1Toju' tq'ijlalil lu tb'i nimaqkawil Merodak-b'aladan, tk'wal B'aladan, nimaqkawil aj B'ab'ilonya, qa yab'toq Esekyiy ex matxi'toq b'anix, tzaj t-sma'n jte' u'j ex oyaj kyu'nel junjun t-sanjelal.
2Tzalaj Esekyiy tej kyul ex b'ajx tyek'u'n tk'uwen kye, e'saqpwaq ex q'anpwaq, e'k'ok'sb'il, ex tb'anil aseyt exqe' k'ub'l taq'unb'il te q'oj, ex tkyaqilju' k'u'nile tu'n toj kykb'el. Mixti' jun ti'xti' toju' tja te kawb'il ex toj tkyaqilju' tkawb'il mixwitti' xityek'u'n kye.
3Xi'tzu'n Isayiy t-sanjelal Dyos tk'etzju' nimaqkawil Esekyiy, ex xitqani'n te:
—¿Ja ẍetzaja'ju' xjal lu, ex titi' xkyma teya? chij.
Atzunte Esekyiy xittzaq'we'n:
—Toj jun tx'otx' najchaq ẍetzaja', toj B'ab'ilon, chij.
4Xitqani'ntl Isayiy:
—¿Ti'tzu'n xkyil toju' tja tkawb'ila? chij te.
Atzunte Esekyiy xittzaq'we'n:
—Makyil tkyaqilju' ati toj. Mixti' jun ti'xti' kyoju' nk'ub'le' mixwitti' xinyek'u'ne' kye, chij.
5Xi'tzun tma'n Isayiy te Esekyiy:
—B'intzpe'ya saj tma'n Qman Dyos nimtipumal kjalu:
6Tzul q'ij, kb'ajxe'lq'i'n toj B'ab'ilon tkyaqilju' ati toj tja tkawb'ila ex tkyaqilju' b'aj kyb'u'yi'n tyajilb'ena. Mixti'xte jun kjelten.
7Expe' che kxe'l q'i'n junjunju' tyajajila toj B'ab'ilon, che b'el kapari'n ex che okyel q'o'n ajb'el toj tja nimaqkawb'il, chij te.
8Atzunte Esekyiy kub't-xima'n qa naqpetzunqa maten nak'b'il ex q'uqli tk'u'jlalil toju' tchwinqlal, xittzaq'we'n te Isayiy:
—B'a'nte' tqanil saj tma'na lu weye' toj tb'i Qman Dyos, chij.
Who We AreWhat We EelieveWhat We Do
2025 by iamachristian.org,Inc All rights reserved.
