Is 29 - Mam Ostuncalco Bible

1¡Qab'anx twitz Aryel,

aju' nintnam jatena' jte' q'ij Dab'i!

Tzik'ku' jte' ab'q'i

tu'n kyik'sante txqan kyninq'ij,

2chin okyeltentzuntze' yajulte Aryel,

nim oq'el kb'ajel.

Ikyk'okyela' nintnamju' weye' kse'n Aryel.

3Che tzajel nchq'o'ne' nxjale' te q'oj tu'n tb'aj kytxoli'n kyi'je',

k'okyel njpu'ne' kyi'jileye' kyu'n kuwsb'il

ex che b'el nk'u'ne' xjal tu'n kyq'ojin kyi'je'.

4Majx kb'el me'seta, woqliya twitz tx'otx';

ajtjaw yolina naku'j jun xob'tzal;

naku'j naq njiq'chantla ajtyolina.

5-6Naqtzun myanim, toj jun kmujx,

kb'el ttz'e'ysa'n Qman Dyos nimtipumal kywitzju' tajq'oja,

tuk'i'l q'ankyaq, kyajnajnab', tuk'i'l nim tq'ojq'ojel,

tuk'i'l kyq'iq' jb'al, q'ankyaq ex q'aq' xitul.

Majx che kjelquqixkye' txqan tajq'oja,

che b'ajelkye' txqan yajulteya kse'n nxi' iqa'n ttxa triy tu'n kyq'iq'.

7Kykyaqilju' tnam min nb'ent kyajlet lu

nche q'ojin ti'j Aryel,

kykyaqilju' nche q'ojin ti'j

ex nche oktzaqpaj xitulkye ja kuwsa'n,

aye'ju' nche yajlante,

naku'j jun witzik' te qonik'an che elela'.

8Ikyk'okyela' kse'n nwitzk'an jun xjal nwe'yajti

ex toj twitz qa nwan,

ajtzun ttzaj tna'ntib' nxi'xwe'yajti;

mujqa kse'n nwitzk'an jun xjal nk'wajti

ex toj twitz qa nk'wan

ajtzun ttzaj tna'ntib' nxi'xk'wajti

nxi'x tzqije' toj tqul.

Ikytzun kb'ajelju' kyi'ju' txqan tnam min nb'ent kyajlet lu

nche q'ojin ti'ju' witz Syon.

9¡Kyljonxtzune' mixti' kynab'le'!

¡Kymoẍsankukyib'e' kukxju', tu'n lan che ka'yine'!

¡Che ẍutujlaku'ye' kukxju' kse'n tx'ujtenil,

maskye mya tu'n q'e'n!

10Matxi' tzaj tq'o'n Qman Dyos

jun watl b'a'nxi'x kyib'aje'.

Aye' t-sanjelal Dyos witzb'aj toju' tnam,

matxitzun tz'ok tjpu'n Qman Dyos kywitz tu'n jun su't.

11Tkyaqil witzik' matxi' tz'ok kyeye'

kse'n tz'ib'a'n

twitz u'j b'altz'i'n ex jpu'n b'a'nxi'x.

Qama txi' tq'o'n jun te jun b'a'n t-ẍch'i'n u'j

ex matxi tma'n te: Ẍch'i'nktza lu, qa chi,

ktzajel ttzaq'we'n:

Lay b'ent, qu'n jpu'n b'a'nxi'x, chilo.

12Qatzun matxi tq'o'n te jun xjal min b'ent t-ẍch'i'n u'j

ex matxi tma'n te: Ẍch'inktza lu, qa chi,

kxe'l ttzaq'we'n te: Min nb'ent nẍch'in u'je', chilo.

13Tzaj tma'n Qman Dyos weye':

Najb'en tnam lu weye' naq tu'n tyol

ex tu'n ttzi nnimana' weye',

atzu'n tanmi najchaq ta' wi'je',

extzu'n k'u'lb'il ntb'incha'n weye'

xjalte' xjaw nab'linte

ex naq xb'jaw b'ent toj kywi'.

14Qu'mtzun kjel k'ab'chaj jumajtlju' tnam lu wu'ne'

kyu'n b'a'nq'ob'aj ex ti'xti' te lab'te'n.

Kb'el naj kynab'lju' ati kynab'l

ex lay b'entl kyximanju' k'atzqe' kyxol.

15¡Qab'anx kywitzju' nche ewan twitz Qman Dyos

tu'n lalun tz'el yalju' kyxim,

nkyb'incha'n myab'a'n toj qxopin

ex nkyma'n: Mix-a'lo'te nka'yin qi'j. Mix-a'lo'te nlonte!, chechij.

16¡Inxi'x jyonjtz tu'me'l tu'n kychuksanjtz ti'xti'!

Naku'j jun toklenju' xoq'l

tuk'i'lju' naq'unan ti'j.

Lay txitma'n jun ti'xti' teju' b'inchante:

Myata b'inchanweye', chiwt,

lay txitma'n jun piẍ b'a'n tx'otx' teju' b'inchante:

Min kanli twitza ti'ju' ntb'incha'na, chiwt.

Yol Tziya'n tu'n kyklet aj Israel

17Toj jte' q'ijtl

k'okyelju' nimaq k'ul te awb'il,

aye'tzu'n awb'il che okyel te nimaq k'ul.

18Tojtzu'n q'ij lu che b'ilju' xjal chkyinqe'

aj tjawẍch'i'n u'j kye,

exqe' moẍ kb'antel kyka'yin,

lay che takanjetl toj qxopin ex qlolj.

19Che tzalajel jumajtlju' min nkynima'n kyib' twitz Qman Dyos,

che tzalajelju' xjal prowqe'xi'x

ti'j Qman Dyos Xjan kye aj Israel.

20Che mankulju' xjal mixti' kynab'l,

lay che tentlju' nkynima'n kyib',

ex che b'ajelju' o'kxtzu' toka' kywi' ti'ju' myab'a'n,

21aye'ma' nche poqonkye txqantl te b'yolxjal,

ex nkub' kyq'o'n xpatxab' kye ajkawil,

ex tu'n sb'ub'l min nkyjo'n tu'n tb'inchet tnik'alilti'j teju' mixti' til.

22Qu'mtzun ntma'n Qman Dyos nkyk'lu'n aj Israel

ju' klonte Ab'raam, ikjalu:

Kxe'l qex ja'lo lay tz'eltl tch'ixaw Jakob',

ex lay kub' ẍkyeqax,

23qu'n ajtel kynik'ju' tyajajil

ti'ju' matxi' nb'inchaye' toj ttanam,

k'elelkynik' ti'ju' woklene' xjan ex ktenb'el nchiylale' kye,

ayine' Dyos Xjan kye aj Israel.

24K'okyel kynab'lju' xjal chukjni kynab'l,

exqe' nche xmayin kyk'ma'ju' xnaq'tzb'il, chi Dyos.