Sof 2 - Mam Ostuncalco Bible

1Kyb'uyim kyib'e' junx aye'ye' xjal mixti' kych'ixawe',

2na'mxku' kponxone'

kse'n ttxa triy, noq toj jun q'ijx nkub'a' naj;

na'mxku' tkub' tz'aq kyib'aje'

aju' ttx'u'jil Qman Dyos nk'anti;

na'mxku' tkub' tz'aq kyib'aje'

aju' tq'ijlalil ttx'u'jil Qman Dyos.

3Kyjyome' Qman Dyos kykyaqile'

me's qe'ye' twitzju' tx'otx' lu,

aye'ye' nxikyb'i'ne' tchaq'b'il.

Che okxe' tnik'alkyi'je' ex me's,

qaj che kletiltzuntze'

toju' q'ij ajttzaj tq'o'n Qman Dyos ttx'u'jil.

Tz'e'ysb'il kywitzju' nimaqtnam

4Kjeltenju' nintnam Kasa chq'ajlajtl,

exju' Askalon xitjnitl;

tojxi'x q'ijtl che elex xla'ja'n xjal

nche najan toj Asdod,

ex majx che jawitz xb'oq'inju' xjal

nche najan toj Ekron.

5¡Layqe'xwite' nche najane' toj kreta,

najlqe'ye' ttzi ninnjab'!

Matxi' tma Qman Dyos tu'n ttz'e'yset kywitze'.

¡Kanaan, ktanam pilistey,

kb'el nxitu'na ex mixti'tl xjal knajal toja!

6Kjeltenju' tnam ati ttzi ninnjab'

wu'ne' te kywab'l wakx

jakyb'u'yiya' kyib'ju' k'ik'lel,

ex ja kb'elaju' kych'lajil rit.

7Aye'ju' che kjel anq'in toju' tnam Juda

che kb'el najan toju' tnam lu

ajtul Qman Dyos onilkye

ex aj tch'exb'ente kyanq'ib'l.

Atzuntzu' che xq'uqila' ti'ju' krit,

ex che ojlal te qonik'an kyoju' ja te Askalon.

8-9A ntma'n Qman Dyos nimtipumal kjalu:

Oje nb'iye' yol taq'wix kyu'n aj Moab'

exju' taq'wix xkyb'incha aj Amon.

Qu'n nim kyol taq'wix kyeju' ntaname'

ex matxi' che jawb'ent twitzju' kytx'otx'.

Qu'mtzun knma' jun nyole' axx'ix

ikykye aj Moab' che ik'ela' kse'n Sodom

exqetzu'n aj Amon ikyche kjela' kse'n Komor,

che jawil b'entju' kykojb'il te ch'ix,

ex te ttx'otx'al atz'an,

te jun tx'otx' noq tjunalx kukxju'.

Aye'tzu'n che kjel anq'in toju' ntaname' che eletz q'inteju' toj kyja

ex che kjelten twitzju' kytx'otx'.

10Atzun chojb'ilju' kyk'ma' aj Moab' ex aj Amon.

Tu'n tpajju' xikylanu'n kyol kyeju' ttanam Dyos,

tu'n tpaju' mache b'jawb'ent noq tu'nelju' ttanam

Qman Dyos nimtipumal.

11K'okyel te Qman Dyos xob'ajilx kye

Che' kb'el t-xitu'n kykyaqilju' dyos teju' tnam,

ex che k'ululju' xjal te toj tkyaqil najb'il,

expe' ikx kyu'nju' xjal najliqe' kyoju' piẍ tx'otx' toj ninnjab'.

12¡Ex ikxkye', aye'ye' aj Etyopiy,

che k'ixb'ele' ex che b'eltz'aqe' tu'nju' tk'uẍtx'e'nb'il Qman Dyos!

13Kxe'l tnuqpi'n tq'ob' toj tb'a'nq'ob' kya'j

tu'n tkub' t-xitu'n Asirya,

ex kjel t-xitu'nju' nintnam Ninib'e,

ex majx kjawil b'ent te jun chq'ajlaj tzqij tu'n.

14Kjawitz xb'oqitju' ttzeylal kyja,

ex kyoj che b'jo'kyexa'ju' tnej rit

ex tkyaqil tnej txkup toj k'ul.

Aju' tukru exju' tol

kche wtal kyib'aju' tqan ja,

ex kche oq'el joj kyib'aju' tokexspik'un ex kyib'aju' nunb'ral.

15Atzun nintnam ja'lu nxi'x tnima'ntib'

nanq'in q'uqlixi'xtoq tk'u'j,

ex intoq kma'nju' najlqe'toq toj

qa mixti' juntl xjal twitz tx'otx' kse'nkye.

¡Matxi'xi'x kyej xitj

ex matxi' tz'ok te knajb'il tojk'ul txkup!

Kykyaqilju' nche' ik' tk'etz, kche ẍut'il ex majx k'elel kyik'u'n.