Hab CHIK'B'AB'L - Mam Ostuncalco Bible
CHIK'B'AB'LAte Ab'akuk pakb'an tojxju' tq'ijlalil tej tpakb'an Nawum, tej ma'toq kub'kyi'j aj Asirya kyu'n aj B'ab'ilon, ex tej tok toklenju' B'ab'ilon kse'n toklen Asirya. Aye'tzunju' kxjal te q'oj e'pon kse'nqe' t-xjal Asirya majxtaq txkupqe'. Qa tzalajte Nawum tej tkub'ti'ju' Ninib'e, atzunte Ab'akuk jawsak'puj tej tka'yinte qa b'entlju' B'ab'ilon kse'nxju' Ninib'e. Ex kane toj twitz Ab'akuk qa ma'toq che b'inchan ilju' ttanam Dyos sk'o'n ex intoq tna'nju' t-snajelal Dyos qa che b'el yajti jumajtl toj kq'ob'ju' aj B'ab'ilon. Ati maj ntzaj toj twitz Ab'akuk ti'j Dyos kse'nte Job' ex intma'n. ¿Se'n taq'wi ntjo'n Dyos tu'n tik' tkyaqil ja'lu? Atzun kyi'ju' aj B'ab'ilon ntma'n, qa Xjan Dyos, ¿Se'n taq'witzun nche' ikxju' xjal pi'sqe' tu'n? (cap. 1). Atzunte Dyos tzaj ttzaq'we'n te Ab'akuk qa ati tu'n tten tpasens ex ati tu'n tokqe tk'u'j ti'j. Qu'n naqa xponju' tq'ijlalil ex ajtponju' kmuj, ate Dyos tzul q'ol tume'n t-xel kye kykyaqil xjal: che kb'el t-xitunju' xjal myab'a'nqe' ex che anq'ilju' mache kub' we' toj kyokslab'l tu'n (cap. 2) Aju' mankb'il tnej atzu' nyolina' ti'ju' jun na'j Dyos, nakuj tuk'i'l b'itz, ja najwalitaju' tb'i Dyos nitzku' ex ja nq'anchalixaju' tokslab'l Ab'akuk nimxi'x ti'j Dyos.
