1 S 4 - Mam Ostuncalco Bible

1atzuntlte Samwel intoq xitchik'b'a'n kye kykyaqil aj Israel.

Xikyiq'i'n pilistey tkaxil tchaq'b'il Dyos

B'aj kyb'u'yi'n kyib' pilistey toju' tq'ijlalil lu tu'n kyq'ojin kyi'j aj Israel, ex e'etz aj Israel q'ojil kyi'j, e'kub'ten tk'etz Eb'en-eser. Aye'tzu'n pilistey e'kub'ten Apek,

2E'tzajtzuntz q'ojil kyi'j aj Israel, tetzunj ttzyet kyq'ojin, kub'kyi'j aj Israel kyu'n, e'kub' kyb'yo'n lajk'al (4,000) ichan jae'q'ojina'.

3Tetzunj tanjtzkyi'ju' aj Israel te q'oj toju' kynajb'il, kymaju' tijwnaq kyxol aj Israel: ¿Tiqu'n xtaja' Qman Dyos ja'lu tu'n tkub' qi'j kyu'n pilistey? ¡Qo'qe' iq'ilteju' tkaxil tchaq'b'il Qman Dyos, tu'ntzun tten qxol ex tu'n qklet kye qajq'oj!, chechij.

4Exi'tzun kychq'o'n aj Israel jun tnej xjal te q'oj toj Silo, ex tzaj kyiq'i'n tkaxil tchaq'b'il Dyos nimtipumal, ju' ati tq'uqb'il te tkawb'il kyib'aj kyerb'in. Ate'toqtzun kab'e' tk'wal Elyi aye' Opni ex Pinees kyxolju' iq'ilte tkaxil tchaq'b'il Dyos.

5Atzunj tponju' kax jatoq ta'qe' aj Israel, e'jaw ẍch'in aj Israel tu'n nim tzalajb'il expe' majx tinunju' tx'otx' kyu'n.

6Tetzunj kyb'inte pilistey sich' lu, kyma: ¿Ti'tzuloti' nb'aj kyxol aj Eb'rey?, chechij. Atzunj kyb'inte qa matxi'toq ponju' tkax Qman Dyos Kydyos aj Eb'rey toju' kyxmuj,

7tzaj tchi kyi'j ex kyma: ¡Matxi' che ul kydyos kyxol! ¡Qab'anxtzun qwitz ja'lo, qu'n mikxa'toqte' tnejel!

8¡Qab'anx qwitz! ¿Alkyetzun kklolqe tu'n miqo' kub'a' tz'aq toj kyq'ob'u' dyos nim kyipumal lu? ¡Aye'na' e'kub' xitunkye aj Ejiptju' toj chq'ajlaj tu'n chukchaq yajb'il!.

9¡Kuwqo'xtzun q'ojil ayo' pilistey, qoqe' q'ojin tu'n tkyaqil qipumal, tu'ntzun lalun qo ok te k'a'yi'nmajin kye aj Eb'rey, kse'n matxi' che oka' qe! chechij.

10E'tzajtzun aj Pilistyatz q'ojil ex kub'kyi'j aj Israel kyu'n, eb'ajx oqu' aj Israel toju' kyxmuj. Nim xjal eb'aj kyu'n, e'kyim oxmutx' o'lajk'al (30,000) ichan te q'oj kyxolju' ntoq che b'et tu'n kyqan.

11Xikyiq'i'nju' tkaxil tchaq'b'il Qman Dyos, ex e'kub' kyb'yo'n kab'e' tk'wal Elyi aye' Opni ex Pinees.

12Tzaqpajtzun jun xjal te q'oj kyxol tyajajil B'enjamin toju' q'oj, ex pon ojqel toj Silo texju' q'ij. B'ajni laqju' ti'j ex txqan tx'otx' toj twi'.

13Tej tpon, q'uqlitoq Elyi tib'aj jun q'a'jtz ttziju' ja, intoq ka'yinx toj b'e, qu'n inxi'xtoq b'ajx tk'u'j ti'ju' tkaxil tchaq'b'il Qman Dyos. Okxju' ichan lu toju' nintnam, ex xitma'n ti'ju' matxi'toq b'aj; axtzun kmuju' kyaq'wiju' xjal ẍch'il.

14Tetzunj tb'inte Elyiju' sich' lu, xitqani'n:

—¿Ti'tzun ti'ju' nb'aj lu?, chij. Atzunju' ichan xi' ojqelan q'olte tqanil tu'n tb'inte Elyi,

15tetoq kyajnaq wajxaqlajoj ab'q'i Elyi ex mixtoqti' nka'yintl.

16Xitma'n te:

—Ma chintzaj oqe' ja'lo, tzma ẍin tzajxe' toj q'oj, chij.

—¿Ti'tzu'n matxi' b'aj, nky'ajul?, chi Elyi xitqani'n te.

17Xi'tzun ttzaq'we'n:

—Mache kub' oqu' aj Israel kywitz pilistey, matxi' che kyim txqan xjal, expe' matxi' che kyim kab'e' tk'wala Opni ex Pinees, ex matxi' txikyiq'i'n pilistey tkaxil tchaq'b'il Qman Dyos, chij.

18Naqtzun nb'aj tma'n ichan tzaj oq toj q'oj ti'ju' kax te Qman Dyos, xitz'aq Elyi ttze'lti'j ti'jxi'ju' tq'a'jtz, tu'me'l ttziju' ja, kub' toqju' ti'j tqul ex majx kyim, qu'n matxi'toq tijin. Kab'naq (40) ab'q'i ten te nejenel kyxol aj Israel.

19Ch'onwi'toqtzu'n tlib' Elyi, ju' t-xu'jil Pinees, ex ch'inxtltoq tb'anix, tzaj ch'on wnaq ti'j tej tb'inte qa matxi'toq txiq'i'n kax te Qman Dyos exqa matxi'toq kyimu' tlib' exju' tchmil; kub' t-xb'aq'la'n tib' tu'n k'ixk'oj ex itz'jiju' tal.

20Tetzunj kyka'yinteju' intoq che nenunte qa xi'toq tkyim, xikyma'n te: Lalun xob'a, qu'n matxi' tz'itz'ji jun tala q'a, chechij. Atzunte mixti' tzaq'wi ex mixti' xitq'o'n twi' ti'j;

21-22oktzun tq'o'n tb'iju' tal Ikab'od, qu'n tma: Matxi' kyej Israel mixti' toklen, qu'n matxi' txiq'i'n kax te Dyos, chij. Tmaju' yol lu qu'n matxi'toq txiq'i'nju' kax te Dyos ex matxi'toq che kyimu' tlib' exju' tchmil.