1Naq o'kx tuk'i'l Dyos nkneta' nak'b'il wu'ne',
tk'etzte ntzaja' kolb'ilweye'.
2Naq o'kxte klol weye' ex xq'uqilweye'.
Lay chin kub' tz'aqe', qu'n ate e'wb'il weye'.
3¿Ma kukx che okyil tzaqpaju'ye' wi'je'
tu'n nkub' kyxone' twitz tx'otx',
kse'n jun tapi ajttzaj tz'aq
mujqa kse'n ch'laj noqx tu'n ttzajtz'aqtel twitz tx'otx'?
4O'kxtzu' nche ximana'ye' tu'n nkub' kyxitune';
axi'x kytzalajb'ilju'ye' chajyolil.
Naq tu'n kytziye' nchin jawa' kynimane',
atzu'n kynab'le' nche yasune' wi'je'.
5O'kx tuk'i'l Dyos nkneta' nak'b'il wu'ne';
qu'n tuk'i'l ntzaja' q'uqb'ab'l nk'u'je'.
6O'kxte nklonweye' ex inxq'uqinweye'.
Lay chin kub' tz'aqe', qu'n ate e'wb'il weye'.
7Tuk'i'l Dyos ntzaja' kolb'ilweye' exju' ninb'ilweye';
ate inklonweye' ex e'wb'il weye'.
8¡Nwnaqil, qek kyk'u'je' ti'j Qman Dyos kukxju'!
¡Che yolinqe'ye' tuk'i'l toj na'j Dyos q'uqlixi'x kyk'u'je'!
¡Ate Dyos e'wb'il qe!
9Naqxgante' xjal,
b'a'nqa q'inun mujqa prow;
naqwit che kub' mlo'n junx toj jun malb'il,
mixpeloti'xte kyalal kyetwitz kyq'iq'.
10Lalun qe kyk'u'je' ti'ju' q'oj kyib'aj xjal;
¡lalun jawkynima'n kyib'e' ti'j kyeleq'e'!
qama che jaw q'inumaxe',
lalun tz'okqe kyk'u'je' ti'j pwaq.
11-12B'a'npunxi' maj nb'iye' te Dyos
qa te qe'ju' ipumalj exju' tk'u'jlalil
ex intq'o'n tu'me'l t-xel teyile junjun
kse'nxju' tb'inchb'en, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
