1 S 1 - Mam Ostuncalco Bible

Tzaj tq'o'n Dyos jun tal Ana

1Atitoq jun ichan Elkana tb'i kyxolju' toj tja Sup, najlitoq Rama, kyxolju' witz te Eprayin. Tk'wal Jeroam ex tchman Elyu. A tman tchmanju' Tou, tk'wal Sup, tyajajil Eprayin.

2Kab'e'toqtzun t-xu'jil Elkana ate'. Aju' jun a tb'iju' Ana, atzu'n juntl Penina. Atitoqte' Penina tal, atzunte Ana mixtoqti'.

3Tkyaqiltoqtzun ab'q'i nxi' Elkana k'ulul ex q'ol chojb'il twitz Qman Dyos nimtipumal toj Silo. Jata'qe'toq kab'e' tk'walju' pale Elyi, aye' Opni ex Pinees, paleqe'x twitz Qman Dyos.

4Ajtkub' tq'o'n Elkana chojb'il, inkub' tq'o'n jun tnej ti'j Penina ex kyi'ju' tal q'a ex txin,

5atzu'n ti'j Ana intoq kub' tq'o'n tb'anilxi'xtl, qu'n intoq tk'u'jla'nxi'x, b'a'ntzunqa mixtoqti' in alan tu'n Qman Dyos.

6Tu'ntzun tpaj ja'lu intoq q'ojin Penina ti'j Ana, naqxtoq tak'a'n tok q'olte ttx'u'jil ex intoq xmayin ti'j, majxtoq nel tch'ixaw tu'n tu'nju' mixtoqti' in alan tu'n Qman Dyos.

7Ajtoqtzun kyxi' toj tja Qman Dyos atl junjun ab'q'i, intoq okten Penina ik'lelte Ana ikju'; qu'mtzun majxtoq inkub' oq' Ana tu'n tpaj ex mixtoqti' in wan.

8Atzunte Elkana ju' tchmil intoq xitma'n te: Ana, ¿tiqu'n in oq'a'ya? ¿Tiqu'n nb'isuna'ya ex min nwana? ¿Ma myatzun tb'anilqinxi'xe' kyekywitz lajoj tala?, chij te.

9Junmaj, tej ate'toq toj Silo, jaw we' Ana tb'ajenxi' wan. Q'uqlitoqu' pale Elyi toj jun tq'uqb'il nqayin ttziju' tja Dyos.

10Kub'ten Ana kub'sal twitz Qman Dyos, qu'n inxi'xtoq b'isun, ex majx in noq' tu'n tpaj.

11Ex xittziya'n te Qman Dyos ikjalu: Dyos nimtipumala: qama tzajtka'yi'na yajb'il wi'je' ayine' tmajina, exqa matzaj q'aq'antk'u'ja wi'je' tu'n titz'ji jun wale', kxe'l nq'o'nwe' tu'n tajb'en teya toj tkyaqilju' tchwinqlal, ex lay tz'el joyitju' twi' toju' ajb'eb'l lu, chij.

12Tetzunj intoq na'n Dyos Ana twitz Qman Dyos, intoq tx'ikyex Elyi ti'ju' ttzi;

13atzunte Ana intoq na'n Dyos toj tanmi. Mixtoqti' in q'ojq'ojex toj twi'; noq o'kxtoqju' ttzi in yukchi. Kub' t-xima'ntzun Elyitz qa tx'ujtenil,

14ex xitma'n te:

—¿Ma kukx ttx'ujtiju'ya? ¡Spik'b'am tuk'i'la! chij te.

15Xi'tzun ttzaq'we'n Ana te:

—Minti' ta, mya inwt chin k'wanwe' b'in mujqa q'e'n kuw tq'ob', awe' nchin niq'in, nchin b'isune' ex ntinke' q'malte' te Qman Dyos.

16Lalun kub' t-xima'na qa myab'a'n qyaqine', machin kub'tenwe' na'l Dyos nim tqan, qu'n inb'ajx nk'u'je' ex inxi'x chin b'isune'.

17—Awtnatzun Dyos kye aj Israel tzaj q'onte xxi'tqani'na te, chab'a txi'ya, chi Elyi xitma'n te.

18—Chjontexi'xna' teya, chi Ana te.

Anjtzun ti'j Ana jatzaja', in pon ex aq'wi wal, eltzunte' b'istzu' ti'j.

19B'a'n prim te juntl q'ij e'anj kyja toj Rama kyb'ajlenxi' k'ulun te Qman Dyos. Kub' kẍetzun Elkanatz tuk'i'l Ana, ex tzaj tna'n Qman Dyos tqanb'etz Ana.

20Kyajtzun Anatz ch'onwi', tetzunj tjapun tq'ijlalil, itz'ji jun tal ex oktq'o'n tb'i Samwel, qu'n xitqani'n te Qman Dyos.

21Tojtzunj tpon tq'ijlalil tu'n kyxi'tl Elkana kyuk'i'l kykyaqilju' toj tja toj Silo, tu'n tjapunju' tyol ojetoq ttziya, ex tu'n txitq'o'n chojb'il atl junjun ab'q'i;

22atzunte Ana mixti' xi', xitma'n te tchmil:

—Lay chinxe' qu'n na'mx telju' ne'ẍ ti'j tch'u', ajtzun tel, kxe'l wiq'i'ntzuntze' te Qman Dyos tu'n tkyejten jumajx, chij.

23Atzunte Elkana ju' tchmil xittzaq'we'n te:

—B'inchamna'ya aju' b'a'n toj twitza. Atzun tyoya ajtel ti'na ne'ẍ ti'j tch'u'. Awttzun Qman Dyos tz'oninteya tu'n tjapunju' tyola tu'na, chij. Ikytzu'n kyeja' ten Ana ch'isalte tal tzmaxi'j tel ti'j tch'u'.

24Tetzunj tel tiq'i'n ti'j tch'u', xitiq'i'n tal q'a toj tja Qman Dyos toj Silo, akxtoq tel ti'j tch'u'. Ex xitiq'i'n jun qpoj tman wakx te oxe' ab'q'i, jun arob' arin ex jun tz'u'n b'in.

25Kub'tzun kyb'yo'n jun qpoj tman wakx te chojb'il ex xikyq'o'nju' tal q'a te Elyi.

26Ex xitma'n Ana te Elyi:

—Najsam Dyos tchwinqlala, taye, ayinweju'ye' qya inkub' tene' na'l Dyos nqayin tk'etza.

27Xinqani'ne' te Qman Dyos tu'n ttzaj tq'o'n wale' lu, ex matzaj tq'o'n weye'.

28Matxi' kub' nxima'ne' tu'n txinq'o'ne' te Qman Dyos, ex k'ajb'el te Qman Dyos toj tkyaqilju' tq'ijlalil tchwinqlal, chij.

Kub'tzun meje twitz Qman Dyos, majx kub'joqe twitz tx'otx'.