Is 52 - Mam Ostuncalco Bible

Tqanil tzaqpib'lte Jerusalen

1Iq'i'nktz tib'a Syon,

kuwsam tib'a;

Jerusalen, xjan nintnam,

q'onka ti'ja tb'anilxi'x,

qu'n lay che okxtlkye' ma' witzleb'il toja,

aye' mya ẍtilun kychwinqlal.

2Iq'i'nktz tib'a Jerusalen,

chtomila quq ti'j tqana,

qekxa toju' tkawb'ila.

Iq'imila tze ti'j tqula

tnam Syon, ju' xiq'i'na toj kars.

3Chi Qman Dyos kjalu:

Mixti' junwe' pwaq nk'am

tej kyxi' q'i'ne' te lq'o'n majin;

ex mixti' jun pwaq kxe'l nq'o'ne'

tu'n kykolpete' ja'lo.

4Xi'ju' ntaname' toj Ejipt ojtxi'

ex najan te najchaq xjal atzu';

yajxi'tzuntl kub' yaju'n tu'n Asirya extzun mixti' til.

5Atzu'n ja'lo nxinka'yine',

matxi' txiq'i'n ntaname' toj B'ab'ilon extzun mixti' til.

Inxi'x che ẍch'inju' nche kawin kyib'aj tu'n kytzalajb'il

ate'qe'k q'ol ntx'u'jile' kukxju'.

6Tzultzunte' q'ij k'elel tnik'ju' ntaname'

ex kkaneb'il toj kywitz qa ayine' Dyos Manb'aj matxi' chin yoline', chi Dyos.

7Tb'anilxi'xte' tka'yinx twi' witz

ajttzaju' q'ilte b'a'n tqanil,

aju' tzul q'inte tqanil nak'b'il,

aju' npakb'ante kolb'il

ex ntma'n te Syon: Nimaqkawilte' Dyos janajb'ena'ya, chij.

8¡B'inxpe'ya! Injaw toj kywi' t-xq'uqila

junx nche ẍch'in tu'nju' kanb'ab'l,

qu'n inkyka'yi'n tu'nku' kywitz

tzul jumajtl Qman Dyos toj Syon.

9¡Che ẍch'inqe'ye' tu'nju' kanb'ab'l,

aj Jerusalen kub'ni xitj,

qu'n matxi' tzaj laqj tk'u'j Qman Dyos ti'ju' ttanam,

matxi' kolpet Jerusalen tu'n!

10Matxi' tyek'u Qman Dyos tipumal

kywitz kykyaqil nimaqtnam.

Kb'injtzel toj tkyaqil twitz tx'otx'

qa matxi' qoklet tu'n Qman Dyos.

11¡Kukyetze' ja'loxi'x toj B'ab'ilon,

lalun txikytzyu'n jun ti'xti'ye' tz'il,

lwix kukyetze' toj B'ab'ilon!

¡Che okxe' ẍtilun kukxju'

aye'ye' nche iqankye aq'unb'il twitz Qman Dyos!

12Lantzun che etze' ojqel,

lalun che etz oqe',

qu'n che nenunjtzele' toj tkyaqil plaj

tu'n Qman Dyos janche ajb'ena' aj Israel.

Yajb'ilte tmajin Qman Dyos ex tkanb'ab'l

13Kkanb'alte' nmajine',

kajwil nima'n b'a'nxi'x.

14Ikxju' kse'n e'jaw lab'ti txqan xjal ti'j,

tej t-xikyka'yi'n matxitoq chukjiju' twitz

matxitoq naju' tilb'il kse'n tilb'ilal jun xjal,

15ex che kjel lab'ti txqan nimaqtnam;

lay tz'elkytzi nimaqkawil ajt-xikyka'yi'n,

qu'n okkyla' ex k'elelkynik' ti'j

aju' b'ajx kyila'xi'.