Is 8 - Mam Ostuncalco Bible

Oktq'o'n Isayiy tb'i jun tk'wal te techlal

1Tzaj tma'n Qman Dyos weye': Q'intz jun nin tz'lena ex tz'ib'anku'ya twitz, tuk'i'l techtz'ib' q'ancha'l ex ojtzqi'n kjalu: Maer-salal-asb'as.

2Q'inqe'tz tzuna pale Uriy ex Sakariy tk'wal Jeb'erekyiy te tziyal q'uqli kyk'u'jlalil, chij.

3Yajxi'tzuntl nkub' kẍeye tuk'i'l sanjelal qya, ju' nxu'jile', ex oktiqa'n twi' jun tal ex itz'jiju' tal. Tzajtzun tma'n Qman Dyos weye': q'onka tb'i Maer-salal-asb'as.

4Qu'n na'mxtoqpe' tmante k'wal tat ex nan, che okyel leq' toj Damask ex Samarya, kb'ajxel q'i'n kyq'inumalju' tnam te nimaqkawil aj Asirya, chi Dyos.

5Ex tzaj tma'ntl Qman Dyos weye':

6Naq tu'n kyxob'el te Resin ex te tk'wal Remaliy

nela' kyik'u'n a' toj Siloe,

ju' chab'axi'x nb'et,

7ktzajel tiq'i'n Qman Dyos tnimal a' Ewprates kyib'aj

(aju' nimaqkawil aj Asirya tuk'i'lxi' tkyaqil tipumal)

Kb'ajel tyaju'n tkyaqilju' tb'eyil,

ex kpiq'chajel ttziyile,

8k'i'k'el tzmax Juda ex knojel tu'n,

kjapumelte' tzmax tjaq' tqul.

Ikyk'okyela' kse'n jun pich' lik'u'n toj t-xik',

Emanwel, knojel toj tkyaqilju' ttx'otxa tu'n.

9Kyb'uyintz kyib'e', nimaqtnam, ex tzajx tchi kyi'je';

kyb'intz jaye'lu kykyaqile' najchaq tnam:

b'a'nqa matz'ajb'en kyq'ojb'ile', ktzajel ttchi kyi'je'

axxi'x, maskye matz'ajb'en kyq'ojb'ile', kb'elkyi'je'.

10Mixti'x k'okyela'te' kyxime', qu'n kb'el xitjte';

maskye ma kyb'inchaye' ti'xku' kyajb'ile', layx japun,

qu'n atite Dyos quk'i'le'.

Te Qman Dyos tu'n kyxob'a'kye'

11Inkub' ttzyu'ne' Qman Dyos kuw ex tzaj tab'tzi'n tu'n lalun txi' nljo'ne' kyb'e xjal lu. Chij kjalu:

12Lalun kymaye' qa chin jawil miltz'uje' kyi'je', kse'n nkyma'n tnam. Lan che jaw sak'puje' ex lalun che xob'e' te tkyaqilju' nq'manjtz kyeye'.

13Weye' tu'n kyxob'a'kye' ayine' Dyos Manb'aj nimwipumale', qu'n xjan qinwe'; tenx nchiylale' kyeye' ex che xob'e' nwitze'.

14Chin okyele' kse'n jun xpatxab' kyeye'; jun ab'j ja che jawila' trakpuje', ja che jawila' tz'aqu' kab'e' kykawb'il aj Israel; naku'j xpatxab' ja che jawila' tz'aqju' aj Jerusalen.

15Nim che jawil trakpuj, che jawil tz'aq ex che kyimel; nim che tzyetil toj xpatxab', chi Dyos.

Toqxenb'il Isayiy kye t-xnaq'tzb'en

16Kyiq'ime' tqanil lu b'a'nxi'x;

kyewanxe' chik'b'ab'l lu exqe' nxnaq'tzb'ile'.

17Maskye matxitewa'ntib' Qman Dyos kye tyajajil Jakob',

q'uqliwe' nk'u'j ti'j.

Matx tz'okqewe' nk'u'j ti'j.

18B'a'nq'ob'aj qo'qe' kyxol aj Israel

kyuk'i'lju' nk'wale' e'tzaj tq'o'n Qman Dyos,

okub' tq'o'ne' Qman Dyos nimtipumal

najli twi' witz Syon.

19Qama kyma xjal kyeye':

Kyjya'kkyi'je' kyuk'i'l txkol anmi

ex kyuk'i'l ajpkab' nkych'ixpu'n toj kywi' ex nche jasjne.

kytzaq'wenxe' kye

¿Ma laytzun b'ent t-xjelun jun tnam te Dyos,

ma kyetzun kyimni qo xjelula' kyi'ju' itz',

20tu'n ttzaj kyq'o'n qnab'l mujqa jun tpakb'al? chechiku'ye'.

Qa min nche yolin kse'n tchaq'b'il Dyos,

naqx toj kywitz nok.

21Naq kche b'etjel kye' xjal,

jtz'o'nqe' ex nche we'yajti,

tu'ntzu'n we'yaj tzul kytx'u'jil.

Ktzajel kytxko'n toj twi'ju' kynimaqkawil exqe' kydyos.

Nche jaxxi' ka'yin twitz kya'j

22yajxi'tzuntl che b'elka'yin twitz tx'otx',

naq prowil ex qxopin k'okyil kyka'yi'n,

oq'el ex qlolj.

tkyaqil majx kb'el yupj.