1 S 22 - Mam Ostuncalco Bible

1Ik'b'et Dab'i atzu', ex xi' oq toju' jyom toj Adulam. Tetzunj kyb'inteju' ttzik exqe' twitze'l, exi' tk'etz.

2Ex kymujb'a kyib' kykyaqilju' xjal yaju'nqe' tuk'i'l, ex kykyaqilju' atitoq kyk'as ex kykyaqilju' mixtoqti' nche tzalaj, ok Dab'i te nejenel kye. Qape'lo junk'al (400) ichan ate'toq tuk'i'l.

3Exi'tzun Dab'itz Mispa, toj Moab', ex xitma'n teju' nimaqkawil toj Moab':

—B'inchama xtalb'il, q'ontza anb'il tu'n kykyajten nmane' ex ntxuye' kyuk'i'le' tzmaxi'j ajnb'inteye' titi' ktb'incha' Dyos weye', chij.

4Iktzu'n exi' tiq'ina' Dab'i tman twitzju' nimaqkawil toj Moab', e'najantzuntz tk'etzu' nimaqkawil lu toj tkyaqilju' tq'ijlalil tej tten Dab'i toju' ja te kolb'il.

5Xi'tzun tq'o'n Kad, ju' t-sanjelal Dyos, tnab'l Dab'i:

—Lalun kyajtena toju' ja te kolb'il. Kutxi'ya toju' kytx'otx' aj Juda, chij te. Xi'tzun Dab'itz ex pon toju' k'ul Eret.

Eb'ajkub' b'yo'n Pale toj tnam Nob'

6Atzunte Sawul atoqtzu' ta' Wib'ea, q'uqlitoq t-xe jun tze tamarisko tb'i twi' witz xjan, tzyu'ntoqju' tch'ut ex txoli'nkyib'u' nejenel kye t-xjal ti'j. Atzunj tb'inte qa matxi'toq che knet Dab'i kyuk'i'lju' t-xjal,

7xitma'n kyeju' tmajin txolchi qe'toq ti'j:

—Kyb'intzpe'ye', tyajajil B'enjamin: ¡Ma oktzun xe'ltq'o'n tk'wal Jese kytx'otx'e' ex kyawale' tqan ub'a te kykyaqile' toj kywitze', exqa kykyaqile' che okyel q'o'ne' tu'n te chaq'ul ex nejenel kye xjal te q'oj!

8Kykyaqilxe' matxi' muje kytziye' wi'je', qu'n mix-a'lo' matxi' tzajxi' q'mante weye' qa kyejni b'entti'j jun kyolju' nk'wale' tuk'i'lju' tk'wal Jese; mix-a'lo' junkye' matxi'wt b'ajx tk'u'j wi'je'; mix-a'lo' jun saj q'mante weye' qama tz'oktq'o'n nk'wale' jun nmajine' tu'n tq'ojin wi'je', kse'n ntb'incha'n ja'lo, chij.

9Xi'tzun ttzaq'we'n Doew, aj Edom, ju' atitoq kyxolju' nejenel kye t-xjal Sawul, kjalu:

—Wilwe' tk'wal Jese tej tpon toj Nob' yolil tuk'i'lju' pale Aymelek, tk'wal Aytub'.

10Xjelun Aymelek te Qman Dyos ti'j Dab'i, ex xitq'o'n twa exju' tk'uẍtx'e'nb'il Kolyat pilistey te, chij.

11Tchaq'tzun nimaqkawil tu'n txi' txokb'aju' pale Aymelek ex kykyaqilju' pale toj Nob', twitze'lqe'x. Tetzunj kyb'ajpon twitzju' nimaqkawil,

12xitma'n Sawul te Aymelek:

—Chin tb'itza b'a'nxi'x tk'wal Aytub', chij.

—Luqine' lu tu'n wajb'ene' teya nimaqkawil, —chi Aymelek xittzaq'we'n.

13Xi'tzun tqani'n Sawul te:

¿Tiqu'ntzun xjawa' kyiq'i'n kyib'e' tuk'i'l tk'wal Jese wi'je'? Xitq'o'na twa ex jun tk'uẍtx'e'nb'il, ex xjeluna te Dyos ti'j, naqx tu'n tjaw miltz'uj wi'je' ex tu'n kyb'aj tchmo'n t-xjal toj ewaj tu'n kyok tzaqpaj wi'je', kse'n ntb'incha'n ja'lo, chij.

14Xi'tzun ttzaq'we'n Aymelek te nimaqkawil.

—¿Alkyetzun jun kyxol kykyaqilju' nejenel kye t-xjala te q'oj majx okslalxi'x te Dyos kse'nte Dab'i, expena' tjiya nimaqkawil, ex nejenel kyeju' xq'uqilteya, expe' nnimanjtz toju' tkawb'ila?

15¿Ma tzmatzun tnejel maj nchin kub'sane' te Dyos ti'j Dab'i? ¡Mikxa'te'! Lalun kub' t-xima'n jun ti'xti'ya wi'je', ex kyi'ju' toj njaye', qu'n mixti'we' b'i'n wu'n ti'ju' ti'xti' lu, chi Aymelek te.

16Atzunte nimaqkawil xi'tma'nxi'xtl:

—¡B'inku'ya Ayimelek, kkyimela kyuk'i'l kykyaqilju' twitze'la!, chij.

17Tchaq'tzun nimaqkawiltz kyeju' t-xjal inche xq'uqinte:

—¡Che kyb'yonku'ye' tpale Qman Dyos! Qu'n aye'x junkye' ate'qe' tuk'i'l Dab'i, b'i'ntoq kyu'n qa intoq newin Dab'i, ex min tzaj kyma'n weye', chij kye. Aye'tzu'n xq'uqilte mixti' aq'pon kyq'ob' kyi'ju' tpale Qman Dyos.

18Xi'tzun tma'n nimaqkawiltz te Doew aj Edom:

—¡B'yonqe'ku'ya!, chij te. Oktzun tzaqpaj Doew b'yolkye pale, kyajnaq jwe' (85) ichan tok kyẍa'y sed e'kub' tb'yo'n toju' kmuj lu.

19Ex okx toj Nob', ninkytanam pale, e'kub' tb'yo'n ichan, qya, k'wal, exqepe' tal ne'ẍ tu'n k'uẍtx'e'nb'il. Ex eb'aj Kub' tb'yo'n tman wakx, b'ur ex rit.

20Atzun jun tk'wal Aymelek, Ab'yatar tb'i xi' oq toju' q'ojtib'il, ex pon tzmax jata' Dab'i.

21Xitma'ntzuntz te Dab'i qa matxi'toq che b'aj Kub' tb'yo'n Sawul tpale Qman Dyos,

22atzunte Dab'i xittzaq'we'n te:

—Kub'x nximante'ye' toju' q'ij lu, qa oktoq kxe'l tma'n Doew te Sawul. Tu'n npaje' matxi' che kub' b'yo'na' kykyaqilju' toj tjaya.

23Ja'lo, tenkja wuk'i'le' ex lalun xob'a, qu'n alkyete tajb'il tu'n tkub' b'yonteya, tnejel ati tu'n nkub' tb'yo'ne'. Mixti'te kb'ajel ti'ja, chij te.