Is 53 - Mam Ostuncalco Bible

1¿Alkye kxe'l okslanteju' matxi' qb'iye'?

¿Alqe matxi' txityek'u'na Qman Dyos tipumal?

2Tajb'iltoq Qman Dyos tu'n tch'iyju' tmajen

kse'n jun tal awal tzmaxi'x nch'iy

nxitawa'n tlok' toj tzqij tx'otx'.

Myatoq tb'anil ex myab'a'n tka'yink,

mixyab'a'n tka'yink;

3ik'o'n kyu'n xjal ex suchu'n.

Jun ichan atixi'xtoq toj k'ixk'oj,

naq'litltoq toju' yajb'il.

Kse'n jun xjal mya qajb'il tu'n tok qka'yi'n,

el qik'u'n ex mixti' xiqq'o'n toklen.

4Extzun atoq iqalte tkyaqilju' yajb'ilqe,

intoq ik'xju' qk'ixk'oj tu'n.

Toj qnab'l qa a Qman Dyos k'ixb'sante,

qa kub' ttz'e'ysa'n twitz ex eltch'ixaw tu'n.

5K'ixb'sanjtz tu'n tpaj qil,

b'aj yajla'n tu'n tpaju' qb'inchb'aj myab'a'n;

tu'nju' tz'e'ysb'il twitz ula' nak'b'il qe,

ob'anix naq tu'nju' b'aj k'ixb'sa'n.

6Ob'ajx tzpet qkyaqil, kse'n che'x tzpet rit,

teyile junjun b'ajx kyljo'n kyb'e,

atzunte Qman Dyos jaw tq'o'n tkyaqilju' qil te tiqatzju' tmajen.

7B'aj yajla'n, ex min jawtiq'i'ntib',

mixpeti' xitma'n jun tyol;

xiq'i'n toj b'i'yb'il naku'j qpoj tman rit,

ex naqkub' nume, mixti'te tma,

kse'n jun rit naqntyo'nk ajtel jon ti'j.

8Xiq'i'n mixti' til,

ex mix-a'lo'kye klonte;

mix-a'lo' jun b'ajx tk'u'j ti'j.

Kub' najsa'n twitzju' tx'otx' lu,

kub' b'yo'n tu'n tpaj kyilju' ntaname'.

9Ku'x mqu'n kyk'etz xjal b'inchal myab'a'n,

ku'x mqu'n kyuk'i'l xjal mixmyab'a'nqe',

extzun min tb'incha jun il.

ex min etz jun yol te sb'ub'l toj ttzi.

10Taj Qman Dyos tu'n tk'ixb'sanjtz toju' yajb'il.

Tu'nju' taq'tib' te chojb'il tu'n tpaj il,

nimtoj tchwinqlal ktenb'el

kche tla'ju' tyajajil;

che japumelju' t-xim Qman Dyos naq tu'nel.

11Ktka'yi' spik'un tik'lenxi' txqan yajb'ilte,

ex kqeb'iltk'u'j ajtb'inte;

nim che kletil tu'n tmajin Qman Dyos tnik'alti'j,

qu'n ate kxe'l iqanteju' kyil.

12Qu'mtzun kxe'l tq'o'n Qman Dyos jun toklen kyxolju' nimaq kyoklen,

ex k'okyel ttxa'n kanb'ab'l kyuk'i'lju' kuwqe',

qu'n mataq'tib' tu'n tkyim

ex matz'ok kyajlal b'inchal myab'a'n,

extzun naqx jawtiqa'n kyil txqan xjal

ex yolin kyi'ju' aj il.