elpuna'!
20Aju' tze nimin twe' ex lan tk'etz kub' twitzk'a'na, intoq japun toj kya'j ex q'ancha'l najchaq toj tkyaqil twitz tx'otx',
21tb'anilqeju' t-xaq ex txijli toj twitz, intoq kanun te kywa kykyaqil ex intoq che ulju' txkup tjaq' t-leku'mal, ex intoq kyb'incha'n pich' kypaqb'il kyxolju' tq'ob',
22aju' tze lu xi' nyolina' ti'ja nimaqkawil, qu'n matxi' ch'iyju' tkawb'ila ex nimtipumala. Matxi' jaw ch'iyju' tkawb'ila kse'n twe' kya'j, extzunju' tkawb'ila matxi' txi' mlen toj tkyaqil twitz tx'otx'.
23Ex matila nimaqkawil jun anjl xjan xq'uqil intoq ku'tz toj kya'j ex intoq tma'n: Kyik'sanku'ju'ye' tze ex ktx'eminku'ye', naq o'kxju' tkuchmal kyuk'i'l tlok' kyq'onkje'; kyk'lonkje' tuk'i'l xpatx'k'uxb'il ex q'ank'uxb'il, ex kyq'onkje' kyxol k'ul toj kojb'il. Tu'n tkub' ta'l che'w tib'aj, wuq ab'q'i tu'n twan k'ul toj kojb'il kyuk'i'l txkup.
24A tz'e'ysb'il twitzju'ya nimaqkawil matxi' tzaj tq'o'n Qman Dyos toj kya'j.
25Ex k'elel pa'na nimaqkawil kyi'ju' xjal tu'n tnajana kyuk'i'l txkup, kwal k'ula kse'nkye wakx, ex k'elex ak'a tu'n ta'l che'w. Wuq ab'q'i k'anq'ila ikyju', tzmaxi'tzunj ajtel tnik'a qa a Dyos toj kya'j ati tipumal kyib'aj kykyaqil nimaqkawb'il te twitz tx'otx', ex ate nokq'onkye nimaqkawil b'a'nqe' toj twitz.
26Atzu'n chaq'b'il xiq'ma'n tu'n tkyej q'o'n tkuchmal ex tlok', atz'elpuna'ju' qa ktzajel q'o'n jumajtlju' kawb'il teya nimaqkawil tzmaxi'j ajtel tnik'a te Dyos ati tipumal tib'aj tkyaqil.
27Qu'mtzun, b'intzju'ya tnab'la kxe'l nq'o'ne' nimaqkawil: b'et-xa b'a'n ex lalun b'inchantl ila; tzaqpinkja myab'a'n, ex q'onk tilila tu'n tonina kyi'j prow. Qaj tu'n ja'lu k'anq'ila toj tzalajb'il ex tu'n txi'ya b'a'n, chi Danyel weye', chi nimaqkawil.
28Tkyaqilju' b'ajx q'ma'n te nimaqkawil Nab'ukodonosor e'japun:
29Tb'ajlenxi'tzun jun ab'q'i, intoq b'etju' nimaqkawil tib'aju' tkab' kol teju' tja nimaqkawb'il toj B'ab'ilon,
30tma: ¡Kyka'yinxpekye' B'ab'ilon yaqinxi'x! Ayinku'ye' ẍin jaw b'inchante tuk'i'l wipumale' te jun nintnam jatu'n ttena' nkawb'ile', tu'n tkyejten te nab'ab'lteju' nkawb'ile' niminxi'x, chij.
31Inxtoqtzun yolinju' nimaqkawil tej ttzaj jun tq'ojq'ojel wi'yj toj kya'j, intoq tma'n: b'intzpe'ya, nimaqkawil Nab'ukodonosor. Mixti'tl toklena ti'ju' nintkawb'ila;
32k'elex q'i'na kyxol xjal ex knajala kyuk'i'l txkup; wuq ab'q'i kwal k'ula kse'nkye wakx, tzmaxi'j ajtel tnik'a qa ate Dyos toj kya'j nkawin kyib'aj kykyaqil nimaqtnam toj tkyaqil twitz tx'otx', ex ate nokq'onkye kawil kse'nxju' tajb'il, chij.
33Japuntzun tz'e'ysb'il twitz Nab'ukodonosor texju' kmuj lu, aju' q'ma'ntltoq, el pa'ntzuntz kyi'j xjal; wan k'ul kse'nkye wakx, ex ak' tu'n ta'l che'w, tzmax tb'aj ch'iy twi' kyuk'i'l t-xky'eq kse'n t-xky'eq t'iw.
Q'aninjtz Nab'ukodonosor34Tetzunj tjapun b'aju' tq'ijlalil tz'e'ysb'il witzb'aj, ayine' Nab'ukodonosor njaw ka'yine' twitz kya'j ex spik'e' wuk'i'le'; jawtzun nnima'ne' Dyos te toj kya'j ex jaw wajwali'nju'ye' ati tejumajx kyuk'i'lju' yol lu:
Ktenb'elju' tipumala tejumajx;
ktenb'elju' tkawb'il toj tkyaqil tab'q'iyil.
35Mixti' che oka'ju' najlqe' twitz tx'otx' teya.
Intb'incha'na tkyaqilju' b'a'n toj twitza,
toj kya'j ex twitz tx'otx'.
Mix-a'lo'te' jun kb'entel tjawti'ntib' ti'ja
ex tu'nwt t-xi' tma'n teya: ¿tiqu'n ntb'incha'nju'ya lu? chiwt teya.
36Textzunju' kmuj lu spik'e' wuk'i'le', ex nk'amjumajtlju'ye' woklene' toju' nkawb'ile' exju' ninb'ilweye'. Eb'ju'lju' xjal nimaq kyoklen toju' nkawb'ile' exqe'ju' q'ol nnab'le' jyolweye', ex nokxqe jumajtle' kawil kyib'aju' ntaname'; ten nimxi'xtlu' wipumale' kyetwitzju' tnejel.
37Qu'mtzun ja'lo, ayine' Nab'ukodonosor, nchin b'itzane' ex nchin nimane' teju' nimaqkawil toj kya'j, qu'n tkyaqilju' ntb'incha'n ax ex tnik'alti'j, ex nche kub' tme'ssa'nju' xjal njaw kynima'n kyib', chi nimaqkawil.
Who We AreWhat We EelieveWhat We Do
2025 by iamachristian.org,Inc All rights reserved.
