Ez 6 - Mam Ostuncalco Bible

Xitma'n Esekyel qa myab'a'n qe' witzleb'

1Tzaj yolin Qman Dyos weye' ex tma:

2Ka'yinxa kywi' witz toj Israel, ex q'manxa kye toj nb'iye'

3kjalu: Kyb'inku'ye', witz toj Israel, aju' ntma'n Qman Dyos kyeju' witz, e'ttxa'nwitz, exqe' nin a' ex b'ya': ktzajel q'oj wu'ne' kyib'aje', ex che b'ajel xitju' janche k'uluna'ye' kye witzleb'.

4Che b'ajel nb'uchi'ne' q'olb'eb'l janche kub'a' kyq'o'ne' chojb'il ex jankub'a' kytz'e'ysa'ne' sturak, ex knb'incha'ye' tu'n kykub' tz'aqju' ichan kyimniqe'tl kywitzju' witzleb'.

5Che b'jo'kyex nxone' aj Israel kyimniqe'tl kywitzju' kywitzleb', ex kb'ajxel nsputi'ne' kyb'aqil ti'jile q'olb'eb'l kye.

6Che b'ajel xitetju' nimaqtnam kyoj kykyaqilju' najb'il ja najla'qe'ye', exqe' q'olb'eb'l te witzleb'i'n che kjel xitet. Majx che kjel xitetju' kyq'olb'eb'l exqe' kywitzleb' che b'ajel txijet; exqe' kyq'olb'eb'l tz'e'ysb'il sturak che b'jawil ch'ojpet; tkyaqilju' oje b'jaw kyb'incha'ne' che b'elnajset.

7Ajtzun kyka'yinteye' ajkyb'aj kyim txqan xjal kyxole', k'eleltzun kynik'tze' qa ayine' Dyos Manb'aj.

8Oktzun che nkla'we' junjunkye' te kamik ex che kjel anq'in, che b'ajex sputet kyxol nimaqtnam.

9Chin tzajel kyna'nju'ye' che kjel anq'in kyoju' nimaqtnam; ktzajel kyna'n se'n ẍeyajtiya' wu'ne' tu'n tpaj min ẍeajb'en b'a'n we'ye' ex matz'elkypa'n kyib' wi'je' tu'n kyk'ulun kye witzleb'. Che tzajel molmon kyex tu'n tpaj tkyaqilju' il xb'aj kyb'incha'n, ex tu'n tpaju' kb'inchb'aj taq'wixqe'xi'x.

10K'eleltzun kynik'tz qa ayine' Dyos Manb'aj, ex tej txinma'ne' kye qa tzultoqju' taq'wixil lu kyi'j, mya naqxwit wak'a'ne' exi' nxob'sa'ne', chiku'ya, chij.

11Tzaj tma'n Qman Dyos weye': Ẍch'ina, jumanqeku'ya tq'ob'a ex tqana; ẍch'ina tu'n k'ixk'oj tu'n kypaj kyil tnam Israel taq'wiqe'xi'x, kkyimel toj q'oj, tu'n we'yaj ex tu'n yab'il.

12Che kyimelju' ate'qe' najchaq tu'n yab'il, aye'tzu'n ate' nqaku' che kyimel toju' q'oj, aye'tzu'n che kjel kolchi che kyimel tu'n we'yaj. Ikytzu'n ktzajel nb'ajsa'ne' ntx'u'jile' kyi'j.

13Ajtzun kyka'yinte woqo'jqe' kywitze'l kyimniqe'tl kyxolju' kywitzleb' ex kyi'jile q'olb'eb'l kye, kywi' kykyaqil ttxa'nwitz nimaq kywe', kywi'witz, kyxe tze cha'xqe', kyxe kykyaqil b'ansi pujin, ex jachaq xa'kyq'o'n tb'anil k'ok'sb'il kyeju' kywitzleb', k'eleltzun kynik'tz qa ayine' Dyos Manb'aj.

14K'okyel nq'ob'e' kyi'j tu'n ttz'e'yset kywitz, jata' chq'ajlaj toj tnayajkya'j ponx Rib'la toj tb'a'nq'ob'kya'j, kjawil b'entju' kytanam ex tkyaqilu' jachaq najla'qe' wu'ne' te chq'ajlaj xob'ajilx. K'eleltzun kynik'tz qa ayine' Dyos Manb'aj, chi Dyos.