1 S 13 - Mam Ostuncalco Bible

Q'oj kyi'j pilistey

1Matxi'toq tij ichanix Sawul tej ttzyet tkawin toj Israel; tetzunj matxi'toq b'ent jte' ab'q'i nkawin,

2E'jaw t-sk'o'n wuqk'al lajnaq (3,000) xjal te q'oj kyxol aj Israel. Jo'k'al (2,000) e'kyajten tuk'i'l toj Mikmas ex kywi'witz te B'etel; aye'tzu'n kab'k'al lajnaqtl (1,000) e'kyajten tuk'i'l Jonatan toj tnam Kib'ea toj kytx'otx' tyajajil B'enjamin. Aye'tzu'n txqantl xjal e'xitchq'o'n Sawul kyja.

3Eb'ajkub' tb'yo'n Jonatan xjal te q'oj pilistey nche xq'uqi'n Kib'ea, ex kyb'i pilistey. Tchaq'tzun Sawul tu'n kyq'ajtzet chun toj tkyaqilju' tnam tu'n kyb'inte aj Eb'rey.

4Kyb'itzun kykyaqil aj Israel qa matxi'toq che b'aju' jun tnej pilistey xq'uqilqe' tu'n Sawul, exqa tu'n ja'lu e'el i'k'o'n aj Israel kyu'n pilistey, kyb'uyitzun kyib' kkyaqilju' xjal te q'oj tuk'i'l Sawul toj Kilkal.

5Ex ikxkye' pilistey b'aj kyb'u'yi'n kyib' tu'n kyq'ojin kyi'ju' aj Israel. Atitoq oxmutx' o'lajk'al (30,000) kykarwaj te q'oj, o'lajk'al (6,000) xjal te q'oj ti'j chej ex nim txqantl xjal te q'oj nche b'et tu'n kyqan, kse'n tz'awun ttzi ninnjab'. Exi'tzuntz Mikmas ex e'kub'ten atzu', toj tjawetzq'ij te B'et-ab'en.

6Tetzunj kyka'yinte aj Israel majxtoq ch'uẍ tu'n kyq'ojin kyi'j, eb'ajx ewal kyoj jul toj pik ex kyxol pik, kyoj tb'e a' b'incha'n toj tx'otx' ex kyoj xoch.

7Ex b'a'npun e'ik'x jlajin toju' nin a' Jordan toju' tx'otx' Kad ex Kalaad; atzunte Sawul kyajxten Kilkal, ex kykyaqilju' t-xjal te q'oj lepchqe'ktoq ti'j inxi'xtoq che xob'.

8Wuq q'ij ayon Sawul atzu', kse'nxju' xitma'n Samwel te, tu'ntzu'n mixti'x q'o'n tu'n tpon Samwel toj Kilkal, ljo'ntoq kyanjkye' xjal.

9Tchaq'tzun Sawultz:

—Kyiq'inqe'tze' alu'mj te chojb'il k'ok'sb'il ex te b'inchjtib'il, chij.

Axtzu'n Sawul kub' q'onteju' chojb'il k'ok'sb'il.

10Naqtzun in b'ajkub' tq'o'n Sawulju' chojb'il k'ok'sb'il tej tpon Samwel. Ex etz Sawil k'molte ex q'olb'elte,

11atzunte Samwel xitma'n te:

¿Tiqu'n xtb'inchaya lu? chij.

Xi'tzun ttzaq'we'n Sawul:

Tej xxi' nka'yi'ne' ljo'ntoq kyanju' xjal ex mixtoqti'x q'o'n tu'n tula toju' q'ij q'ma'ntl tu'na, extzun matxi'toq b'aj kyb'u'yi'n kyib' pilistey toj Mikmas,

12kub' nximane' qa che kb'eletztoq q'ojil qi'je' toj Wilwal, extzun na'mxtoq tkub' nq'o'n wib'e' toj tq'ob' Qman Dyos, qu'mtzun ayinxe' ẍin kub' q'onteju' chojb'il k'ok'sb'il qu'n intoq ojqelan toj nwitze', chij.

13Atzunte Samwel xittzaq'we'n te:

—¡Mixyab'a'n xtb'inchaya! Noqwit matxi tb'i'na tchaq'b'il Qman Dyos tzaj tma'n teya, ma'wtlo kyej q'o'na tu'n tkawina tejumajx toj Israel.

14Atzu'n ja'lo lay kyej tenju' tkawb'ila kukxju'. Ktjya'te Qman Dyos juntl ichan b'a'n toj twitz, ex k'okyel tq'o'n te nejenel teju' ttanam, qu'n mixti' xitb'i'n teju'ya tchaq'b'il Qman Dyos tzaj tq'o'n teya, chij te.

15Ik'tzun b'et Samweltz toj Kilkal ex xi'tljo'n tb'e. Aye'tzu'n txqantl xjal te q'oj exi' lpe ti'j Sawul tu'n kyq'ojin, e'ik' Kilkal ex e'pon Kib'ea toj kytx'otx' tyajajil B'enjamin. Atzuntzu' e'xa'tajla'n Sawul xjal te q'oj ate'toq tuk'i'l, naqtoq junk'al lajnaq (600) ichan ate'.

16Axtzuntzu' kyeja' ten Sawul tuk'i'l Jonatan ju' tk'wal kyuk'i'lxi' t-xjal te q'oj, Kib'ea kyxol tyajajil B'enjamin, aye'tzu'n pilistey e'kub'ten Mikmas,

17Ate'toqpe' oxe' tnej xjal pilistey q'ojil tojk'ulqe' eb'je'tz toju' kyxmuj; jun tnej exi' Opra toju' tx'otx' Swal,

18atzun jun tnejtl exi' B'et-oron, atzu'n toxi'n tnej exi' twi' witz tib'aju' b'ya' Seb'oyim, tu'me'l chq'ajlaj.

19Mixtoqtzunti' jun aq'unal ti'j k'uxb'il toj tkyaqil ttx'otx' Israel, qu'mtzun kyxima pilistey qa laytoq b'ent kyb'inchante aj Eb'rey kyk'uẍtx'e'nb'il ex kych'ut.

20Kykyaqil aj Israel atitoq tu'n kyxi' jqul twitzte kyxb'otz'b'il, kytz'utz', kyk'uxb'il, mujqa kych'ut kyuk'i'l pilistey.

21Kab'e' toxi'n piẍ saqpwaq nkychjo'n juqb'il kywitzte xb'otz'b'il ex tz'utz', atzun jun toxi'n piẍ saqpwaq juqb'il kywitzte k'uxb'il ex ch'ut.

22Qu'mtzun mixtoqti'x kyk'uẍtx'e'nb'il mo kych'utju' xjal lepchqe'toq kyi'j Sawul ex Natan tu'n kyq'ojin toju' q'ij lu. Oqe'kxtoq Sawul ex Jonatan q'i'n kyk'uẍtx'e'nb'il ex kych'ut.

23Matxi'toqtzun che pon lq'e jun k'loj pilistey te q'oj toj tb'eyil Mikmas.